ရေဝ်၊ အဝ်ဂါတ် (၄)
ဟိုတ်ဒၟါနူ ရုၚ်(လဝက) ပွိုၚ်ဍုၚ် နူအရာပ်( ရန်မျိုးအောၚ်) ၊ ပွိုၚ်ဍုၚ်ရေဝ်၊ တွဵုရးဍုၚ်မန် ဒးဒုၚ်ပန်ပှော်ဂှ်ရ ဒုသ္ကိုပ် (လဝက) ပွိုၚ်ဍုၚ် မပါလုပ် (၃) တၠ ချိုတ်အာတုဲ (၁) တၠ ဂွံလဝ်ဝပ်သ္ကာတ်မြဟ်ရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ရုၚ် (လဝက) ဏံဂှ် ပ္ဍဲဂိတုအဝ်ဂါတ် (၃) အခိၚ်လဒေါဝ်တ္ၚဲ ၜိုတ် (၁၂) နာဍဳဂှ် ဂကောံလကိုဟ်ဍုၚ်ရေဝ် (ရေးဘီလူး) ကၠုၚ်စိုပ်ပန်ပှော်ဗ္တိုက်လဝ်ရ။
ဟိုတ်နူရုၚ် (လဝက) ဒးဒုၚ်ပန်ပှော်ဂှ်ရ ဒုသ္ကိုပ်(လဝက) ပွိုၚ်ဍုၚ် ဥူအံၚ်ကိုဝ်ထက်၊ ဒုသ္ကိုပ်က္ဍိုက်ပ် ဥူတုၚ်ထိုက် ကဵု ကောန်အရာပ်ကၠုၚ်ပလေဝ်စက်ချာဲတၞးလိက် မွဲတၠ အပံၚ်ဖအိုတ် (၃) တၠ ချိုတ်အာလဝ်တုဲ ဒုသ္ကိုပ်က္ဍိုက်ပ် ဥူမျေတ်လွေန်ဂှ်လေဝ် ကလိဂွံလဝ် ဘဲဝပ်သေနာတ်တံကီုရ။
ဒုသ္ကိုပ်က္ဍိုက်ပ် ဥူမျေတ်လွေန် မကလိဂွံလဝ် ဘဲဝပ်သေနာတ်ဂှ် ပလံၚ်ဗစိုပ်လဝ် ရုၚ်ဂဥုဲညးဍုၚ်ကွာန် မတ်မလီတေံတုဲ ဒးဂွိၚ်ဒၟံၚ်ကဵု အန္တရာယ်လမျီုရောၚ်ဂှ် ညးဒေသမွဲတၠ ဟီုရ။
ဗွဲကြဴရုၚ် (လဝက) ဒးဒုၚ်ပန်ပှော်ဂှ်တုဲ ပ္ဍဲဍုၚ်ရေဝ်ဂှ် ဒပ်ကံၚ်ဇြဳပၞာန် ဗတေၚ်ဓရတ်လဝ် ပရေၚ်ဂီုကၠီုတုဲ ပ္ဍဲကဵုပါၚ်ဂၠံၚ်လုပ်တိတ် ဍုၚ်ဂှ်လေဝ် ပွမဂၠိုက်ဂၠါဲစၟဳစၟတ် ကၟာတ်ဆိုအ်ဗတံ ကေုာံ ဖံက်ပန်သေနာတ်တံဂှ် ကၠောန်ၜိုတ်လဝ်ရ။
ဂကောံလကိုဟ်ဍုၚ်ရေဝ်(ရေးဘီလူး) ဂှ်ဝွံ နကဵုသၞာဲဒဴ ညးမယိုက်ဂၠေၚ်ဒၟံၚ်တာလျိုၚ် သၟဝ်ကံၚ်ဇြဳပၞာန်တံဂှ် ဂိတုအဝ်ဂါတ် စၟတ်တ္ၚဲ (၂) စွံလက္ကရဴအိုတ်တုဲ သွက်ဂွံနုက်တိတ်ကဵုအိုတ်ဂှ် ဗွဲကြဴပ္တိတ်လိက် ကဵုသတိတုဲဂှ် လုပ်စိုပ်ပန်ပှော်လဝ် သာ်ဏံရ။
ပ္ဍဲရုၚ်ဌာန က္ဍိုက်ပ်ဇြဟတ်ညးဍုၚ်ကွာန် ကေုာံ ကောပ်ကာဲပရေၚ်မၞိဟ်လုပ် ပွိုၚ်ဍုၚ်ရေဝ်ဂှ်ဝွံ တုဲကၠုၚ်ဂိတုဂျူလာၚ်တေံလေဝ် ဗမ်ဗ္တိုဟ်ထ္ကး က္တဵုဒှ်လဝ်ရ။
ပရိုၚ်−သြၚ်လောန်တိုၚ်(မ်)