သေတ်ဂါၚ်၊ မာတ်ချ်(၈)
ဟိုတ်နူဒပ်ကံၚ်ဇြဳပၞာန်သီအဝဵု ပ္တဝ်လဝ်ကဵု ကောန်အရာပ်ညးဍုၚ်ကွာန်တုဲ ဗတိုက်ပန်ပှ်ောဒၟံၚ်ကီု သီုကဵုလုပ်စိုပ်ဗတိုက်ပန်ပှော် ကွာန်၊ စံၚ်ဂစိုတ်လဝ်ဂျိုၚ်ဂျိုၚ်တအ်တုဲ ပ္ဍဲဂိတုဖေဖဝ်ဝါရဳ မွဲဂိတုဓဝ် ညးဗြဴ (၁၅)တၠ ဒးချိုတ်အာလဝ်ရဂှ် ဂကောံသမဂ္ဂညးဗြဴဗၟာ (BWU) လလောၚ်တြးလဝ်ရ။
အတိုၚ်တၚ်ဂၞၚ် ဂကောံသမဂ္ဂညးဗြဴဗၟာ လလောၚ်တြးလဝ် ပ္ဍဲဂိတုမာတ်ချ် စၟတ်တ္ၚဲ (၆)ဂှ်မ္ဂး ပ္ဍဲကဵုညးဗြဴ ဒးချိုတ်လဝ်တအ်ဂှ် နူရးသေတ်ဂါၚ် (၇)တၠ ဂၠိုၚ်အိုတ်ဒှ်တုဲ နူရးဗဂေါ (၃) တၠ၊ ပ္ဍဲကချေၚ်၊ ကရေၚ်၊ ချေၚ်၊ တၞၚ်သဳ ကေုာံရးမဂွေတအ်ဂှ် ပါလုပ်ဒၟံၚ် မွဲမွဲတၠဇဳရ။
ညးဗြဴဒးချိုတ်လဝ် (၈) တၠတအ်ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော် ပ္ဍဲကွာန် ဒးချိုတ်လဝ်တုဲ ညးဗြဴနူရးသေတ်ဂါၚ် (၃)တၠဂှ်မ္ဂး စံၚ်ဂစိုတ်လဝ်ဂျိုၚ်ၚ် ဃောဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်ရ။
ကံၚ်ဇြဳပၞာန်ဂှ် ပ္ဍဲဒေသပရေၚ်ပၠန်ဂတး ဇြဟတ်ခိုဟ်ဒၟံၚ်ဂှ် ထ္ပက်ကရောၚ်ပၞာန်တုဲ စံၚ်ပလီုဒၟံၚ်သ္ၚိဌာန်ညးဍုၚ်ကွာန်ကီု၊ ရပ်ဒက်ဏာ ကောန်အရာပ်ညးဍုၚ်ကွာန်တုဲ ပြိုက်ဂစိုတ်ဒၟံၚ်ကီု မပ္တံဗီုဏံ ပရေၚ်ဖံက်ပ္ကဝ်အခေါၚ်အရာမၞိဟ် နွံဒၟံၚ်ဗွဲမဂၠိုၚ်ရဂှ် တမ်ရိုဟ်တၚ်ဂၞၚ်ပရိုၚ် သ္ဇိုၚ်ဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကၟိန်ဍုၚ်ဂှ် ဟိုတ်နူဒှ်အကာဲအရာပကတိဟွံသေၚ်တုဲ ပ္ဍဲအာယုက်ကာလကာတၟေၚ် ကံၚ်ဇြဳပၞာန် ထပ်ကေတ်ဂလိုၚ်လဝ် ပွိုၚ်(၆)ဂိတု ပ္ဍဲဂိတုပထမ (ဖေဖဝ်ဝါရဳ) ဟေၚ်ဂှ် ပရေၚ်ညးဗြဴ ဒးဒုၚ်ရပ်ဒက်လေဝ် ဂၠိုၚ်တိုန်ဒၟံၚ်တီတီရ။
အတိုၚ်စရၚ်သမဂ္ဂညးဗြဴဗၟာ (BWU) မ္ဂး ပ္ဍဲပွိုၚ်ဂိတုဖေဖဝ်ဝါရဳ တုဲကၠုၚ်မွဲဂိတုဓဝ်ဂှ် ဒပ်ကံၚ်ဇြဳပၞာန် ရပ်ဒက်လဝ်ညးဗြဴ (၃၅)တၠ နူကဵုရးဒေသဇၞော် (၅)ကေုာံ (၂) တွဵုရး ဟွံဗဗွဲကဵုဓဝ်တုဲ ပ္ဍဲရးဒေသအၚ်ဝ (၁၅)တၠ ဒှ်ဒၟံၚ်ဂၠိုၚ်အိုတ်ရ။
ညးဒးဒုၚ်ရပ်လဝ် ဗွဲမဂၠိုၚ်တအ်ဂှ် ဟိုတ်နူချူတြး လိက်ဒစဵုဒစးကဵု ဒပ်ပၞာန် ကေုာံပွံၚ်အဖဝ်ဍေံတအ် ပ္ဍဲမုက်လိက်ဇာနှိက်ပရေၚ်မၞိဟ်တုဲ ဒးဒုၚ်ရပ်ဒက်လဝ်ရဂှ် သမဂ္ဂညးဗြဴဗၟာ (BWU) သ္ဂးလဝ်ရ။
အလုံမွဲကၟိန်ဍုၚ် နူကဵုအခိၚ်သီအဝဵုတုဲ စဵုကဵုလၟုဟ်ဏံ အပံၚ်လၟိဟ်ညးဗြဴ ဒးဒုၚ်ရပ်လဝ် (၃၁၀၀) ပြၚ် နွံကၠုၚ်တုဲ ပ္ဍဲကဵုဂှ် ညးဗြဴ(၅၇၀)တၠ ကံၚ်ဇြဳပၞာန် ဖျေံလဝ်ဒုဟ်ဒဏ် ဟွံဗဗွဲကဵုဓဝ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- MOBYE