မတ်မလီု၊ မာတ်ချ် (၈)
ထံၚ်စာတ်အိုဝ်ဗိုဝ် မၞုံပ္ဍဲပွိုၚ်ဍုၚ်အံၚ်မျေတာသာန်၊ ရးဒေသဇၞော်မာန္တလေဝ်ဂှ်ဝွံ ပၞောဝ်ကဵုထံၚ်စာတ် မၞုံဍုၚ်ဗၟာတံဂှ် ဒှ်ကၠုၚ်ထံၚ်ဝးပ္ကဝ်အခေါၚ်အရာမၞိဟ်ဂၠိုၚ်အိုတ်တုဲ ကောန်ထံၚ်ပရေၚ်ဍုၚ်ကွာန်ဂမၠိုၚ် ဒးဒုၚ်ဍဵုဍိုက်ပျဲပျာံဒၟံၚ် ပရေံအိုတ်ရောၚ်ဂှ် ညးရေၚ်တၠုၚ်ဂဗုတ် စပ်ကဵုအခေါၚ်အရာမၞိဟ်ဂမၠိုၚ် ကေုာံ ကောန်သ္ၚိကၟိန်ဂမၠိုၚ် ဟီုဂးလဝ်ရ။
တုဲကၠုၚ် ပ္ဍဲဂိတုဖေဖဝ်ဝါရဳ (၃) ကဵု (၄) တေံဂှ် လၟေၚ်ဒဒှ်သၞာဲဒဴထံၚ်အိုဝ်ဗိုဝ်ဂမၠိုၚ် ပကီုပရာပ်ၜုၚ်တက် ကောန်ထံၚ်ပရေၚ်ဍုၚ်ကွာန်တံ က္တဵုဒှ်လဝ်တုဲ သွက်လၟေၚ်ဒဒှ်ဏံဂှ် ကမ္မတဳပ္ညဳပ္ညပ်ဆက်စၠောံ ဇြဟတ်ညးဍုၚ်ကွာန် ဒစဵုဒစးသၞောတ်တၠအဝဵု−မာန္တလေဝ် (AFCC-Mdy) ဟီုလဝ် ပ္ဍဲကဵုပေါဲသောၚ်ကလးလိက်ပရိုၚ် မကၠောန်ဗဒှ်လဝ် ပ္ဍဲဂိတုမာတ် (၇) ဂှ် သာ်ဏံရ။
ညးရေၚ်တၠုၚ်ဂဗုတ် စပ်ကဵုအခေါၚ်အရာမၞိဟ်မွဲတၠ ဒဝ်အာန်နာဂှ် ထံၚ်အိုဝ်ဗိုဝ်ဝွံ ကြဴနူဒပ်ပၞာန်သီအဝဵုတုဲ ဒှ်ကၠုၚ်ထံၚ်စာတ်ပျဲပျာံဂၠိုၚ်အိုတ် ကေုာံ ဓဇန်ကြမ်ကြအိုတ်မွဲတုဲ အကာဲအရာပရေံကၠုၚ် ဒဵုကဵုဟွံကဵုအခေါၚ်ပလံၚ်ဏာနၚ် စၞစ သွက်ကောန်ထံၚ်ပရေၚ်ဍုၚ်ကွာန်တံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ထံၚ်အိုဝ်ဗိုဝ်ဟီုဂှ် ဒှ်ထံၚ်ဓဇန်အိုတ်၊ ပျဲပျာံဂၠိုၚ်အိုတ် ကေုာံ ဒှ်ထံၚ်ဟွံကဵုတီပရိုၚ်ဂၠိုၚ်အိုတ်ရ။ ဒှ်ထံၚ်ဒးဒုၚ်ဝးပ္ကဝ်အခေါၚ်အရာမၞိဟ်ပေၚ်ၚ်ရ။ ပ္ဍဲကဵုလၟေၚ်ဒဒှ်ထံၚ်အိုဝ်ဗိုဝ်ဂှ်ဟီုမ္ဂး ဗွဲမဂၠိုၚ်ဂှ် ဒှ်ညးဒးဒုၚ်ဖျေံလဝ်ထံၚ်တုဲ တုဲ ဟွံဂွံအခေါၚ်ဆဵု ကုညးရေၚ်တၠုၚ်ဂဗုတ်တံရ။ ဒှ်ဒၟံၚ်အကာဲအရာ ဂွံရီုဗၚ်ကဵုဂှ် ဝါတ်ဂါတ်ဒၟံၚ်ရ” သာ်ဝွံ ဒဝ်အာန်နာ မဒှ်ညးရေၚ်တၠုၚ်ဂဗုတ် စပ်ကဵုအခေါၚ်အရာမၞိဟ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
လၟေၚ်ဒဒှ်ၜုၚ်တက်ပကီုပရာပ် မက္တဵုဒှ်လဝ် အပ္ဍဲထံၚ်စာတ်အိုဝ်ဗိုဝ်ဂှ်ဝွံ အပ္ဍဲထံၚ်စာတ်ဂှ် ဒစးဒုၚ်ဟွံကဵုသမ္တီမွဲသာ် စပ်ကဵုကိစ္စအခိၚ်ဟုံဍာ်ပြံၚ်လှာဲအာဂှ်တုဲ ကောန်ထံၚ်ပရေၚ်ဍုၚ်ကွာန်ဗြဴမွဲတၠကဵု သၞာဲဒဴထံၚ်စာတ်ဗြဴဗြဴမွဲတၠတံ နူကဵုအရေဝ်ဂၠိုၚ်ဒှ်သၞဂှ် ဇၞော်ထံၚ်စာတ်တံကဵု သၞာဲဒဴဂမၠိုၚ် ဟိုတ်ဟွံမွဲမွဲသာ် လုပ်စိုပ်ၜုၚ်တက်လဝ် ကောန်ထံၚ်မၞုံဒၟံၚ် ပ္ဍဲအချုက်၊ ပ္ဍဲဗ္ဒမ်ဒးမံၚ်ထံၚ်ပါလုပ်ကီု သီုကဵုပ္ဍဲဗ္ဒမ်ရုၚ်ဂဥုဲတံ နကဵုဇြဟတ်လၟိဟ် ဗွဲမဂၠိုၚ်ဂၠေၚ်ရ။
ပ္ဍဲကဵုလၟေၚ်ဒဒှ်ဏံဂှ် ကုကောန်ထံၚ် မကလိဂွံလဝ်ဝပ်ဇီုကပိုက်တံဂှ် ဟွံကဵုအခေါၚ်လွဳမွဲသာ် မ္ၚးနူကၟာတ်တိုက်၊ ပြံၚ်ထံၚ်တံဂှ် သီုကဵုဟွံကဵုဟုံဍာ်၊ ဗ္စပုၚ်မွဲဗ္ဂါပ်ဓဝ်တံ၊ ထပိုတ်လဝ်သီုကဵုဍာ်သုၚ်တံဂှ်ရ ဒးသုၚ်စောဲဒၟံၚ် ဍာ်သ္ၚိဍာ်သၟးရဂှ် ဂွံတီကေတ်ရ။
ကြဴနူလၟေၚ်ဒဒှ် ၜုၚ်တက်ပကီုပရာပ်ဂှ်တုဲ ကုရဲသ္ၚိကၟိန် ညးဗြဴကောန်ထံၚ် မပြံၚ်ထောံလဝ်ထံၚ်တံဂှ်လေဝ် ဒဒှ်ရပြံၚ်ထံၚ်ဂှ် လဴပ္တီကဵုလဝ်ဟွံမွဲတုဲ အခိၚ်ကၠုၚ်စိုပ်ဂၠိုက်ဂၠါဲဂှ်လေဝ် ထံၚ်မပြံၚ်လဝ်ဂှ် အခေါၚ်တီဟွံမွဲပုဟ်ဂှ် ညးမဒှ်မိ ညးဗြဴကောန်ထံၚ်ပရေၚ်ဍုၚ်ကွာန်ဂှ်မွဲတၠ ဟီုရ။
“ကောန်ဝုတ်ပိုယ် ကလိဂွံဝပ် ၜဝ်မုဟ်ကဝ်ရ။ အခိၚ်နူဂယး (၃) နာဍဳဂှ် ပ္တိုန်လ္တူကွဳစက်ကာတုဲ ပြံၚ်လဝ်ထံၚ်ဂှ် ဂွံတီကေတ်ရ။ ဟွံဂွံဒုၚ်လွဳလွတ် ခိုဟ်ဟ်ပုဟ်။ သုၚ်စောဲဍာ်သ္ၚိဍာ်တုဲ ဒးမံၚ်ဒၟံၚ်ရ။ ဒးဒုၚ်ပလံၚ် ပ္ဍဲဗ္ဒမ်ဒုဟ်ဒဏ်။ ပြံၚ်လဝ်ထံၚ် ထံၚ်လဵုရောဟီုဂှ် ဂၠိုက်ဂၠါဲဟွံဂွံပုဟ်။ ကောန်ဝုတ်အဲ ဒးဒုၚ်ဇြေဟ်ကဵုၜုန်။ နကဵုအကာဲအရာ ဒးဂွိၚ်တဴအန္တရာယ်လမျီုတံရ” ဂှ် မိယာဲ ညးဗြဴကောန်ထံၚ်ပရေၚ်ဍုၚ်ကွာန်ဂှ် ဟီုလဴထ္ၜးလဝ်ရ။
စပ်ကဵုအကာဲအရာ ကောန်ထံၚ်ပရေၚ်ဍုၚ်ကွာန် ပ္ဍဲထံၚ်အိုဝ်ဗိုဝ်တံ ဒးဒုၚ်ၜုၚ်တက်ပကီုပရာပ်ဂှ်တုဲ အာတ်လဝ်အရီုဗၚ် ဇရေၚ်ကမ္မတဳဇိုၚ်ခ္ဍာ်ဍုၚ်နာနာတံရောၚ်ဂှ် ညးရေၚ်တၠုၚ်ဂဗုတ် စပ်ကဵုအခေါၚ်အရာမၞိဟ်ဂမၠိုၚ် သ္ဂးရ။
ဌာနဝန်ဇၞော်အခေါၚ်အရာမၞိဟ် အလဵုအသဳညဳသၟဟ်ဂကူ NUG ဂှ် ပ္ဍဲကဵုလၟေၚ်ဒဒှ် ဒးဒုၚ်ပကီုပရာပ်ၜုၚ်တက် အပ္ဍဲထံၚ်စာတ်အိုဝ်ဗိုဝ်ဂှ် ညးဗြဴကောန်ထံၚ်ပရေၚ်ဍုၚ်ကွာန် (၁၀၀) ပြၚ် ဇီုကပိုက်ကလိဂွံလဝ်ဝပ်တုဲ (၂၁) တၠ ကလိဂွံလဝ်ဝပ်သ္ကာတ်မြဟ်ဂှ် တုဲကၠုၚ်ဂိတုဖေဖဝ်ဝါရဳ (၁၂) တေံ လလောၚ်ပ္တိတ်လဝ်ရ။
ပ္ဍဲကဵုလၟေၚ်ဒဒှ်ပကီုပရာပ်ၜုၚ်တက် မက္တဵုဒှ်လဝ် အပ္ဍဲထံၚ်အိုဝ်ဗိုဝ်ဂှ် ညးရေၚ်တၠုၚ်ဂဗုတ် မရီုဗၚ်ရေၚ်တၠုၚ်ကဵုဒၟံၚ် ကောန်ထံၚ်ပရေၚ်ဍုၚ်ကွာန် (၂) တၠဂှ် ရပ်ဒက်လဝ်တုဲ မွဲကရောံကဵုညးတံဂှ် ကောန်ထံၚ်ပရေၚ်ဍုၚ်ကွာန်မွဲတၠလေဝ် ပလံၚ်ဗစိုပ်လဝ် ဒၞါဲစၟဳတ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)