ကျာ်ထဝ်၊ မာတ်ချ်(၄)
ဒပ်ကံၚ်ဇြဳပၞာန် ကၠုၚ်မၚ်ဒၟံၚ်ကၚ် ပ္ဍဲကၠအ်ခၜိုတ်ဒေါၚ်တောၚ် ဗ္ဒာဲကွာန်အၚ်္ဂဘိုဝ်၊ ပွိုၚ်ဍုၚ်ကျာ်ထဝ် တိဍာ်ဗော်သွးကောန်ဂကူကရေၚ် KNU ဂှ် ဟိုတ်နူဒးဒုၚ်ဗတိုက်လဝ်တုဲ ကောန်ဒပ်ကံၚ်ဇြဳပၞာန် (၆)တၠ ဒးချိုတ်အာရဂှ် ညးတာလျိုၚ် PDF ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ၊
တ္ၚဲဏံ ဂိတုမာတ်ချ် အခိၚ်နူဂယး ၜိုတ် (၅)နာဍဳဂှ် ဒပ်ကံၚ်ဇြဳပၞာန် ဇြဟတ်မၞုံ ၜိုတ်(၁၃)တၠ ကၠုၚ်ပ္ဍဲကၠအ်ခၜိုတ်ဒေါၚ်တောၚ် သွက်ဂွံမၚ်ကၚ်ဂှ် ဒပ်ပံၚ်ကောံ ဒပ်ပၞာန်ဗၠးကောန်ဂကူကရေၚ် KNLA ၊ PDF၊ KRF၊ ABSDF တအ်ပံၚ်တောဲဗတိုက်လဝ်ရ။
ကြဴနူဒှ်လဝ်ပေါဲဗတိုက်တုဲဂှ် ဒပ်ကံၚ်ဇြဳပၞာန် ကၠုၚ်ပ္ဍိုက်ကေတ်ဏာ ဇွကောန်ဒပ်ကံၚ်ပၞာန် ချိုတ်အာလဝ်ဂှ်တုဲ ပ္ဍဲကဵုပေါဲဗတိုက်ဂှ် လပါ်ဒပ်ပံၚ်ကောံတအ် ပရေၚ်ဇီုကပိုက်ဒးလဝ်ဟၟဲရဂှ် ဟီုသ္ဂးလဝ်ရ။
ကြဴနူအခိၚ်ပေါဲဗတိုက် ဒှ်လဝ်တုဲဂှ် ဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲလ္ပာ်ကွာန်ကဒေတ်ချောၚ် အဆက်ဆက်တုဲ ပလေဝ်ပလေတ်ဒၟံၚ် သွက်ဂွံထ္ပက်ကရောၚ်ပၞာန်ရဂှ် ညးတာလျိုၚ် PDF ခရိုၚ်သဓီု ကိုဝ်အေမေန်ထောန် ဟီုသ္ဂးလဝ်ရ။
ကောန်ဒပ်ကံၚ်ဇြဳပၞာန် ချိုတ်လဝ် ပ္ဍဲပေါဲဗတိုက်ၜါလ္ပာ်ဂှ် ကွဳစက်နူသုသာန်တောၚ်ကလေ ဍုၚ်ကျာ်ထဝ်ၜါဖ္ဍိုက် ကၠုၚ်ပ္ဍိုက်ဖျေံဏာတုဲ ဖျေံဏာလဝ် မူစိတၠရော ဟွံတီကေတ်ရဂှ် ဂွံတီကေတ်နူညးဒေသဂမၠိုၚ်ရ။
ပ္ဍဲကဵုအကံက်တေဝ်လဳဂရာမ် ဠဝ်ဗဳဒပ်ပၞာန်မ္ဂး ပ္ဍဲပေါဲဗတိုက်ဂှ် ဂကောံဒပ်မဟာ (၁) KNU ဗိုလ်မောၚ်ဥူ က္ဍိုပ်က္ဍိုပ် ကေုာံ ဂကောံ PDF မျေတ်ဥူ ဇြဟတ်ဟွံအောန်နူ (၄၀)တၠ ဒဒှ်ရဗတိုက်လဝ်ကွဳစက်ဂီုကၠီုကံၚ်ဇြဳပၞာန်ကီု ပ္ဍဲပေါဲဗတိုက်ဂှ် ကောန်ဒပ်ကံၚ်ဇြဳပၞာန် မွဲတၠဟေၚ် ဂွံလဝ်ဘဲဝပ်တုဲ သီကေတ်ဂွံလဝ် စက် Icon မွဲမကေုာံ လွဟ်ဂၠေံမွဲဒကိုအ်ရဂှ် ချူတြးဓမံက်ထ္ၜးဒၟံၚ်ရ။
ဂိတုဖေဖဝ်ဝါရဳ စၟတ်တ္ၚဲ (၂၆) တုဲကၠုၚ် အခိၚ်ဗ္တံဂှ်လေဝ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲကွာန်ငှေတ်ပျဝ်တဝ်၊ ပွိုၚ်ဍုၚ်ကျာ်ထဝ်ကဵု ဒပ်ပံၚ်ကောံ KNLA တအ်ပေါဲဗတိုက်က္တဵုဒှ်လဝ်တုဲ လ္ပာ်ကံၚ်ဇြဳပၞာန် (၂) တၠ ချိုတ်လဝ်တုဲ ဂွံလဝ်ဘဲဝပ်မွဲတၠရ။
ပရိုၚ်-သြၚ်လောန်တိုၚ်(မ်)