မတ်မလီု၊ အဝ်ဂါတ် (၅)
ကံၚ်ဇြဳပၞာန် မပလှ်ဖျေံ အလဵုအသဳအရာပ်တုဲ သီကေတ်လဝ်အဝဵုကၟိန်ဍုၚ်ဂှ်ဝွံ သွက်ဍုၚ်ကွာန်ဂွံၜိုဟ်သြိုဟ်သာယာကဵု သၞောဝ်ဥပဒေဂွံအုပ်လဒံဂးတုဲ ၝောံပိုဒ် ၁၄၄ ဂှ် မွဲဂိတုတုဲ မွဲဂိတု ထပ်ပပဵုပ္တိုန်ကၠုၚ်ဒၟံၚ်အာယုက်ရ။
ပ္ဍဲကဵုၝောံပိုဒ် (၁၄၄) ကံၚ်ဇြဳပၞာန် လလောၚ်တြးလဝ်ဂှ် အပိုၚ်အခြာအမိၚ်တိတ်ဗ္တံဟွံဂွံဂှ်ဝွံ လ္တူပရေၚ်အာကၠုၚ် ကၠောန်ၜိုတ်စသုၚ် လၟေၚ်တ္ၚဲ ညးဍုၚ်ကွာန်တံဂှ် ဒးဂဗဒၟံၚ်ဒဒိုက် ဇၞော်ကဵုဇြဟတ်တုဲ ဒဵုကဵုဒးဂွိၚ်ကၠုၚ် သွက်အန္တရာယ်လမျီုတံရ။
ကံၚ်ဇြဳပၞာန်ဝွံ အမိၚ်တိတ်ဗ္တံဟွံဂွံဂှ် ပ္ဍဲကဵုပွိုၚ်ဍုၚ်လ္ၚဵုတံမ္ဂး စၟတ်သမ္တီလဝ် နူ (၈) နာဍဳဗ္တံ စဵု (၄) နာဍဳဂယးကီု၊ နူ (၁၀) နာဍဳဗ္တံ စဵုကဵု (၄) နာဍဳဂယး ကေုာံ နူ (၁၂) နာဍဳဗ္တံ စဵုကဵု (၄) နာဍဳဂယးတံရ။
ကံၚ်ဇြဳပၞာန်သီအဝဵုဂှ် ထ္ၜးဟိုတ်ပရေၚ်ဂီုကၠီုတုဲ အခိၚ်ဗွဲမလအ်လ ထပ်ပပဵုကၠုၚ်ဒၟံၚ်အာယုက် အမိၚ်တိတ်ဗ္တံဟွံဂွံဂှ်ဝွံ လၟုဟ်မ္ဂး လအ်ကၠုၚ် ပွိုၚ်မွဲသၞာံပြၚ်ဣရ။
ဟိုတ်နူအမိၚ်တိတ်ဗ္တံဟွံဂွံ ကံၚ်ဇြဳပၞာန်ဂှ်တုဲ နကဵုညးဍုၚ်ကွာန်တံ ပ္ဍဲအရာအာကၠုၚ်ဂှ် အခက်အခုဲနွံဒၟံၚ်တုဲ အခိၚ်ဟွံရုဲ ပွမရပ်ဒက်ပန်ပှော်တံ သာ်ဏံနွံဒၟံၚ်တုဲ ဒှ်ဒၟံၚ် စဵုကဵုဒးဂွိၚ်ကၠုၚ် အန္တရာယ်လမျီုရဂှ် ညးကၠောန်ဒၟံၚ် ပရေၚ်သွံရာန်မွဲတၠ ဟီုရ။
“ညးဒေသတံဂှ် အခိၚ်ပ္တိတ်လဝ်အမိၚ် တိတ်ဗ္တံဟွံဂွံဂှ် လဆောဝ်လဆောဝ် ညးတံစဴကၠုၚ်မ္ဂး အခက်အခုဲနွံဒၟံၚ်ရ၊ အခိၚ်လအ်တုဲ လဇုဲအာမ္ဂး သွက်ညးတံ အကာဲအရာဒးဂွိၚ် စဵုကဵုအန္တရာယ်လမျီုဂှ် နွံတုဲ လဆောဝ်လဆောဝ်တှ်ေ အခိၚ်ဟွံရုဲ ဒးရပ်ဒက်တံဂှ် ညးတံ ဒးဂဗတုဲ မၞိဟ်တံ ဂွိၚ်ဒၟံၚ်အိုတ်ရ၊ ညးတံ ဒှ်ဒၟံၚ် စဵုကဵုဒးဂွိၚ် အန္တရာယ်လမျီုတံရ” ဂှ် သ္ဂးရ။
ဟိုတ်နူကံၚ်ဇြဳပၞာန် ပ္တိတ်လဝ်အမိၚ် တိတ်ဗ္တံဟွံဂွံဂှ်ရ ပ္ဍဲကဵုပွိုၚ်ဍုၚ်လ္ၚဵုတံဂှ် စနူကွဳစက်ပလံၚ်မၞိဟ်ယဲတံ ဒှ်တမ် ဟွံဂွံအခေါၚ်တတ်ကၠောံအာကၠုၚ်တုဲ ထ္ၜးဟိုတ်နာနာသာ်တုဲ ပန်ပှော်ဒၟံၚ်တံဂှ် ကၠောန်ၜိုတ်ဒၟံၚ်ရ။
ညးဒေသမွဲတၠဂှ် ဟိုတ်နူအမိၚ်တိတ်ဗ္တံဟွံဂွံ ကံၚ်ဇြဳပၞာန်ဂှ်ရ စနူကဵုအာကၠုၚ်တရဴဂှ် ဒးဂဗဒၟံၚ်ဒဒိုက်အိုတ်ရဂှ် ဟီုရ။
“တၚ်ဝါတ်ဂါတ်ဂှ်တှ်ေ ဗ္တံမ္ဂး (၈) နာဍဳပြဟ်ဟ်ဂှ် ဗီုမိက်ဂွံတိတ် တိတ်ဟွံဂွံရဏး၊ ကွဳစက်ပလံၚ်မၞိဟ်ယဲတံရဂှ် ဟွံကဵုတတ်ကၠောံပုဟ်၊ ဟွံကဵုကၠောံသၞေဟ်ကၚ်ဍေံတံပုဟ်၊ ကလေၚ်ဂတး ဍေံတံဟီု အေဗီုဏံရ၊ အာကၠုၚ်တရဴ ဝါတ်ဂါတ်တုဲ ပ္ဍဲဂၠံၚ် တရဴၜက်အာမ္ဂး ဒးတိက်ပ္ဍဲဂၠံၚ်ရ၊ တ္ၚဲတေံ ကောန်ၚာ်တြုံ မချိုတ်အာ ပ္ဍဲလၟိုၚ်ဂှ်တှ်ေ ကြပ်ကဵု ဗဒါဲဗ္ဒိုပ်ဂးတုဲ ပန်ဂစိုတ်လဝ်ဂှ်လေဝ် လ္ပာ်ဍေံတံ လလောၚ်လဝ်ပရိုၚ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ကောန်ဒပ်ကံၚ်ဇြဳပၞာန်တံ ကၠာဂွိုအ်စိုပ် အခိၚ်တိတ်ဗ္တံဟွံဂွံ မစၟတ်လဝ်ဂှ်လေဝ် ပွမဂၠိုက်ဂၠါဲကၟာတ်ဆိုအ် ကွဳစက်၊ ကွဳလိုန်ဓာတ်တံဂှ် ကၠောန်ဒၟံၚ်တုဲ အခိၚ်ဟွံရုဲ ပွမရပ်ဒက်ဒၟံၚ် ညးသၟတ်တံဂှ်လေဝ် နွံဒၟံၚ်ရ။
ဟိုတ်နူတၚ်ပိုၚ်ကၞာတ် အမိၚ်တိတ်ဗ္တံဟွံဂွံတံဂှ်ရ ပ္ဍဲအရာရေၚ်တၠုၚ် ပရေၚ်ရီုဗၚ်ဟံၚ်ပြာ်တံဂှ်လေဝ် ဒးဂဗဒၟံၚ် အခက်တုဲ ဟွံကဵုပရိုၚ် ကံၚ်ဇြဳပၞာန်မ္ဂး ကွဳစက်ပလံၚ်မၞိဟ်ယဲ ကာတၟေၚ်ရဂှ် ဒးဂဗဒၟံၚ်ကဵု အကာဲအရာ ဟွံဂွံအခေါၚ် အာကၠုၚ်တံရဂှ် ညးမၞုံတာလျိုၚ် ဂကောံရီုဗၚ်ဟံၚ်ပြာ်ပရေၚ်မၞိဟ်မွဲတၠ ဟီုရ။
“တၚ်ဝါတ်ဂါတ်ဂှ် နွံတွဵုရ၊ သီုကဵု ပလံၚ်မၞိဟ်ယဲတံရ၊ လၟုဟ်ဂှ်တှ်ေ ပ္ဍဲဂၠံၚ်ဂှ် စၟဳစၟတ်ကွေံကွေံ၊ ကွဳစက် AMBULANCE အာတှ်ေ စၟဳစၟတ်သက်ဟီုဟွံမွဲရ၊ ကွဳစက်တၞဟ်ဟ်တှ်ေ ဟွံစၟဳစၟတ်စကွေံကွေံပုဟ်၊ AMBULANCE ဂှ်တှ်ေ သီုအာသီုကၠုၚ် ဒးကဵုပရိုၚ် အခက်အခုဲသာ်ဏံ နွံရ၊ ယဝ်ရ အာပလံၚ်ကာတၟေၚ်မ္ဂး ဒးကဵုပရိုၚ် ကုသ္ကိုပ်အုပ်ဓုပ်ကွာန်၊ နူကဵုဂှ်မွဲကဆံၚ် ကဵုပရိုၚ် သ္ကိုပ်အုပ်ဓုပ်ပွိုၚ်ဍုၚ်ရ၊ နူကဵုပွိုၚ်ဍုၚ်ဂှ်မွဲကဆံၚ် ဒးကဵုပရိုၚ် ကုဗၠာဲသၟိၚ် က္ဍိုပ်ဒဒန်ဂှ်ရ၊ နူကဵုဒဒန်ဂှ် ကလေၚ်ကဵုအခေါၚ် တတ်ကၠောံမှ ကွဳစက် AMBULANCE တံ ဂွံအာကၠုၚ်ရ၊ ဍေံတံ ဟွံကဵုကၠောံတှ်ေ ဟွံဂွံအာရ၊ မၞိဟ်ယဲကာတၟေၚ် ဗီုလဵုဒှ်ဒှ် ဟွံဂွံအာပုဟ်၊ သဘဴဍေံဂှ် သာ်ဏံရ
သာ်ဝွံ သ္ဂးရ။
ကံၚ်ဇြဳပၞာန်ဂှ် ထပ်ပပဵုပ္တိုန်ကၠုၚ်အာယုက် အမိၚ်တိတ်ဗ္တံဟွံဂွံတံ ဇၟာပ်ပ်ပွိုၚ်ဍုၚ်ဂှ်ရ နကဵုညးဍုၚ်ကွာန်ဒေသတံ အာကၠုၚ်သၠးသၠးပွးပွး ဟွံဂွံရဂှ်တုဲ ပ္ဍဲအရာအာကၠုၚ်တရဴဂှ် အခိၚ်လအ်လ က္တဵုဒှ်ဒၟံၚ်တုဲ သွက်ရဲသွံဖျာ ပယျာံနူဂယးပြဟ်တံလေဝ် က္တဵုဒှ်ဒၟံၚ် အခက်အခုဲနာနာသာ်ရ။
ညးလ္ၚတ်သ္ၚဳဂၠိပ် ပရေၚ်ဍုၚ်ကွာန်တံဂှ် အမိၚ်တိတ်ဗ္တံဟွံဂွံ ကံၚ်ဇြဳပၞာန် ထပ်ပပဵုပ္တိုန်အာယုက်ဂှ်ဝွံ ကၠောန်ၜိုတ်ဒၟံၚ် သွက်ပရေၚ်ဂီုကၠီု ဂကောံဍေံတံရောၚ်ဂှ် ပါ်ပါဲလဝ်ရ။
ပရိုၚ်−သြၚ်လောန်တိုၚ်(မ်)