မတ်မလီု၊ မာတ်ချ် (၉)
ပ္ဍဲတွဵုရးဍုၚ်မန် ပ္ဍဲကဵုညးမပ္တိုန်လဝ်စရၚ် သွက်ဂွံသှ်လိက်တန်လုပ်တက္ကသိုလ် သၞာံဗ္တောန်ပညာဏံ ကံၚ်ဇြဳပၞာန် မကၠောန်ဗဒှ်ဂှ် ဗ္ဒါဲ (၉၃) တၟံကၠံ ကၠုၚ်စိုပ်သှ်လဝ်လိက်ဂှ် ဂွံတီကေတ် အတိုၚ်တၚ်နၚ် ရုၚ်သ္ကိုပ်ပရေၚ်ပညာတွဵုရးရ။
ညးမပ္တိုန်လဝ်စရၚ် သွက်ဂွံသှ်လိက်တန်လုပ်တက္ကသိုလ် အပ္ဍဲတွဵုရးဂှ် နွံဒၟံၚ် (၆၀၀၀) ပြၚ်တုဲ ပ္ဍဲကဵုဂှ် ဗ္ဒါဲ (၅၈၀၀) ကၠုၚ်စိုပ်သှ်လဝ်တုဲ ညးမလီုအာဂှ် ၄၅၂ တၠ နွံလဝ်ရ။
ဟိုတ်နူညးမသှ်လိက်တန်လုပ်တက္ကသိုလ် အောန်စှ်ေအာဂှ်ရ အလုံမွဲတွဵုရးဂှ် ပံက်လဝ်ဌာနစၟဳတ်လိက် ၂၃ ဓဝ်ရတုဲ ဒးပံၚ်ဘာတုဲ သှ်လဝ်ရ။
လ္ပာ်ကံၚ်ဇြဳပၞာန် ပတေၚ်ဂြတ်လဝ် ပရေၚ်ဂီုကၠီု ကုဘာဗ္တောန်လိက် မသှ်တန်လုပ်တက္ကသိုလ်တံဂှ်တုဲ ဂၠံၚ်လ္ၚဵုတံဂှ်လေဝ် ကၠောန်သ္ပကၟာတ်လဝ်ယာယဳရ။
ပ္ဍဲတွဵုရးဍုၚ်မန်ဂှ် တုဲကၠုၚ်သၞာံ ၂၀၁၉ တေံ မၞိဟ်သှ်လိက်တန်လုပ်တက္ကသိုလ် ဗ္ဒါဲ (၂၉၀၀၀) ၊ ပ္ဍဲသၞာံ ၂၀၂၀ ဂှ် (၃၀၀၀၀) ပြၚ် နွံလဝ်ရ။
ပေါဲသၟာန်သှ်လိက် တန်လုပ်တက္ကသိုလ် သၞာံ ၂၀၂၃ ဏံဂှ်ဝွံ ကၠောန်ဗဒှ်ကဵုလဝ် အလန်လက္ကရဴအိုတ် ဒၟါနူကဵုမၞိဟ်မကျအာလဝ် ပ္ဍဲသၞာံ ၂၀၂၂ တေံဂှ်ကီု ဒၟါနူဟိုတ်နာနာတုဲ မၞိဟ်ဟွံဂွံကၠုၚ်စိုပ်သှ်လိက်တံဂှ်ကီု၊ သီုကဵုအပြံၚ်အလှာဲဇုတ်ဓရံၚ်လိက်သ္ဇိုၚ်ပရေၚ်ပညာတံကီု မဒှ်ရဂှ် ကံၚ်ဇြဳပၞာန် လလောၚ်ပ္တိတ်လဝ်ရ။
ပ္ဍဲဍုၚ်ဗၟာဂှ် ကၠာဒပ်ပၞာန်ဟွံဂွံသီအဝဵုတေံ လၟေၚ်သၞာံ မၞိဟ်ပ္တိုန်လဝ်စရၚ် သွက်ဂွံသှ်လိက်တန်လုပ်တက္ကသိုလ် နူကဵုနွံလဝ် (၉) ကိုဋ်ပြၚ်ဂှ် ကြဴနူဒပ်ပၞာန်သီအဝဵုတုဲ မၞိဟ်လုပ်စိုပ်သှ်လိက်တန်လုပ်တက္ကသိုလ်ဂှ် ယအ်စှ်ေအာ တီတီဒှ်ဒှ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်- MOI