တၞၚ်သဳ၊ မာတ်ချ် (၁၀)
ပပ္တံနူဂိတုမာတ်ချ် (၈) တုဲ ဒပ်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန် အပ္ဍဲပွိုၚ်ဍုၚ်တၞၚ်သဳ၊ ရးဒေသဇၞော်တၞၚ်သဳ မလောၚ်တြးလဝ် ပရေၚ်အုပ်ဓုပ်ပၞာန်ဂှ် နကဵုဇြဟတ်ဒပ် ၂၀၀ ပြၚ်ရောၚ် ဂွံတီကေတ် နူကဵုဂကောံဒပ်စဵုဒၞါညးဍုၚ်ကွာန်တံရ။
ဒပ်ကံၚ်ဇြဳပၞာန်ဝွံ လုပ်စိုပ်ထ္ပက်ကၠုၚ်ကရောၚ်ပၞာန် လ္ပာ်ကွာန်ချံၚ်လမု၊ တုၚ်ဗျဝ် ကေုာံ ဗောဓိကာန်၊ ပွိုၚ်ဍုၚ်တၞၚ်သဳ ဂကောံဒပ်စဵုဒၞါညးဍုၚ်ကွာန် PDF တံ မအုပ်ဓလီုလဝ်ဂှ်ရ။
ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန်ဂှ်ဝွံ မွဲဒမြိပ်ဂၠံၚ်ဇက်တိုန်ဂှ် ပန်ပှော်လွဟ်ဇၞော် လုပ်စိုပ်ကၠုၚ်တုဲ ကၠောန်သ္ပဂၠိုက်ဂၠါဲဒၟံၚ် ကောန်ဂကောံဒပ်စဵုဒၞါညးဍုၚ်ကွာန် PDF တံစေအ်အ်ရ။
ဒပ်ကံၚ်ဇြဳပၞာန် ထ္ပက်လဝ်ကရောၚ်ပၞာန်ဂှ်ရ ပေါဲဗ္တိုက်ၜါလ္ပာ် ၜိုန်ရက္တဵုဒှ်ဟွံမွဲဏီကီုလေဝ် ပရေၚ်ပၞာန် သာကြံၚ်မ္ၚိုဟ်ကၠုၚ်တုဲ အကာဲအရာပေါဲဗ္တိုက် သ္ကာတ်မြဟ်ကၠုၚ်တံ နွံဒၟံၚ်ဂှ် ညးမၞုံတာလျိုၚ် ဂကောံဒပ်ဒမၠုက်ဟွံဗက်လ္ပာ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် ထ္ပက်လဝ်ကရောၚ်ပၞာန်ဂှ်ရ ညးဍုၚ်ကွာန်ဒေသလ္ၚဵု ဒစးဒုၚ်ဂြိပ်ဒဴပါဲဒလေတ်တံ နွံဒၟံၚ်တုဲ ညးဒေသလ္ၚဵုတံဂှ် အောပ်မာပ္ဍဲဒၞါဲတံတုဲ ဒးမၚ်ရံၚ်ဒၟံၚ် အကာဲအရာတံရောၚ်ဂှ် ဂွံတီကေတ် ဇရေၚ်ညးဒေသတံရ။
တုဲကၠုၚ် ဂိတုမာတ်ချ် (၇) တေံဂှ်လေဝ် ပ္ဍဲဗ္ဒါဲကွာန်ဍာ်ဗု ပွိုၚ်ဍုၚ်တၞၚ်သဳဂှ် အကြာဒပ်ကံၚ်ဇြဳပၞာန်ကဵု ဂကောံဒပ်ပံၚ်ကောံပၠန်ဂတးတံ က္တဵုဒှ်လဝ်ပေါဲဗ္တိုက်တုဲ လ္ပာ်ကံၚ်ဇြဳပၞာန် (၅) တၠချိုတ်တုဲ (၂) တၠ ကလိဂွံလဝ်ဝပ်ရ။
အတိုၚ်ဂလာန် ဂကောံသုတေသန Southern Monitor ဂှ်မ္ဂး ပ္ဍဲဂိတုဖေဖဝ်ဝါရဳတုဲကၠုၚ်တေံ မွဲဂိတုဓဝ် ပ္ဍဲရးဒေသဇၞော်တၞၚ်သဳဂှ် ပေါဲဗ္တိုက်အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ က္တဵုဒှ်လဝ် (၃၇) ဝါရောၚ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)