မတ်မလီု၊ မာတ်ချ် (၈)
နကဵုကမၠောန်ပရေၚ်ပိုန်ဒြပ် အဇာဍောတ်၊ အဇာလဒေါဝ် MSMEs မၞုံအပ္ဍဲတွဵုရးဍုၚ်မန်တံ ဒေသမွဲ သွက်ဂွံကၠောန်ပ္တိတ် ဗၞိက်ပ္တိတ်မွဲဂှ်ကဵု ပ္ဍဲအရာကၠောန်ပ္တိတ် ကပေါတ်ဗၞိက်တံဂှ် ဒဵုကဵုပလံၚ်ပ္တိတ်ဍုၚ်သ္အာၚ်မာန် သွက်ဂွံရေၚ်တၠုၚ်အိုတ်ဂှ် ကံၚ်ဇြဳပၞာန် ဟီုဂးကၠုၚ်ရ။
ကံၚ်ဇြဳပၞာန်ဝွံ ပ္ဍဲကဵုပွိုၚ်ဍုၚ်လ္ၚဵု မၞုံအပ္ဍဲတွဵုရးဂှ် ကၠောန်သ္ပဒၟံၚ် ဝိုၚ်သဳကၠဳတက်ကျာ MSMEs အေဂျေန်ဇြဳဖောအ်ဗြေတ်တောတက် ကမၠောန်အဇာဍောတ်၊ အဇာလဒေါဝ်တံ အဆက်က်တုဲ ပ္တိတ်ဇြဟတ်ဂ္စါန်ကၠုၚ် သွက်ပရေၚ်ဖောအ်ဗြေဝ် ကဏ္ဍ MSMEs မဒးဂိဒၟံၚ်တံရ။
နူဂိတုဂျာန္နဝါရဳ စဵုကဵုဂိတုမာတ်ချ် အပ္ဍဲပွိုၚ် (၃) ဂိတုဏံ ပ္ဍဲကဵုမတ်မလီု၊ ၜါသွာၚ်၊ မုဟ်ဍုၚ် ကေုာံ ပွိုၚ်ဍုၚ်ဇြပ်ဗုတံဂှ် ကၠောန်သ္ပလဝ် ဝိုၚ်သဳကၠဳတက်ကျာ MSMEs တံတုဲ ကောန်ဂကောံကံၚ်ဇြဳပၞာန် တွဵုရးဍုၚ်မန်တံကဵု တၠကမၠောန်ပရေၚ်ပိုန်ဒြပ်တံ တိုန်စိုပ်သဳကၠဳလဝ်ရ။
ပ္ဍဲဝိုၚ်သဳကၠဳတက်ကျာတံဂှ် သဳကၠဳလဝ် စပ်ကဵုကဏ္ဍကမၠောန်ပုဂ္ဂလိက၊ ပရေၚ်ဖောအ်ဗြေဝ် တမ်ရိုဟ်မၞိဟ်၊ ကမၠောန်တိုက်သြန်၊ အခေါန်ဖလှာ၊ ပရေၚ်သ္ဂောံဂွံဗွဝ်ဖျာ၊ ပရေၚ်ဖောအ်ဗြေဝ်တောတက်နဲပညာ၊ ပရေၚ်ဓလိုက်တမ်ရိုဟ်၊ တိဗ္ၚ၊ ကမၠောန်ကွတ်စက် MSMEs၊ ဗၞိက်တိတ်နူ ပရေၚ်လွဳတိရစ္ဆာန် ကေုာံ ပရေၚ်တဵုလွဳတံရောၚ်ဂှ် သ္ဂးရ။
အခိၚ်လၟုဟ်ဂှ် ဒပ်ကံၚ်ဇြဳပၞာန်ဝွံ ဟိုတ်နူပရေၚ်သီအဝဵုတုဲ ကမၠောန် MSMEs မဒးဂိလဝ်ဂမၠိုၚ် သွက်သ္ဂောံရေၚ်တၠုၚ် ပရေၚ်ဖောအ်ဗြေဝ်တံကဵု သွက်ဂွံကၠောန်ပ္တိတ် ကပေါတ်ဗၞိက်ဂမၠိုၚ် ဒဵုကဵုဍုၚ်သ္အာၚ်မာန်ဂှ်တုဲ ၜိုန်ရကၠောန်သ္ပဒၟံၚ် ပေါဲဟီုတွံတံ၊ ပေါဲသဳကၠဳတံကီုလေဝ် ပၟတ်ဓာတ်လလဳရဂှ် ညံၚ်ဂွံရုမ်ဂပ် ကဵုဟွံမာန်ဏီရ။
တၠကမၠောန်ပရေၚ်ပိုန်ဒြပ်အဇာဍောတ်မွဲတၠဂှ် ဟိုတ်နူပၟတ်ဓာတ်လလဳဟွံမှာန်ကီု၊ ၚုဟ်ဖျာက္ဍၚ်ကီု ကေုာံ ဟိုတ်နူအခက်အခုဲ ကောန်ကလောန်အောန်ကီုတံဂှ်တုဲ ကမၠောန် MSME ဂမၠိုၚ် သွက်ဂွံဆက်ဒတူလိုၚ်ဂှ် ဒးဂဗဒၟံၚ်အခက်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပိုယ်တံဂှ် အဓိကဒးသုၚ်စောဲ ပၟတ်ဓာတ်လလဳတုဲ ဒးကၠောန်ဒၟံၚ်ဂှ်ရ ပၟတ်ဟွံကၠုၚ်တုဲ ဒးပလေဝ်ပၟတ်စက်ရ။ တုဲတှ်ေ ပရေၚ်ဍုၚ်ကွာန်ဂှ် အကာဲအရာဟွံခိုဟ်ပုဟ်။ ဟိုတ်နူကဵုသြန်ဖောဝ်ဒၟံၚ် အိုတ်ဍာ်ဂှ်ရ ကောန်ကလောန်နွံဒၟံၚ်အဏံတံ တိတ်အာ ဍုၚ်သ္အာၚ်အိုတ်တုဲ ပြသၞာကောန်ကလောန်အောန်တံ နွံရ။ တုဲပၠန် ပြသၞာဟွံဂွံပၟတ်ဓာတ်လလဳ ရုမ်မ်ဂပ်ပ်တံ နွံရ။ တုဲပၠန် ဟိုတ်နူၚုဟ်ဖျာတိုန်တုဲ ဗၞိက်အပြောံဂမၠိုၚ် ၚုဟ်ဗက်တိုန်အိုတ်ရ။ ပ္ဍဲပိုယ်တံဂှ် ဒှ်အာဒဵုကဵုပရဲဟွံသှ်ေတံလေဝ် နွံရ။ အဓိက အခက်အခုဲ (၃) သာ်ဏံရ” သာ်ဝွံ ညးသ္ဂးရ။
ပ္ဍဲဍုၚ်ဗၟာဂှ် ကြဴနူဒပ်ပၞာန်သီအဝဵုတုဲ ပၟတ်ဓာတ်လလဳပိုတ်ပၠိုတ် ဒှ်ဒၟံၚ်အဆက်က်တုဲ ကလိဂွံဇြဟတ်ဓာတ်လလဳဂှ်ဝွံ ပ္ဍဲ (၂၄) နာဍဳဂှ် ပွဳပွူ (၅) နာဍဳရဟေၚ် ကလိဂွံတုဲ ဗလးကဵုဒၟံၚ်ဇြဟတ်ဓာတ် နကဵုသၞောတ်ဒးအလန်ရ။
ကမၠောန် MSMEs တံဝွံ အပ္ဍဲကာလဒပ်ပၞာန်သီအဝဵုဂှ် ဟိုတ်နူပၟတ်ဓာတ်လလဳဟွံမှာန်ကီု၊ ၚုဟ်ဗၞိက်အပြောံ သၠုၚ်တိုန်ဒၟံၚ် ဂၠိုၚ်ကဵုဆကီု၊ ခရိတ်အိုတ်ပရေၚ်ပလံၚ်ဗစိုပ်တံကဵု ခရိတ်အိုတ်နာနာတံ ဇၞော်သၠုၚ်ဂှ်ရ ကမၠောန်ဂမၠိုၚ် သွက်ဂွံဂေတ်ဂြိပ်ဂှ် ဒးရုန်ဂ္စါန်ဒၟံၚ်တၟာလှ်ေရ။
အလုံမွဲကၟိန်ဍုၚ် ပၞောဝ်ကဵုကမၠောန် မပ္တိုန်လဝ်စရၚ် အတိုၚ်သၞောဝ်ကမၠောန်ကွတ်စက်ပုဂ္ဂလိကတံဂှ် ကမၠောန် မကိတ်ညဳကဵု တၚ်နွံပၟိက် ကမၠောန် MSME တံဂှ် နွံဒၟံၚ် (၄၅၀၀၀) ပြၚ်တုဲ ကမၠောန်မပ္တိုန်လဝ်စရၚ် ပ္ဍဲကဵုဌာနဝန်ဇၞော်တၞဟ်သ္အာၚ်တံဂှ် နွံဒၟံၚ် (၂၅၀၀၀၀) ပြၚ်ရ။
ဆ္ဂး ဒၟါနူကဵုသြန်ဗၟာဖောဝ် မဒှ်ဖဵုအဆက်လက္ကရဴ ပရေၚ်သီအဝဵုတံဂှ်တုဲ သီုကဵုကၠေၚ်စက်ကီု သီုကဵုဘဲဒဏ်ၚုဟ်ဖျာက္ဍၚ်တံကီုဂှ်ရ ကမၠောန် MSME တံဝွံ စိုပ်ဒၟံၚ်ကဆံၚ်ယိုပ်ယာကၠုၚ်ဟွံမာန်ရ။
ပရိုၚ်−သြၚ်လောန်တိုၚ်(မ်)