ဂျာကာတာ၊ မာတ်ချ် (၈)
ဍုၚ်အေန်ဒိုဝ်နဳယှာ ပ္ဍဲဒေသနာကျူနာဂှ် ပ္ဍဲဂိတုမာတ် (၇) ဂှ် ဗြဲဂူရိုပ်က္တဵုဒှ်လဝ်တုဲ ဟိုတ်နူတိလာ်တုဲ အောန်အိုတ် မၞိဟ် (၁၁) တၠချိုတ်လဝ်တုဲ မၞိဟ်ဂၠိုၚ်ကဵုဒါဇြိန် ဒဒှ်ရကၠေံဒၟံၚ်ဂှ် အေဂျေန်ဇြဳ ပရေၚ်ဖအောန်ဖျေံဘဲအန္တရာယ်ကၟိန်ဍုၚ်ဂှ် ဟီုရ။
ချိၚ်ခယျကေတ်ဂှ် မၞိဟ် (၁၁) တၠချိုတ်လဝ်တုဲ (၅၀) ပြၚ် ကၠေံဒၟံၚ်ရောၚ် သၞာဲဒဴစပ်ကဵုဘဲအန္တရာယ်မွဲတၠ ဟီုလဝ်ကဵု Kompas TV မဒှ်လာၚ်ထဳဝဳ အပ္ဍဲဒေသမွဲဂှ်ရ။
သ္အာၚ်နူဂှ်ပၠန် ညးဇၞော်ဘဲအန္တရာယ် မၞုံခရိုၚ်ဒေသန္တရ တ္ကအ်ရဳအာ မွဲတၠဂှ် ဒမြိပ်ချိုတ်တံ သၠုၚ်တိုန်မာန်တုဲ အကာဲအရာပရေၚ်ဆက်စၠောံ မၞုံအပ္ဍဲဨရိယာဂှ်တံလေဝ် ပရေံဒၟံၚ်ရောၚ်ဂှ် ဟီုရ။
“ ရာသဳဥတုဂှ် ပြံၚ်လှာဲအာယျ။ ကျာပိုက်ဂှ်တှ်ေ ထတ်မံၚ်ဖိုဟ်ရ။ လပှ်ဍာ်ဒဳတံဂှ်လေဝ် တိုန်ဒၟံၚ်ယျ” သာ်ဝွံ ညး ဆက်ဟီုဂးလဝ်ရ။
အတိုၚ်ဂလာန် အေဂျေန်ဇြဳ ပရေၚ်ဖအောန်ဖျေံဘဲအန္တရာယ်တံ ဟီုလဝ်ဂှ်မ္ဂး ကုညးမသှ်ေဂျိုၚ်တဴတံဂှ် ဆုဲပြံၚ်ကဵုလဝ် ဒၞါဲဗၠးဘဲတံတုဲ ပ္ဍဲဒၞါဲတံဏံဂှ်လေဝ် ဗလးလဝ် ဂကောံရီုဗၚ်ဟံၚ်ပြာ်မွဲဂကောံတုဲယျဂှ် ဂွံတီကေတ်ရ။
ပ္ဍဲကဵုဗီုဓာတ် နူအေဂျေန်ဇြဳ မလလောၚ်ပ္တိတ်လဝ်တံဂှ် အခိၚ်ဗြဲဂူရိုပ်ဒၟံၚ်ဂှ် တိပလေတ် တိခရီု မဂၠိုၚ်ဂၠေၚ်ဝွံ အုပ်ဓလီုအာ ကၟဳသ္ၚိတံကဵု တၞံဆုတံဂှ် ဂွံဆဵုကေတ်ရ။
ဒၞါဲဨရိယာတိလာ်လၟုဟ်ဂှ်ဝွံ က္တဵုဒှ်လဝ် ပ္ဍဲလ္တူတ္ကအ်ဌာန်ဇမ္ၚောဲ နူကဵုဍုၚ်ဇၞော်နာကျူနာ အေန်ဒိုဝ်နဳယှာဂှ်မ္ဂး ဒးအာစိုပ်ဍိုက်ကေတ်ဂၠုၚ် လလအ်ပွိုၚ် (၅) နာဍဳရ။
Ref; Reuters