နေဗျဳဒဝ်၊ မာတ်ချ် (၁၀)
ဂကောံဒေါအ်ပန်ပှော် မထ္ပက်လဝ်စၟတ်တဲ ပ္ဍဲလိက်ကသုက် NCA (၇) ဂကောံဂှ်ဝွံ သွက်ဂွံသဳကၠဳဗွဲပလး ကုကမ္မတဳပ္ညဳပ္ညပ် ထ္မံက်ရုပ်ရဴပရေၚ်ၜိုဟ်လလမ် (NSPNC) ဗွဲပလးမာန် ဂ္စါန်ဒၟံၚ်ဂှ် ညးမၞုံအခေါၚ်ဟီုဂး ဂကောံဒေါအ်ပန်ပှော် (၇) ဂကောံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံရပ်လွဟ်ကောန်ဍုၚ်အရၚ် (EAOs) (၇) ဂကောံ မထ္ပက်လဝ်စၟတ်တဲ ပ္ဍဲလိက်ကသုက် ဒေါအ်ပန်ပှော်အလုံဍုၚ် (NCA) တံဂှ်ဝွံ တိုန်စိုပ်သဳကၠဳလဝ် ပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန် မကော်ဘိက်ဂှ် (၃) ဝါတုဲ အခါလၟုဟ်ဂှ် သွက်ဂွံဆဵုဂဗဗွဲပလးဂှ် ထပ်ဂ္စါန်ကၠုၚ်ရ။
သွက်သ္ဂောံဂွံအခေါၚ်ဆဵုဂဗ ကုကမ္မတဳပ္ညဳပ္ညပ် ထ္မံက်ရုပ်ရဴပရေၚ်ၜိုဟ်လလမ် ကံၚ်ဇြဳပၞာန် (NSPNC) ဂှ်လေဝ် ဒက်ပ္တန်လဝ် ဂကောံပ္ညဳပ္ညပ်သဳကၠဳဗွဲပလး ဂကောံဒေါအ်ပန်ပှော် (၇) ဂကောံရ။
ညးမၞုံအခေါၚ်ဟီုဂး ဂကောံဒေါအ်ပန်ပှော် (၇) ဂကောံ သ္ကိုပ်ဗိုလ်ဇၞော် သဝ်ကျဝ်ညောအ်ဂှ် ညံၚ်ဂွံကၠောန် ပေါဲသဳကၠဳက္ဍိုပ်သ္ကိုပ်ကဆံၚ်လ္တူတံ ဗွဲမလုပ်သၞောဝ်မာန် သွက်ဂွံဒှ်အကာဲအရာ သီုၜါလ္ပာ်ပါလုပ်ဆေၚ်စပ်ဂှ် နူကဵုဂကောံပ္ညဳပ္ညပ်တံ ကၠောန်သ္ပဒၟံၚ် ဒစးဒုၚ်ပ္ညဳပ္ညပ် ဗွဲပလးတံရောၚ်ဂှ် သ္ဂးရ။
နကဵုဂကောံဒေါအ်ပန်ပှော် (၇) ဂကောံ သွက်ဂွံဆဵုဂဗသဳကၠဳဗွဲပလး အပ္ဍဲဂိတုမာတ်ဏံမာန်ဂှ် စၟဳစလဝ်တုဲ တန်တဴကဵု လ္တူပွမဒ္ဂေတ်ဗက်ရေၚ်တၠုၚ် သီုၜါလ္ပာ်တံရောၚ်ဂှ် သ္ကိုပ်ဗိုလ်ဇၞော် သဝ်ကျဝ်ညောအ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဒၟါနူကဵုတန်တဴဒၟံၚ် လ္တူအကာဲအရာ နူကဵုသီုၜါလ္ပာ် အခိၚ်ဒှ်ဒဂူဂှ်ကီု၊ သီုၜါလ္ပာ် အခိၚ်ပြေပြံၚ်ဂှ်ကီု၊ သီုၜါလ္ပာ် ပွမဒ္ဂေတ်ဗက်ရေၚ်တၠုၚ် ဍိုန်န်ၜတ်တ်တံဂှ်ရ အပ္ဍဲဂိတုမာတ်ချ်ဏံ ဒှ်မာန်ဟာ၊ ဒှ်ဟွံမာန်ပုဟ်ဟာဟီုဂှ် တန်တဴအာ လ္တူပရေၚ်ဆဵုဂဗပ္ညဳပ္ညပ် ပိုယ်တံသီုၜါလ္ပာ်ဏောၚ်။ ပိုယ်တံဂှ်တှ်ေ တၚ်ရန်တၟံမွဲ ပွန်မွဲဂှ် စွံလဝ်ရ။ ညံၚ်ဂွံဒှ်မာန် သီုၜါလ္ပာ် ဒးဂ္စါန်ဘိုၚ်ရေၚ်တၠုၚ်ညးသ္ကအ်အိုတ်ဏောၚ်” သာ်ဝွံ ညးသ္ဂးရ။
သွက်ပရေၚ်ပ္ညဳပ္ညပ်ဗွဲပလးဂွံဒှ် အကြာဒပ်ကံၚ်ဇြဳပၞာန်ကဵု ဂကောံရပ်လွဟ် (၇) ဂကောံတံဂှ် နဒဒှ်ဍုက်ကေဝ်ဒဒှ်ေဒယှ် နူကဵုသီုၜါလ္ပာ် စကော်ဘိက်ကၠုၚ်တံနွံကီုလေဝ် ဒဵုကဵုကဆံၚ်ကလေၚ်ပရိုၚ် ဟွံမွဲဏီပုဟ်ဂှ် သ္ကိုပ်ဗိုလ်ဇၞော် သဝ်ကျဝ်ညောအ် သ္ဂးရ။
သၞာံတုဲကၠုၚ် ပ္ဍဲဂိတုဒဳဇြေမ်ဗာ (၇) တေံ ဂကောံဒေါအ်ပန်ပှော် (၇) ဂကောံတံ ရန်တၟံ သွက်ဂွံဒက်ပ္တန်ပရေၚ်ၜိုဟ်လလမ် မဗိုန်ခိုၚ်ဍာ်ဇမၠိၚ်မာန်ဂှ်တုဲ သွက်သ္ဂောံဂွံတၚ်တုပ်စိုတ် နကဵုလစွံစိုတ်တုပ်သၟဟ် သီုၜါလ္ပာ်မဒုၚ်တဲမာန် သွက်ဂွံဆဵုဂဗသဳကၠဳမာန်ဂှ် ကော်ဘိက်လဝ် ကံၚ်ဇြဳပၞာန်ဏီရ။
လ္တူလိက်ကော်ဘိက်ဂှ် ၜိုန်ရပွမသ္ပစၟတ်သမ္တီ မွဲလ္ပာ်ကုမွဲလ္ပာ်တံ နွံကီုလေဝ် ဟိုတ်နူအကာဲအရာပရေၚ်ဍုၚ်ကွာန်လၟုဟ်တုဲ နူကဵုကမ္မတဳပ္ညဳပ္ညပ် ထ္မံက်ရုပ်ရဴပရေၚ်ၜိုဟ်လလမ် (NSPNC) သွက်ဂွံဆဵုဂဗဗွဲပလးဂှ် ပ္ဍဲဂိတုဒဳဇြေမ်ဗာ ၉ တေံ ကယျာန်ပါဲလဝ်ရ။
ပ္ဍဲကဵုဂကောံဒေါအ်ပန်ပှော် EAOs ၇ ဂကောံ မဂ္စါန်ဒၟံၚ် သွက်ဂွံဆဵုဂဗသဳကၠဳဗွဲပလး ကုကံၚ်ဇြဳပၞာန်မာန်ဂှ် ဗော်ဍုၚ်မန်တၟိ (NMSP) ၊ ဗော်ဗၠးၜးရးရခေၚ် (ALP) ၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် (DKBA) ၊ ကံၚ်ဇြဳပရေၚ်ၜိုဟ်လလမ် (KNU/KNLA-PC) ၊ ဗော်သွးဒဳမဝ်ကရေတ်တေတ်လာဟူ (LDU) ၊ ဌာန်ဂအုပ်ဗၠးၜးကောန်ဂကူပအိုဝ် (PNLO) ကေုာံ ကံၚ်ဇြဳကလေၚ်ဒက်ပ္တန်ရးသေံ (RCSS) တံ ပါလုပ်ရ။
ပရိုၚ်−သြၚ်လောန်တိုၚ်(မ်)
ဗီုရုပ် -MOI (ဗီုရုပ်တြေံ)