နေဗျဳဒဝ်၊ မာတ်ချ် (၉)
ကံၚ်ဇြဳပၞာန်သီအဝဵု မထပ်ကေတ်လဝ် အာယုက်ကာလကာတၟေၚ်ကၟိန်ဍုၚ် (၆) ဂိတုပၠန်ဂှ် ကၠုၚ်စိုပ်သၞာံ ၂၀၂၄ ပ္ဍဲဂိတုအံက်တဝ်ဗာဏံ နကဵုဗ္ၜတ်အလုံကၟိန်ဍုၚ်ဂှ် ကံက်အာစရၚ်လၟိဟ်မၞိဟ် ကေုာံ ပရူပရာသ္ၚိကၟိန်တံ အလုံကၟိန်ဍုၚ်ဏောၚ်ဂှ် ဟီုဂးကၠုၚ်ရ။
အခိၚ်မကၠောန်ဗဒှ်လဝ် ပေါဲသဳကၠဳရုၚ်ကလောန် ညးမရပ်စပ်တၚ်နၚ် သွက်သ္ဂောံချူခၞံဗီုပြၚ်ခန်သၟာန် မသုၚ်စောဲအာ ပ္ဍဲအရာကံက်စရၚ်လၟိဟ်မၞိဟ်တံ ပ္ဍဲကဵုနေဗျဳဒဝ် ဂိတုမာတ်ချ် (၆) ဂှ် ဥူမျေတ်ကျိုၚ် ဝန်ဇၞော်ကၟိန်ဍုၚ်၊ ဌာနဝန်ဇၞော်ဇြဟတ်ညးဍုၚ်ကွာန် ကေုာံ ကောပ်ကာဲပရေၚ်မၞိဟ်လုပ်တိတ် ကံၚ်ဇြဳပၞာန် ဟီုဂးလဝ်ရ။
အခိၚ်ဗ္ၜတ်ကံက်စရၚ်လၟိဟ်မၞိဟ်ဂှ် စၟတ်လဝ် သၞာံ ၂၀၂၄ ဂိတုသေပ်တေမ်ဗာ ၃၀ အခိၚ်သ္ဂာဗ္တံတုဲ တ္ၚဲယးဂတ ဂိတုအံက်တဝ်ဗာ (၁) စဵုကဵု (၁၅) လလအ်ပွိုၚ် (၁၅) တ္ၚဲ ကံက်အာဏောၚ်ဂှ် သ္ဂးရ။
အခိၚ်လၟုဟ်ဂှ် ရေၚ်တၠုၚ်ဒၟံၚ် မပ္တံကဵုဒစးဒုၚ်ပလေဝ်ပလေတ် သွက်စရၚ်လၟိဟ်မၞိဟ်တံ၊ ချူခၞံစရၚ် ကေုာံ လလောၚ်ပ္တိတ်လိက်ဒုၚ်စဳရေၚ်တံဂှ်တုဲ လၟေၚ်ကမၠောန်ကံက်စရၚ်လၟိဟ်မၞိဟ် သၞာံကၠုၚ်စိုပ်ဏံဂှ် ရေၚ်တၠုၚ်အာ နကဵုလၟေၚ်ကမၠောန် (၄) သာ် နူကဵုသၞာံ ၂၀၂၁ ဂိတုအံက်တဝ်ဗာ စဵုကဵုသၞာံ ၂၀၂၆ ဂိတုမာတ် လလအ်ပွိုၚ် (၅၄) ဂိတုရောၚ်ဂှ် သ္ဂးလဝ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် ရံၚ်ကဵုတၚ်နၚ်တံဏံတုဲ နကဵုကံၚ်ဇြဳပၞာန် သွက်ဂွံကၠောန်ဗဒှ်ပေါဲရုဲမာဲမာန် ဟိုတ်နူဒးဆေၚ်ဒၟံၚ်မုက် ကုအကာဲအရာဟွံချိုတ်ပၠိုတ်တံဂှ်ရ သွက်ဂွံကၠောန်ဗဒှ်ပေါဲရုဲမာဲ အလုံမွဲကၟိန်ဍုၚ် အပ္ဍဲသၞာံဏံ မွဲဒမြိပ်ဓဝ်ဂှ် သ္ဇက်ဂွံဒှ်မာန်ဟွံမွဲပုဟ်ဂှ် ပါ်ပါဲလဝ်ရ။
“သွက်ဂွံကၠောန်ဗဒှ်ပေါဲရုဲမာဲ အပ္ဍဲသၞာံဏံမာန် ဍေံတံ(စကစ) ဟိုတ်နူဒးဆေၚ်ဒၟံၚ်မုက် ကုအကာဲအရာဟွံချိုတ်ပၠိုတ်တံဂှ်ရ ၜိုတ်ကိစ္စကံက်စရၚ်မာဲဏံရဂှ် ဒးကဵုလဝ်အခိၚ် ဗၞတ်ပန်သၞာံရ။ ဟိုတ်ဂှ်ရ ပေါဲရုဲမာဲ ဍေံတံမချပ်လဝ်ဂှ်တှ်ေ သၞာံ ၂၀၂၃ ဏံ အလုံမွဲကၟိန်ဍုၚ် မွဲဒမြိပ်ဓဝ် သ္ဇက်ဂွံဒှ်မာန်ဟွံမွဲပုဟ်။ အကာအရာဏံဂှ် ညံၚ်ရဴဒုၚ်လဝ်ဝန်ကီု လၟုဟ်ဂှ် ပရေၚ်ကံက်စရၚ်မာဲ၊ ကံၚ်စရၚ်လၟိဟ်မၞိဟ်တံဂှ် ကေတ်အခိၚ် ဒဵုကဵုၜိုတ်ဏံတုဲ ချဳဒရာၚ်ဏောၚ်ဂှ် ဍေံတံ လလောၚ်တြးထောံရ” သာ်ဝွံ ညးသ္ဂးရ။
တုဲကၠုၚ် ပ္ဍဲဂိတုဖေဖဝ်ဝါရဳ (၂၃) တေံ ပ္ဍဲကောံဓရီုကံၚ်ဇြဳပၞာန်ဂှ်လေဝ် က္ဍိုပ်သ္ကိုပ်ပၞာန်ဂှ် ညံၚ်တၚ်နၚ်ဂွံဍာံပြ ဒဒှ်ရနွံပၟိက် ဒးကလေၚ်ကံက်စရၚ်လၟိဟ်မၞိဟ်အလုံဍုၚ်ဂှ်ကဵု ယဝ်ရကလေၚ်ကံက်မာန်မှဟေၚ် စရၚ်မာဲဒးမာန်ရောၚ်ဂှ် သ္ဂးလဝ်ရ။
နကဵုကံၚ်ဇြဳပၞာန် ပ္ဍဲကဵုဂိတုဂျူလာၚ်အိုတ်ဏံ အာယုက်ကာလကာတၟေၚ် မပပဵုပ္တိုလဝ်လၟုဟ် (၆) ဂိတုဏံအိုတ်ဂှ် ကၟိန်ဍုၚ်ဝွံ ယဝ်ရဟွံဒှ်အကာဲအရာသာမညမ္ဂး ယဝ်ရကၠောန်ပေါဲရုဲမာဲဟွံမာန်မ္ဂး ဂၠံၚ်ဍာန်တၞဟ်သ္အာၚ် သ္ဂောံဆက်ကေတ်အဝဵုမာန်တံဂှ် ဆက်ကၠောန်ၜိုတ်ကၠုၚ်မာန်ဏောၚ် သာ်ဝွံ ညးခါတ်အကာဲပရေၚ်ဍုၚ်ကွာန်တံ သ္ၚဳဂၠိပ်လဝ်တံလေဝ် နွံဒၟံၚ်ရ။
ပ္ဍဲပရေၚ်ကံက်စရၚ် ပၞောဝ်ကဵုလၟေၚ်ကမၠောန်စရၚ်လၟိဟ်မၞိဟ် ကေုာံ ပရူပရာသ္ၚိကၟိန် မကေတ်လဝ်အခိၚ်ပန်သၞာံဂှ် သုၚ်စောဲသၞောတ် မကံက်ကေတ်မၞိဟ်မွဲကုမွဲ အထံက်အရီုကောန်ပျူတာဂှ်တုဲ ညးကံက်စရၚ်တံဂှ် တိုန်မွဲသ္ၚိစှ်ေမွဲသ္ၚိ ကံက်အာ နကဵု Mobile Tablet တံဏောၚ်ဂှ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
အတိုၚ်ပွမခယျတော်ဆ မဒုၚ်လဝ်သ္ဇိုၚ် ကုလၟိဟ်မၞိဟ် မကံက်လဝ် နူကဵုစရၚ်လၟိဟ်မၞိဟ် ကေုာံ ပရူပရာသ္ၚိကၟိန် သၞာံ ၂၀၁၄ တေံဂှ်မ္ဂး ဒဵုကဵုသၞာံ ၂၀၂၂ ဂိတုအံက်တဝ်ဗာဂှ် ပ္ဍဲကၟိန်ဍုၚ်ဗၟာ လၟိဟ်မၞိဟ်ချိၚ်ခယျကေတ် (၅၅ ဒဿမ ၈) ပြကောဋိကိုဋ်နွံဂှ် ကံၚ်ဇြဳပၞာန် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်- ဗီုရုပ်တြေံ