ရေဝ်၊ မာတ်ချ် (၇)
ပ္ဍဲတွဵုရးဍုၚ်မန်၊ ပွိုၚ်ဍုၚ်ရေဝ်၊ ကွာန်အံၚ်သာယာ ဂိတုမာတ်ချ် (၅) လဒေါဝ်တ္ၚဲဂှ် ဟိုတ်နူဒပ်ကံၚ်ဇြဳပၞာန် ပန်ပှော်လဝ်လွဟ်ဇၞော်တံဂှ်ရ မိနော်ဗျု အာယုက် ၇၈ မွဲတၠ ကလိဂွံအာဝပ်သ္ကာတ်မြဟ်တုဲ အကာဲအရာ ဒးဂွိၚ်ကဵုအန္တရာယ်လမျီု နွံဒၟံၚ်ရောၚ်ဂှ် ညးဒေသတံကဵု ဂကောံရီုဗၚ်ဟံၚ်ပြာ်ပရေၚ်မၞိဟ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမာတ် (၅) ၜိုတ် ၂ နာဍဳဂှ် ပေါဲဗ္တိုက်ဟွံမွဲမွဲသာ် နူကဵုဒပ်အမၠံက် စၟတ် (၃၁၇) ကံၚ်ဇြဳပၞာန် ဖျေံသ္ဇိုၚ်ဍုၚ်လၟိုၚ် ပန်ပှော်စုတ်လဝ်လွဟ်ဇၞော် (၄) မ ကြာန်န်ဂှ် လွဟ်ဇၞော်မွဲမ ဒတုံဗ္တိုဟ်ထ္ကးအာလဝ် ပ္ဍဲကွာန်အံၚ်သာယာရ။
ဟိုတ်နူမကမ်လွဟ်ဇၞော် နူဒပ်ကံၚ်ဇြဳပၞာန်တံ မပန်ပှော်လဝ်ဂှ် ဒတုံဗ္တိုဟ်ထ္ကးအာလဝ် လ္တူသ္ၚိဒၟံၚ် မၞုံဗ္ဒါဲဘာလကျာ် ကွာန်အံၚ်သာယာဂှ်ရ မိနော်ဗျု အာယုက် ၇၈ သၞာံမွဲတၠ ဗုၚ်အိက်ပြိုဟ်တိတ် ကလိဂွံလဝ်ဝပ်ရ။
နူကဵုဂကောံရီုဗၚ်ဟံၚ်ပြာ်ပရေၚ်မၞိဟ်တံ ပလံၚ်ဗစိုပ်ကဵုလဝ် မိနော်ဗျု မကလိဂွံလဝ်ဝပ်ဂှ် ပ္ဍဲကဵုရုၚ်ဂဥုဲညးဍုၚ်ကွာန်မတ်မလီုတုဲ အကာဲအရာ ဒးဂွိၚ်ကဵုအန္တရာယ်လမျီုတံနွံဒၟံၚ်ရောၚ်ဂှ် သ္ဂးရ။
မိနော်ဗျု မကလိဂွံလဝ်ဝပ်မကမ်လွဟ်ဇၞော်ဂှ်ဝွံ အခိၚ်မတိုန်စိုပ်လွဳလွတ်ဒၟံၚ် ပ္ဍဲရုၚ်ဂဥုဲမတ်မလီုဂှ် ချိုတ်အာလဝ်ရောၚ် ပရိုၚ်ဂမၠိုၚ် မံက်တိတ်ဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာ ဟွံမာန်ဏီရ။
ပ္ဍဲပွိုၚ်ဍုၚ်ရေဝ်ဂှ် အပ္ဍဲကာလဒပ်ပၞာန်သီလဝ်အဝဵုဂှ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တံဂှ်တုဲ ညးဍုၚ်ကွာန်ကောန်အရာပ် (၂) တၠ ချိုတ်အာလဝ်တုဲ ဟွံအောန်နူကဵု (၁၀) တၠ ကလိဂွံလဝ်ဝပ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)