လ္ဂုၚ်၊ မာတ်ချ် (၇)
ပ္ဍဲဍုၚ်ဗၟာ ကြဴနူပရေၚ်ဒပ်ပၞာန်သီအဝဵုတုဲ အပ္ဍဲသၞာံ ၂၀၂၃ လၟိဟ်မၞိဟ် ပိဂအုံမွဲဂအုံ ဗ္ဒါဲ (၁၇ ဒဿမ ၆) ပြကောဋိကိုဋ်ဂှ်ဝွံ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် ရုၚ်ပ္ညဳပ္ညပ် စပ်ကဵုပရေၚ်ဗ္စာရဏာမၞိဟ် ကုလသမဂ္ဂ UNOCHA လလောၚ်ပ္တိတ်လဝ် ပ္ဍဲဂိတုမာတ်ချ် (၅) တေံရ။
အတိုၚ်ဂလာန် UNOCHA ဂှ်မ္ဂး ပ္ဍဲကဵုလၟိဟ်မၞိဟ် (၁၇ ဒဿမ ၆) ပြကောဋိကိုဋ်ဂှ် အပံၚ်မၞိဟ် (၄ ဒဿမ ၅) ပြကောဋိကိုဋ်ဝွံ တၚ်နွံပၟိက်အရီုဗၚ် စပ်ကဵုပရေၚ်ဗ္စာရဏာမၞိဟ်တံ သၠုၚ်ဒၟံၚ်တုဲ နွံဒၟံၚ် ပ္ဍဲအကာဲအရာ ဒးကဵုက္ဍိုပ်ထံက်ပၚ်တံရောၚ်ဂှ်တုဲ ညးတံဝွံ ဒှ်ဒေသကွာန်ရး က္တဵုဒှ်ဒၟံၚ် ပဋိပက္ခတံဏောၚ်ဂှ် သ္ဂးလဝ်ရ။
သွက်ညးဍုၚ်ကွာန်ဍုၚ်ဗၟာ မနွံဒၟံၚ်ပၟိက် အရီုဗၚ်တံဂှ် နွံပၟိက်ဒၟံၚ် သြန်ဗွဝ်စပ်ကဵုပရေၚ်ဗ္စာရဏာမၞိဟ်တံ အမေရိကာန်ဒဝ်ဠာ (၇၆၄) ပြကောဋိကိုဋ်တုဲ ပ္ဍဲအရာရီုဗၚ်ကဵုညးတံဂှ်လေဝ် ဒၟါနူသၞောဝ်ပ္တိုန်စရၚ်ဂကောံဗော်သွး ကံၚ်ဇြဳပၞာန်တံဂှ်တုဲ အရာမစဵုဒၞါဂမၠိုၚ် နွံဒၟံၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပ္ဍဲသၞာံ ၂၀၂၃ အပ္ဍဲၜါဂိတုကၠာဂှ် ဟိုတ်နူပဋိပက္ခပရေၚ်ပၞာန် ကရောံပေါဲဗ္တိုက်တံဂှ်တုဲ အပံၚ်မၞိဟ် (၁၅၀၀၀၀) ပြၚ် ဒးဂြိပ်ဒဴထောံလသာဒၟံၚ်ဌာန်ဒၟံၚ်တုဲ ကြဴနူဒပ်ပၞာန်သီအဝဵုတုဲ ညးဒဒိုက်ပါဲဒဴဘဲပၞာန် မ္ဒးဂြိပ်ဒဴ ထောံလသာသ္ၚိဌာန်တံဂှ် နွံကၠုၚ် စဵုကဵု (၁ ဒဿမ ၆) ပြကောဋိကိုဋ်ရောၚ် ရဴဝွံ သ္ဂးလဝ်ရ။
သ္အာၚ်နူဂှ်ပၠန် ပ္ဍဲကဵုတွဵုရးကချေၚ် လ္ပာ်ဒိုဟ်အဂၞဲ ကေုာံ ဒိုဟ်ဗာယပ်တံဂှ် ပေါဲဗ္တိုက်ဂမၠိုၚ် ဆက်က္တဵုဒှ်ဒၟံၚ် ဗွဲမသ္ကာတ်မြဟ်တုဲ ဟိုတ်နူပရေၚ်ကၟာတ်လဒဵု နူကဵုကံၚ်ဇြဳပၞာန် သီုကဵုအန္တရာယ်လမျီုတံဂှ်ရ သ္ကဵုလဇုဲလဇကၠေံ လ္တူကမၠောန်စပ်ကဵုရေၚ်ဗ္စာရဏာမၞိဟ်တံဂှ် လလောၚ်ပ္တိတ်လဝ်ရ။
တၚ်နွံပၟိက် စပ်ကဵုပရေၚ်ဗ္စာရဏာမၞိဟ် အလုံကၟိန်ဍုၚ်တံ သၠုၚ်တိုန်ကၠုၚ်ကီုလေဝ် ဟိုတ်နူကံၚ်ဇြဳပၞာန် လလောၚ်တြးလဝ် ပရေၚ်အုပ်ဓုပ်ပၞာန် ကုပွိုၚ်ဍုၚ် (၄၇) ပွိုၚ်ဍုၚ် မၞုံရးဒေသ ကေုာံ တွဵုရးဗွဲမဂၠိုၚ်ဂၠေၚ်တံဂှ်ရ သွက်ဂွံရီုဗၚ်ဂှ် ဒးဒှ်ဒၟံၚ်အရာဟွံချိုတ်ပၠိုတ်တံရောၚ်ဂှ် ဂွံတီကေတ် အတိုၚ်တၚ်လလောၚ်တြး UNOCHA ရ။
ပရိုၚ်−သြၚ်လောန်တိုၚ်(မ်)