မျာၚ်- မာတ်ချ်(၁၁)
ရးဒေသမဂွေ၊ ပွိုၚ်ဍုၚ်မျာၚ် ပ္ဍဲကွာန်ထာန်ပေါက်ကုမ် ဒပ်ကံၚ်ဇြဳပၞာန်ဂြာတ်ထောံဖျေံလဝ်ဗုမ်နကဵု MI-35 Jet Fighter ဂှ်ရ ညးဒေသတအ် ဒးဂြိပ်ဒဴပါဲဓလေတ်ဒၟံၚ်ရဂှ် ဗိုလ်လေတ်ကျာ နူတံဒပ်(၁) ပ.က.ဖ မျာၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုမာတ်ချ် စၟတ်တ္ၚဲ(၉) အခိၚ်နူဂယး ၜိုတ်(၁၁)နာဍဳဂှ် ကံၚ်ဇြဳပၞာန်ကၠုၚ်စိုပ် ပန်ပှော်လဝ် ကွာန်ထာန်ပေါက် မၞုံပ္ဍဲဗ္ဒာဲတိဍာ်ကၠေၚ်ဍေန် Well-2 ဂှ်ဒှ်တုဲ ညးဒေသမွဲတၠလေဝ် ဇီုကပိုက်ဂွံလဝ်ဘဲဝပ်ရဂှ် ဂွံတီကေတ်ရ။
“ပြဟ်ဟ်ဏံတှ်ေ ဒးဂြိပ်ဒၟံၚ်သီုညးဖအိုတ်ရ။ တ္ၚဲကၠာတေံဂှ် ဒှ်လဝ်ပေါဲဗတိုက်ကဵု ကံၚ်ဇြဳပၞာန်တုဲ လ္ပာ်ဍေံတအ်ချိုတ်အာ ပိတၠရ။ ဂုဏ်နူဂှ်ရ တ္ၚဲဏံ ကၠုၚ်ပန်လဝ်ကဵု က္ၜၚ်ကျာ လွဟ်ဇၞော်ကဵုဓဇိုက်လေဝ် ပန်ဒၟံၚ်ရ” ဗိုလ်လေတ်ကျာ နူကဵုတံဒပ်(၁) ပ.က.ဖ မျာၚ် ဟီုသ္ဂးလဝ်ရ။
စပ်ကဵုပေါဲဗတိုက်ဏံတုဲ အကာဲအရာပရေၚ်ဇီုကပိုက်လီုလာ်လဝ်ဂှ် ဟွံတီကေတ်ဏီတုဲ ညးဒေသတအ် ဟွံဂွံက္လေၚ်စဴကၠုၚ် ဌာန်ဒၟံၚ်ဏီရဂှ် ဗိုလ်လေတ်ကျာ ဟီုလဝ်ရ။
အခိၚ်လၟုဟ်မ္ဂး သီုအလုံကွာန်ထာန်ပေါက်ကုမ်မွဲ ဒးဂြိပ်ပါဲဓလေတ်ဒၟံၚ်တုဲ ကံၚ်ဇြဳပၞာန်ပန်ဗတိုက်ကၠုၚ် ဍုၚ်မျာၚ်နကဵုက္ၜၚ်ကျာ သီုအလန်ဏံမ္ဂး ဒှ်ကၠုၚ်(၄)ဝါရဂှ် ဂွံတီကေတ်ရ။
ပ္ဍဲဂိတုမာတ်ချ် စၟတ်တ္ၚဲ(၇)ဂှ်လေဝ် ကောန်ဒပ်ကံၚ်ဇြဳပၞာန် သ္ပမာန်ကေတ်နၚ်လဝ် ကွဳကြစုတ်ဍာ် နူလ္ပာ်ကွာန်ဖလာန်ကိုၚ်ဂှ် ဟိုတ်နူဒပ်ပရေၚ်စဵုဒၞာညးဍုၚ်ကွာန် ဗတိုက်လဝ်နကဵု Drop Bomb ဂှ်ရ ၜါတၠဂွံလဝ်ဘဲဝပ်သ္ကာတ်မြဟ်တုဲ ဒးချိုတ်အာလဝ်မွဲတၠဏီရ။
ကောန်ဒပ်ကံၚ်ဇြဳပၞာန်ဒးဒုၚ်ဗတိုက်လဝ်ဂှ် ဟိုတ်နူပန်ဖျေံလဝ် လွဟ်ဇၞော်ကြာန်န်တုဲ ညးဒေသအာယုက်(၄၂)သၞာံမွဲတၠ ဒးချိုတ်လဝ်တုဲ ဂွံလဝ်ဘဲဝပ်သ္ကာတ်မြဟ်မွဲတၠရဂှ် ဂွံတီကေတ်ရ။
ဒပ်ကံၚ်ဇြဳပၞာန်ဂှ် ဖျေံလဝ်သ္ဇိုၚ် ပ္ဍဲကွာန်ဖလာန်ကိုၚ် မၞုံဗ္ဒာဲကွာန်ထာန်ပေါက်ကုမ် ပွိုၚ်ဍုၚ်မျာၚ်တုဲ ပ္ဍဲဂိတုဏံ ဒှ်လဝ်ပေါဲဗတိုက်ဆေၚ်မုက်ကဵု ဒပ်ပရေၚ်စဵုဒၞာဒေသတအ် အဆက်က်ရဂှ် ညးဒေသဂမၠိုၚ် ဟီုသ္ဂးလဝ်ရ။
ပ္ဍဲအလုမ်မွဲကၟိန်ဍုၚ် ကြဴနူဒပ်ပၞာန်သီအဝဵုတုဲ ဟိုတ်နူဒပ်ကံၚ်ဇြဳပၞာန် ပန်ဗတိုက်ကၠုၚ် နကဵုက္ၜၚ်ကျာတုဲ ကောန်အရာပ်ညးဍုၚ်ကွာန် (၂၀၀)တၠပြၚ် ဒးချိုတ်လဝ်ရဂှ် NUG လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ(ဗီုတြေံ)