မတ်မလီု – မာတ်ချ်(၁၁)
ဃောဗတိုက်ဒၟံၚ်ကဵုတၠအဝဵုပၞာန် သ္ပမာန်ကေတ်ဇၞး ကၟိန်ဍုၚ်ဗၟာ နကဵုလွဟ်လက်နက်ဂှ် ပ္ဍဲအရာဓမံက်ရုပ်ရဴ သၞောတ်ပရေၚ်ဍုၚ်ကွာန်တၟိမွဲ ပရေၚ်ဒးသၠးပွးတအ်နွံကၠုၚ်မာန်ရောၚ်ဂှ် ၜိုန်ရဒုၚ်လဝ်တဲကီုလေဝ် ဂွံဒုၚ်တဲပရေၚ်ဒးသၠးပွးၚုဟ်မးဇၞော်တအ်မာန် ဝါတ်ဂါတ်ဒၟံၚ်ရဂှ် သ္ကိုပ်ဝန်ဇၞော် NUG ဟီုသ္ဂးလဝ်ရ။
ပ္ဍဲကောံဓရီု ကဝ်မတဳဓမံက်ရုပ်ရဴ ပရေၚ်အုပ်ဓုပ်ညးဍုၚ်ကွာန် ဒေသန္တရကာလအကြာ အလဵုအသဳပရေၚ်ညဳသၟဟ်ကောန်ဂကူ ဗဟဵု ပ္ဍဲဂိတုမာတ်ချ် စၟတ်တ္ၚဲ (၉) တုဲကၠုၚ်ဏံဂှ် ဟီုသ္ဂးကၠုၚ်လဝ်သာ်ဏံရ။
“ဃောဗတိုက်သရိုဟ်ဒၟံၚ် သၞောတ်တၠအဝဵုပၞာန်ဂှ် ပ္ဍဲအရာဓမံက်ရုပ်ရဴ သၞောတ်ပရေၚ်ဍုၚ်ကွာန်တၟိ ပရေၚ်ဒးသၠးပွးဇၞော်ဇၞော် နွံကၠုၚ်မာန်ဒၟံၚ်ဏောၚ်ဂှ် ၜိုန်ရဒုၚ်လဝ်တဲကီုလေဝ် ဂွံဒုၚ်တဲပရေၚ်ဒးသၠးပွးၚုဟ်မးဇၞော်ဇၞော်တအ်မာန် ဝါတ်ဂါတ်ဒၟံၚ်ရ။ ဖိုလ်အဆက်လက်ကြဴဂှ် ကောန်ဒုဟ်ရာဇဝတ်ပၞာန်တအ် ဒးကေတ်အာတာလျိုၚ် ချိုတ်တ်ပၠိုတ်တ်ဏောၚ်” ဂှ် သ္ကိုပ်ဝန်ဇၞော် မာန်ဝေန်ခိုၚ်တာန် ဟီုသ္ဂးလဝ်ရ။
သ္အာၚ်နူဏံပၠန် ဟိုတ်နူဒှ်ဒၟံၚ်ကာလပၠန်ဂတးဂှ်ရ ကဏ္ဍပရေၚ်စဵုဒၞာဂှ် ဒးရေၚ်တၠုၚ်ကဵုဖျုန် မုက်ဂၞန်မွဲတုဲ ပရေၚ်အပ္ဍဲဍုၚ် ကေုာံပရေၚ်ကံက်ကေတ်အခေါန်ဂှ် ဟိုတ်နူဒှ်ကဏ္ဍပၟိက်ဇၞော် ပ္ဍဲကာလပၠန်ဂတး၊ ကာလလကြဴနူဏံဂှ်ရ ဒးရေၚ်တၠုၚ်ကဵု ဇြိုဟ်ဟ်နက်က်ရောၚ်ဂှ် သ္ကိုပ်ဝန်ဇၞော် ဟီုဗတိုက်ဖ္အောဝ်လဝ်ရ။
နကဵုအလဵုအသဳညဳသၟဟ်ကောန်ဂကူ NUG သ္ၚဳဂၠိပ်ကေတ် ပရေၚ်ဆဵုဂဗ အကာဲအရာဓမံက်ကၠုၚ်လဝ်ရုပ်ရဴ အခိၚ်လၟုဟ်ဏံကီု၊ အကာဲအရာပရေၚ်ဍုၚ်ကွာန် ဒှ်ကၠုၚ်ဂတဏံမာန်သီုဖအိုတ်ကီုတုဲ ကေတ်အခိၚ် ချပ်ဂၞန်သဳကၠဳသၞောတ်စှ်ေစှ်ေတုဲ ညံၚ်ဂွံဒှ်အကာဲအရာခိုဟ်အိုတ်ဂှ်လေဝ် ဟီုသ္ဂးလဝ်ရ။
ဆက်တုဲပၠန် ညးတိုန်စိုပ်ကောံဓရီု ကဝ်မတဳဓမံက်ရုပ်ရဴပရေၚ်အုပ်ဓုပ်ညးဍုၚ်ကွာန် ဒေသန္တရကာလအကြာတအ်ဂှ် သောၚ်ကလးသဳကၠဳလဝ် တၚ်သ္ဂုတ်သွာတ် ဖျေံလဝ် (၉/၂၀၂၃)၊ အကာဲအရာလၟေၚ်ကမၠောန်အဓာန်ဂတ၊ ကေုာံလၟေၚ်ကမၠောန် သွက်ဂွံဒးရေၚ်တၠုၚ် သှ်ေသၟေဟ်ဒၟံၚ်တအ်ဂှ်ရ။
ကောံဓရီုကဝ်မတဳဓမံက်ရုပ်ရဴ ပရေၚ်အုပ်ဓုပ်ညးဍုၚ်ကွာန်ဒေသန္တရကာလအကြာ ဗဟဵုဂှ် သ္ကိုပ်ဝန်ဇၞော် မာန်ဝေန်ခိုၚ်တာန် က္ဍိုက်က္ဍိုပ်တုဲ ဝန်ဇၞော်လုပ်ဂကောံအလဵုအသဳဂမၠိုၚ်ကီု၊ ဒုဝန်ဇၞော်ဂမၠိုၚ်ကီု သီုဝန်အပ္ဍဲဒ္တန်ဂမၠိုၚ်၊ ညးတာလျိုၚ် နူဌာနမဆေၚ်စပ်တအ် တိုန်စိုပ်လဝ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – Mahn Winn Khaing Thann – Prime Minister of NUG