ကျံက်တလုၚ်၊ မာတ်ချ် (၉)
ဒပ်ကံၚ်ဇြဳပၞာန် ဇြဟတ်ဒပ်မအောန်စှ်ေကၠုၚ်ဂှ်ဝွံ သွက်သၞောတ်တၠအဝဵုပၞာန် ဂွံဂျိုၚ်တဴဂှ် ဂ္စါန်ကၠုၚ် သွက်ဂွံရပ်စပ် ပၞာန်ညးဍုၚ်ကွာန်ပအိုဝ်တံ ပ္ဍဲကဵုပေါဲဗ္တိုက်တံဂှ် ဂကောံဇြဟတ်ပၠန်ဂတးပအိုဝ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
က္ဍိုပ်သ္ကိုပ်ပၞာန်သီအဝဵုဝွံ တုဲကၠုၚ်ပ္ဍဲဂိတုမာတ်ချ် (၇) အခိၚ်နူဂယးတေံ အာစိုပ်ဆဵုဂဗလဝ်ကဵု ဂကောံပၞာန်ညးဍုၚ်ကွာန်ပအိုဝ် PNO/PNA တံရ။
က္ဍိုပ်သ္ကိုပ်ပၞာန်ဂှ် ကၠုၚ်စိုပ်လဝ် သ္ၚိဒၟံၚ် ဥူအံၚ်ခါမ်ထဳ မသ္ပဒတဴဒၟံၚ် ပ္ဍဲပွိုၚ်ဍုၚ်ကျံက်တလုၚ် ဒေသဂွံအခေါၚ်အုပ်ဓုပ်အပိုၚ်ပအိုဝ် သ္ကုတ်သၠုၚ်ကျာတွဵုရးသေံဇၞော်ဂှ် နကဵုက္ၜၚ်ကျာသၞေၚ်ဝဲ (၂) ဖ္ဍိုက်တုဲ ဆဵုဂဗလဝ်ရ။
စပ်ကဵုပရေၚ်ဆဵုဂဗဏံတုဲ သီုကဵုၜါလ္ပာ်ဂှ် လလောၚ်တြးလဝ် မွဲမွဲသာ်ဟွံမွဲကီုလေဝ် ကြဴနူဆဵုဂဗကဵုက္ဍိုပ်သ္ကိုပ်ပၞာန်တုဲ ပ္ဍဲဂိတုမာတ်ချ် (၇) ဇိုၚ်သဝ်တ္ၚဲဂှ် သၟတ်ပအိုဝ်ဂမၠိုၚ် သွက်ဂွံလုပ်ယိုက်ဂၠေၚ်ပၞာန် ပ္ဍဲကဵုပၞာန်ညးဍုၚ်ကွာန်ပအိုဝ် PNO/PNA တံဂှ်ကဵု ညးဟွံယိုက်ဂၠေၚ်လျိုၚ်ပၞာန်တံဝွံ ဒှ်ညးစိုတ်ဓာတ်ဆာန်ဂကူဟွံမွဲတံရောၚ်ဂှ် ပၞာန်ညးဍုၚ်ကွာန်ပအိုဝ် PNO/PNA လလောၚ်ပ္တိတ်လဝ် နကဵုဘာသာပအိုဝ်ရ။
ဥက္ကဌ ကံၚ်ဇြဳဖေဝ်ဒရာကောန်ဂကူ PNFC ဃောန်မျေတ်ထောန်ဂှ် က္ဍိုပ်သ္ကိုပ်ပၞာန်သီအဝဵု ကၠုၚ်စိုပ်ဆဵုဂဗ ကုဂကောံ PNO/PNA ပၞာန်ညးဍုၚ်ကွာန်ပအိုဝ်တံဂှ်ဝွံ သွက်ဂွံရပ်စပ်စကာ ပၞာန်ညးဍုၚ်ကွာန်ပအိုဝ် ပ္ဍဲကဵုပေါဲဗ္တိုက်တံဂှ်ကဵု သွက်ဂွံဗပေၚ်ဇြဟတ် ပ္ဍဲကဵုဒၞါဲဇြဟတ်ဒပ်ကံၚ်ဇြဳပၞာန် မအောန်စှ်ေကၠုၚ်တံဂှ်တုဲ ပ္တိတ်ဇြဟတ်ဂ္စါန်ကၠုၚ်ရဂှ် ဟီုရ။
“အခိၚ်အခါတ္ၚဲဏံဂှ် ဇြဟတ်ပၞာန် သွက်ကံၚ်ဇြဳပၞာန်ဂှ် မွဲတ္ၚဲတုဲမွဲတ္ၚဲ အောန်စှ်ေကၠုၚ်ရ။ ဇြဟတ်ပၞာန်တံ အောန်စှ်ေကၠုၚ်သာ်ဏံဗက် နူကဵုဂကောံရပ်လွဟ်ကောန်ဍုၚ်အရၚ်ပိုယ်တံဏံ ၜိုတ်သုၚ်စောဲဂွံဂှ် သုၚ်စောဲတုဲတှ်ေ ဍေံဂှ် ထ္ပက်အဇာတွဵုဏောၚ်။ ဗွဲတၟေၚ် ပ္ဍဲကဵုသၠုၚ်ကျာရးသေံ ပိုယ်တံဂှ်လေဝ် ကံၚ်ဇြဳပၞာန်ဂှ် ထ္ပက်အဇာကဵု ဂကောံပၞာန်ညးဍုၚ်ကွာန် သၟဝ်တဲဍေံတံဂှ်တုဲ ကၠောန်အာပွစဵုဒၞါတံရောၚ်” ဂှ် သ္ဂးလဝ်ရ။
သ္အာၚ်နူဂှ်ပၠန် နကဵုပၞာန်ညးဍုၚ်ကွာန်ပအိုဝ် PNO/PNA တံ သွက်ဂွံကလေၚ်သ္ၚဳဂၠိပ်ကဵု ဒဒှ်ရဒပ်ကံၚ်ဇြဳပၞာန် ရပ်စပ်ဒၟံၚ်ညးဍုၚ်ကွာန်ပအိုဝ်တံ နဒဒှ်ဇွောံစဵုဒၞါပၞာန်ဂှ်ကီု၊ ပါ်ထ္ကးဆီကဵုဒှ်သၞ အကြာကောန်ဍုၚ်အရၚ်ရေၚ်သ္ကအ် သီုကဵုပါလုပ်ဂကူပအိုဝ်တံဂှ်ကီု၊ သွက်ဂွံရပ်စပ်စကာ ပ္ဍဲပေါဲဗ္တိုက်ဂမၠိုၚ် ပရေၚ်ပ္တိတ်ဇြဟတ်ဂ္စါန်ကၠုၚ်ဂှ်ကဵု ညံၚ်ဂွိုအ်ပံၚ်တောဲရေၚ်တၠုၚ် ကုကံၚ်ဇြဳပၞာန်ဂှ် ဃောန်မျေတ်ထောန် ဖ္တိုက်ဖ္အောဝ်လဝ်ရ။
တုဲကၠုၚ် ပ္ဍဲဂိတုမာတ်အခိၚ်ပြဟ်ဟ်တေံဂှ်လေဝ် ပ္ဍဲကဵုပယျဵုသေံဇၞော်−ကရေၚ်ဍာဲတံဂှ် ပ္ဍဲပေါဲဗ္တိုက်ဆေၚ်မုက် ဒပ်ကံၚ်ဇြဳပၞာန်ကဵု ဒပ်စဵုဒၞါညးဍုၚ်ကွာန်တံဂှ် ဟိုတ်နူ PNA လုပ်စိုပ်ဗ္တိုက်ကဵုလဝ် လ္ပာ်ကံၚ်ဇြဳပၞာန်တံဂှ်ရ ၜိုတ် (၁၅) တၠ ချိုတ်အာလဝ်တုဲ ကောန်သ္ၚိကၟိန် ညးမချိုတ်အာတံ ၜိုန်ရကၠောန်သ္ပစဳဇန်လဝ် သွက်ဂွံကဵုဒါန်ဖာပ်သၚ်တံကီုလေဝ် PNA ဟွံကဵုလဝ်အခေါၚ်ပုဟ်ဂှ် ပရိုၚ်အပ္ဍဲဒေသတံ သ္ဂးလဝ်ရ။
ကောန်သ္ဂံၚ်ပအိုဝ် မပါလုပ်လဝ် ပ္ဍဲပၠန်ဂတးက္ညၚ်မွဲတၠဂှ် ပၞာန်ညးဍုၚ်ကွာန်ပအိုဝ် PNO/PNA ဝွံ နူစအခိၚ်ဒပ်ပၞာန်သီအဝဵုတေံရ အတိုၚ်ပၟိက်ကံၚ်ဇြဳပၞာန်ဂှ် ရပ်ဒက်ညးဍုၚ်ကွာန်ထ္ၜးဆန္ဒဂမၠိုၚ် ကေုာံ ပံၚ်တောဲလဝ်ကဵုသၞတံဂှ်ရ ဗ္တိုက်ပ္တိတ်အာ ညံၚ်ရဴသၞတံကီုရောၚ်ဂှ် ဟီုရ။
“အခိၚ်စသီအဝဵုတေံ အခိၚ်ပိုယ်တံထ္ၜးဆန္ဒတံဂှ်လေဝ် ပံၚ်တောဲကဵုကံၚ်ဇြဳပၞာန်တုဲ ကၠောန်သ္ပလၞိန်ပပိန်ပကီုပရာပ်တံရ။ ပ္ဍဲကဵုရးသေံပိုယ်တံဂှ်လေဝ် အလဵုဍေံတံ ဗက်ရပ်ဒက်တံ၊ ဗက်ရပ်ဒက် အပ္ဍဲဒေသပအိုဝ်တံနွံရ။ ပပ္တံနူဂှ်တုဲ ပိုယ်တံဂှ် ပံၚ်ကဵုသၞမ္ဂး သၞရဏောၚ်။ ယဝ်ရပါကၠုၚ် လ္ပာ်ညးဍုၚ်ကွာန်တံဂှ်မ္ဂး ပိုယ်တံဂှ် စၟတ်အာညံၚ်ရဴမိဿဟာဲတုဲ ဟီုဂးဆက်ဆောံတုဲ ကၠောန်သ္ပညံၚ်ရဴပရေၚ်ပ္ညဳပ္ညပ်တံ ဂွံဏောၚ်။ အတိုၚ်အကာဲအရာလၟုဟ်မ္ဂး ဒှ်ဒၟံၚ်သၞတုဲ ဟိုတ်နူပံၚ်ဒၟံၚ်ကဵုသၞတံဂှ်ရ စွံစိုတ်ညံၚ်ရဴသၞတုဲ ဒးဗ္တိုက်အာဏောၚ်။”
ဂကောံပၞာန်ညးဍုၚ်ကွာန်ပအိုဝ် မၞိဟ်တီဂၠိုၚ် ဂကောံ PNA ဂှ် ပ္ဍဲသၞာံ ၁၉၄၉ တေံ စဒက်ပ္တန်လဝ်တုဲ ဒှ်ဂကောံရပ်လွဟ် ဌာန်ဂအုပ်ကောန်ဂကူပအိုဝ်မွဲတုဲ ပ္ဍဲသၞာံ ၁၉၉၁ ဂိတုဨပရဴ (၁၁) ဂှ် ထ္ပက်စၟတ်တဲဒေါအ်ပန်ပှော် ကုအလဵုအသဳပၞာန်တုဲ ကေတ်လဝ်ပရေၚ်ၜိုဟ်လလမ်ရ။
ဗွဲကြဴဂှ် နကဵုပၞာန်ညးဍုၚ်ကွာန် မပြံၚ်လဝ်ဗီုပြၚ်ဂှ် ဆက်ဒတူလိုၚ်လဝ်တုဲ မွဲလ္ပာ်ပၠန်ဂှ်လေဝ် နကဵုဗီုပြၚ်ဗော်ပရေၚ်ဍုၚ်ကွာန်ဂှ် လုပ်စိုပ်ပြိုၚ်ပ္ကာန်လဝ် ပ္ဍဲပေါဲရုဲမာဲတံရ။
စပ်ကဵုပရူပရာ က္ဍိုပ်သ္ကိုပ်ပၞာန် ကၠုၚ်စိုပ်ဆဵုဂဗဂှ်ကီု သီုကဵုတၚ်ဒတူလိုၚ် ပၞာန်ညးဍုၚ်ကွာန်ပအိုဝ် PNO/PNA တံဂှ်တုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံလဝ် ညးမၞုံတာလျိုၚ် PNA တံ နကဵုဖုၚ်ကီုလေဝ် ဒုၚ်တဲသှ်လဝ်ဂှ် ဟွံမွဲရ။
ပရိုၚ်−သြၚ်လောန်တိုၚ်(မ်)