နေပျဳဒဝ်၊ မာတ်ချ်(၉)
ဗော်ပရေၚ်ဍုၚ်ကွာန် ပတိုန်လဝ်စရၚ် အခေါၚ်ဒက်ပ္တန်ဗော် ကေုာံအခေါၚ်စၟတ်သမ္တီဗော် ပ္ဍဲကဝ်မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန် စဵု(၁၇)ဗော် နွံကၠုၚ်ရဂှ် လလောၚ်တြးလဝ် ပ္ဍဲကဵုလိက်ပရိုၚ်တြးဝါဒ ကံၚ်ဇြဳပၞာန်ရ။
ဗော်ပရေၚ်ဍုၚ်ကွာန် ဂရၚ်အာတ်မိက်လဝ် အခေါၚ်ဒက်ပ္တန်ဗော် အတိုၚ်သၞောဝ်ဒက်ပ္တန် ဗော်ပရေၚ်ဍုၚ်ကွာန်ကံၚ်ဇြဳပၞာန် ၝောံပိုဒ် (၃)ဂှ် (၆)ဗော် ကေုာံ ဗော်ဂရၚ်အာတ်မိက်လဝ် အခေါၚ်ဆက်ဒက်ပ္တန်ဗော် အတိုၚ်ၝောံပိုဒ် (၂၅) ၁၁ ဗော်နွံဒၟံၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဗော်ပရေၚ်ဍုၚ်ကွာန် စန္ဒက်အလုံကၟိန်ဍုၚ် (၅)ဗော် ကေုာံ ဗော်စန္ဒက် ပ္ဍဲရးသေဇၞော် ဟွံသေၚ်မ္ဂးပ္ဍဲတွဵုရး မွဲမွဲဟေၚ်ဂှ် ဒှ်(၁၂)ဗော်တုဲ သွက်ဂွံသ္ပကဵုအခေါၚ်ဒက်ပ္တန်ဗော် ကုဗော်ဂမၠိုၚ်ဂှ် ကဝ်မယှေန်ပေါဲရုဲမာဲကၟိန်ဍုၚ် ဆက်စၟဳစၟတ်ဒၟံၚ်ရဂှ် ဂွံတီကေတ်ရ။
အတိုၚ်သၞောဝ်ပတိုန်စၟတ်သမ္တီ ဗော်ပရေၚ်ဍုၚ်ကွာန်ဂှ် လလောၚ်တြးလဝ် နဲသၞောဝ်ဥပဒေတုဲ ပ္ဍဲပွိုၚ်(၆၀)တ္ၚဲ ယဝ်ရဟွံပတိုန် စရၚ်စၟတ်သမ္တီမ္ဂး နူကဵုဒဒှ်ဗော်ပရေၚ်ဍုၚ်ကွာန် ဒးလီုလာ်အာ အလဵုလဵုရောၚ်ဂှ် ဓမံက်ထ္ၜးလဝ်ရ။
အခေါၚ်ဒက်ပ္တန်ဗော် ကေုာံအခေါၚ်ဂရၚ်ပ္တီအခေါၚ်ဂှ် စတမ်နူ ဂိတုဖေဖဝ်ဝါရဳ စၟတ်တ္ၚဲ(၁)တုဲ ဂရၚ်ပ္တီအာတ်မိက် ဇရေၚ်ကဝ်မယှေန်ပေါဲရုဲမာဲကၟိန်ဍုၚ်မာန်ရောၚ်ဂှ် လလောၚ်တြးလဝ်တုဲ သွက်ဂွံဒက်ပ္တန်ဗော် ကေုာံသွက်ဂွံပတိုန်စရၚ်စၟတ်သမ္တီ သှ်ေဒၟံၚ်(၂၅)တ္ၚဲဟေၚ်ရ။
အတိုၚ်တၚ်ဂၞၚ်ကဝ်မယှေန်ပေါဲရုဲမာဲကၟိန်ဍုၚ်ကံၚ်ဇြဳပၞာန်မ္ဂး ဗော်ပရေၚ်ဍုၚ်ကွာန် နွံပြာကတ်ဒၟံၚ် စဵုကဵု(၉၀)ဗော်နွံတုဲ ပ္ဍဲကဵုဂှ် ဗော်ပရေၚ်ဍုၚ်ကွာန် ကောန်ဍုၚ်အရၚ်ဂမၠိုၚ် ၜိုန်ရနွံဒၟံၚ်ဂၠိုၚ်အိုတ်ကီုလေဝ် ကြဴနူကံၚ်ဇြဳပၞာန် ပျးဌာန်ကၠုၚ် သၞောဝ်ဥပဒေပတိုန်စရၚ်စၟတ်သမ္တီတုဲ စဵုကဵုတ္ၚဲဏံ ဗော်ပရေၚ်ဍုၚ်ကွာန်ကောန်ဍုၚ်အရၚ် ကလေၚ်ပတိုန်စရၚ်စၟတ်သမ္တီဗော်ဂှ် နွံဆအယာံမာတ် ညိညဓဝ်ဟေၚ်ရ။
ဗော်ပရေၚ်ဍုၚ်ကွာန် ဂရၚ်ပ္တီအာတ်မိက်လဝ် အခေါၚ်ဒက်ပ္တန်ဗော် ကေုာံအခေါၚ်ပ္တိုန်စရၚ်စၟတ်သမ္တီဗော်တအ်ဂှ်မ္ဂး ဒှ်ဗော်ကျာန်ခိုၚ်ယျေ ဒပ်ပၞာန်စဵုဒၞာကဵုလဝ်လကြဴဂှ်ကီု၊ ဗော်ဖေတ်ဒရေဝ်ဒဳမဝ်ကရေတ်တေတ်ကီု၊ ဗော်ဒဳမဝ်ကရေဇြဳကၟိန်ဍုၚ်ပံၚ်ကောံကီု၊ ဗော်ဒဳမဝ်ကရေတေတ်ကၟိန်ဍုၚ်ဗၟာကီု၊ ဗော်လေဗာ ဂကောံဇြဟတ်ဒဳမဝ်ကရေတ်တေတ်ကီု၊ ဗော်ညဳသၟဟ်ကောန်ဍုၚ်အရၚ်ကီု၊ ဗော်ကွးဘာဒတုဲဖိုလ်ညးဍုကွာန်ကီု၊ ဗော်ဒဳမဝ်ကရေဇြဳကောန်ဂကူ(တၟိ)ကီု၊ ဗော်ဇြဟတ်ညးဍုၚ်ကွာန်ကီု၊ ဗော်ဝံသာနု ကေုာံဗော်ဒဳမဝ်ကရေတ်တေတ်တအ်ရ။
သ္အာၚ်နူဂှ်ပၠန် ဗော်ကောန်ဂကူပအိုဝ် (PNO)၊ ဗော်ဒဳမဝ်ကရေဇြဳ တၟိ (ချေၚ်)၊ ဗော်ဒဳမဝ်ကရေတ်တေတ်ဖလုံသဝဝ်၊ ဗော်ပၠတရဴရခေၚ်၊ ဗော်ဒဳမဝ်ကရေဇြဳကောန်ဂကူသေံဂမၠိုၚ် ကေုာံဗော်ညးဍုက်ကွာန် တွဵုရးကချေၚ်တအ် ပါလုပ်အိုတ်ရ။
ပရိုၚ်-သြၚ်လောန်တိုၚ်(မ်)