မြဝတဳ၊ အဝ်ဂါတ် (၄)
ဒပ်ကံၚ်ဇြဳပၞာန် သွက်ပရေၚ်အုပ်ဓလီုတိဍာ်ဂှ် စကာဇြဟတ် ထ္ပက်ကၠုၚ်ကရောၚ်ပၞာန်တုဲ မွဲဒမြိပ်ဂၠံၚ်ကွဳစက် မြဝတဳ−ဝဝ်လေဝ် တွဵုရးကရေၚ်ဂှ် ပေါဲဗ္တိုက်ၜါလ္ပာ် သာတုဲသ္ကာတ်မြဟ်ကၠုၚ်မာန်ရောၚ်ဂှ် ညးဒုၚ်တာလျိုၚ် လလောၚ်ပရိုၚ် ကရောၚ်ပၞာန် ကဝ်ဗရာတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
မွဲဒမြိပ်ဂၠံၚ်ကွဳစက် မြဝတဳ−ဝဝ်လေဝ်ဂှ် စနူဂိတုဂျူလာၚ် (၇) တုဲကၠုၚ်တေံတုဲ ဒပ်ကံၚ်ဇြဳပၞာန် သွက်ဂွံအုပ်ဓလီုတိဍာ်မာန်ဂှ် လုပ်စိုပ်ၜက်ၜေတ်ကၠုၚ် နကဵုဇြဟတ်ဒပ်ဗွဲမဂၠိုၚ်ဂၠေၚ်ဂှ်ရ ပေါဲဗ္တိုက်ၜါလ္ပာ်တံ ဆက်က္တဵုဒှ်ဒၟံၚ်ရ။
အခိၚ်လၟုဟ်ဂှ် လ္ပာ်ကွာန်ယှိုဲအေမျာၚ်၊ ဥကယေတ်ထ ဗဒါဲဍုၚ်ဝဝ်လေဝ်ဂှ် ကဵု ဒၞါဲ (သုံးထပ်ကွေ့ ) လ္တူဂၠံၚ်ကွဳစက် မြဝတဳ−ဝဝ်လေဝ် မဒှ်တိဍာ်ဒေသထိၚ်ဒဝ် ဒပ်မဟာ (၆) KNU ဂှ် ဒပ်သၟဝ်တဲကံၚ်ဇြဳပၞာန် ၝောံဒပ် (၄၄) က္ဍိုက်ပ်တုဲ ပွမလုပ်စိုပ်ချဳဒရာၚ် ပရေၚ်ပၞာန်တံဂှ် သာတုဲ ကၠောန်ၜိုတ်ဒၟံၚ်ရ။
စပ်ကဵုအကာဲအရာဏံတုဲ ညးဒုၚ်တာလျိုၚ် လလောၚ်ပရိုၚ် ကရောၚ်ပၞာန်ကဝ်ဗရာတံ ဟီုဂးလဝ် သာ်ဏံရ။
“ ဒပ်ကံၚ်ဇြဳပၞာန်ဂှ် မွဲဒမြိပ်ဂၠံၚ်ဇၞော်ဂှ် ၝောံဒပ် (၄၄) က္ဍိုက်ပ်တုဲ ထ္ပက်ဒၟံၚ်ကရောၚ်ပၞာန်ရ၊ ဟိုတ်ဂှ်ရ ပေါဲဗ္တိုက်တံ ဆက်သ္ကာတ်မြဟ်ကၠုၚ်မာန်ရောၚ်” သာ်ဝွံ သ္ဂးရ။
တုဲကၠုၚ် ပ္ဍဲဂိတုအဝ်ဂါတ် (၂) ဂှ်လေဝ် ဒၞါဲ (သုံးထပ်ကွေ့ ) ဂၠံၚ်ဇၞော်မြဝတဳ−ဝဝ်လေဝ်ဂှ် ကဵု ဒၞါဲမဆက်စပ်တံဂှ် ပေါဲဗ္တိုက်ၜါလ္ပာ်တံ က္တဵုဒှ်တုဲ ဒပ်ကံၚ်ဇြဳပၞာန် ကၠုၚ်စိုပ်ဂြာတ်လဝ်ဗမ် နကဵုက္ၜၚ်ကျာရ။
အပ္ဍဲကဵုပရေၚ်ဗ္တိုက် ကဵုက္ၜၚ်ကျာဂှ် ကောန်ဒပ်ကံၚ်ဇြဳပၞာန် ဇီုကပိုက်ချိုတ်အာတံ မၞုံဒၟံၚ်တုဲ ဇွကောန်ဒပ်ကံၚ်ဇြဳပၞာန် မချိုတ်အာတံဂှ် ကၠုၚ်စိုပ်ကပှ်ကေတ်လဝ် ဟွံမွဲဏီပုဟ်ဂှ် သ္ဂးရ။
ပ္ဍဲကဵုပေါဲဗ္တိုက် (သုံးထပ်ကွေ့ ) ဂၠံၚ်ကွဳစက် မြဝတဳ−ဝဝ်လေဝ် မလအ်ကၠုၚ် ဗဒါဲ (၁) ဂိတုပြၚ်ဂှ် လ္ပာ်ကံၚ်ဇြဳပၞာန် ဒၞါဲလဵုမှ သီဟွံမာန်လဝ်တုဲ တမ်ဒပ်တံ ၊ ကရောၚ်ပၞာန်တံ ဒဵုကဵုဗီုပြၚ် ယောၚ်ယာအာဂှ် ဂွံဝပ်ဇီုကပိုက်၊ ချိုတ်အာတံ၊ ဂြိပ်တိတ်အာတံ၊ သ္ပထောံ CDM တံ က္တဵုဒှ်ဒၟံၚ်ရောၚ်ဂှ် ကရောၚ်ပၞာန်ကဝ်ဗရာ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)