လၟိုၚ်၊ အဝ်ဂါတ် (၅)
ကောန်ဂကောံ ညးသၟတ်ပရဟိတ နူကဵုဍုၚ်လၟိုၚ်၊ ပွိုၚ်ဍုၚ်ရေဝ်၊ တွဵုရးဍုၚ်မန်မွဲတၠ သွက်ဒးဒုၚ်ပန်ဂစိုတ်လဝ် ကဵုသေနာတ်ဂှ်တုဲ ညံၚ်ဓဝ်ဍာံဂွံမံက် ကၠောန်ၜိုတ်အာရောၚ်ဂှ် ဥူဝေန်အံၚ် ဥက္ကဌဂကောံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဂျူလာၚ် စၟတ်တ္ၚဲ(၃) ဗ္တံ ၜိုတ် (၁၁) နာဍဳဂှ် မၞိဟ်မွဲတၠ ကြပ်ညန်ကၠုၚ် ဗဒါဲဗ္ဒိုပ်ဗၠာဲသၟိၚ်ဍုၚ်လၟိုၚ်ဂှ်တုဲ ပန်ဂစိုတ်လဝ် ကဵုသေနာတ်တုဲ ချိုတ်အာဂှ်ရ သွက်ဂွံပလံၚ်ကဵုရုၚ်ဂဥုဲဂှ် လ္ပာ်ဗ္ဒိုပ်ဗၠာဲသၟိၚ် ဆက်စၠောံကဵုနၚ်ပရိုၚ် ဂကောံသၟတ်ပရဟိတ ဍုၚ်လၟိုၚ်တံဂှ်ရ။
ကောန်ဂကောံ မာံလေန်အံၚ် ညးမဒးချိုတ်အာ ပ္ဍဲဗ္တံ မဒှ်လဝ်ပရူပရာဂှ်ဝွံ ၜိုတ် (၁၁) နာဍဳဗ္တံဂှ် နူကဵုရုၚ်ဂကောံပရဟိတဂှ် ပရးမၞိဟ် ကုကောန်ဂကောံတံဂှ်တုဲ ပ္ဍဲဂၠံၚ်စဴသ္ၚိ ဗ္ဒါဲကျာ် (နောၚ်တော်ကြီး) ဂှ် ဒးဒုၚ်ပန်ဂစိုတ်လဝ်ရ။
အတိုၚ်ညးဒေသတံ ဟီုဂးလဝ်ဂှ်မ္ဂး ဗ္တံဒှ်ပရူ ဗ္ဒါဲကျာ်(နောၚ်တော်ကြီး) ဂှ် ဂွံမိၚ်ရမျာၚ်သေနာတ် (၂) လတန်တုဲ ဒၞပ်တံ ဆီတံ ပြးဒၟံၚ်တုဲ မၞိဟ်လ္တူကွဳစက်မွဲတၠ စှ်ေကၠုၚ် ဒလိၚ်ပ္တိုန်ဏာဇွ လ္တူကွဳစက်ဂှ် ဒဒှ်ရဂွံဆဵုလဝ်ဂှ် သ္ဂးရ။
ဂၠံၚ်စဴသ္ၚိ မာံလေန်အံၚ် ကဵု ဗ္ဒိုပ်ဗၠာဲသၟိၚ်ဂှ်ဝွံ တၞဟ်ခြာဒၟံၚ်တုဲ ကျာ်(နောၚ်တော်ကြီး) ဒၞါဲဆီမပြးဒၟံၚ်ဂှ်ကဵု ဗ္ဒိုပ်ဗၠာဲသၟိၚ်ဂှ်လေဝ် သ္ၚောဲခြာဒၟံၚ် ၜိုတ် (၆ ဖာလုံ) ရ။
ဒဵုကဵုအခိၚ်လၟုဟ် စပ်ကဵုအမှု မာံလေန်အံၚ် ဒးဒုၚ်ပန်ဂစိုတ်ဂှ်တုဲ လ္ပာ်ဗ္ဒိုပ်ဗၠာဲသၟိၚ် ဍုၚ်လၟိုၚ်ဂှ် ရေၚ်တၠုၚ်ကဵုလဝ် မွဲမွဲသာ် ဟွံမွဲတုဲ ပွမကေတ်တာလျိုၚ် ဒုၚ်တာလျိုၚ်တံလေဝ် ဟွံမွဲပုဟ်ဂှ် ဥူဝေန်အံၚ် သ္ဂးရ။
ဟိုတ်ဂှ်ရ အမှုမာံလေန်အံၚ် ဒးဒုၚ်ဂစိုတ်ဂှ် ညံၚ်ဒဒှ်ဍာံဂွံမံက်ဂှ် မ္ၚးနူဂကောံအပ္ဍဲတွဵုရးဍုၚ်မန်တံအိုဿီုဂှ် သီုကဵုနာဲလျးတၟး ကေုာံ ဒံက်တာဗညာအံၚ်မဵု နူကဵုဗော်ညးသၟဟ်မန် မယိုက်ဂၠေၚ်ဒၟံၚ်တာလျိုၚ် ပ္ဍဲကံၚ်ဇြဳပၞာန်တံဂှ်လေဝ် သွက်ဂွံပါလုပ်ရေၚ်တၠုၚ်ကဵုအိုတ်ဂှ် ညးအာတ်မိက်ဏာလဝ်ရ။
“ဒှ်မာန်တှ်ေ ဇၟာပ်ပ်ဂကောံ မၞုံဒၟံၚ်အပ္ဍဲတွဵုရးဍုၚ်မန်အိုဿီု ကိစ္စမာံလေန်အံၚ်ဏံ ညံၚ်ဒဒှ်ဍာံဂွံမံက်ဂှ် မိက်ဂွံကဵုဘိုၚ်ရီုဗၚ်အိုတ်ရ၊ တုဲတှ်ေ ဒှ်မာန်မ္ဂး စနူကဵု နာဲလျးတၟး၊ ဒံက်တာဗညာအံၚ်မဵု ပိုယ်တံ မၞုံဒၟံၚ်လ္ပာ်ကံၚ်ဇြဳပၞာန်တံ သီုညးဖအိုတ်ပါလုပ်တုဲ ညံၚ်သွဟ်ဍာံဂွံမံက်ဂှ် ပါလုပ်သ္ၚဳဂၠိပ်ကဵုအိုတ်ညိဂှ် မိက်ဂွံဟီုရ” သာ်ဝွံ ဥူဝေန်အံၚ် သ္ဂးရ။
မာံလေန်အံၚ် အာယုက် (၂၁) သၞာံ ဒးဒုၚ်ပန်ဂစိုတ်ကဵုသေနာတ်တုဲ မဒးချိုတ်အာဂှ်ဝွံ ပွမဆက်စပ်ဒၟံၚ်ကဵု ပရေၚ်ဍုၚ်ကွာန်ဂှ် ဟွံမွဲတုဲ ဒှ်ညးမကၠောန်ကမၠောန်ပရဟိတၠသၟးဟွံက သွက်ပရေၚ်စသုၚ်မံၚ်စံၚ်ဂှ် ဒှ်ညးသၟတ်မကၠောန်ဒၟံၚ်ကမၠောန် ဒဇဲ၊ ပရန် မွဲတၠရဂှ် ဥက္ကဌဂကောံ ဥူဝေန်အံၚ် သ္ဂးရ။
လ္တူမာံလေန်အံၚ် ဒးချိုတ်အာလဝ် မသက္ကုဟိုတ်ဂှ် နကဵုကံၚ်ဇြဳပၞာန် ကၠောန်ဒၟံၚ် အရာဂိုတ်ဂ္စါန် သွက်ဂွံအုပ်ဓုပ်ဘပဠ ကုညးဍုၚ်ကွာန်ဒေသတံ၊ ညးသၟတ်တံ နကဵုလွဟ်လက်နက်တံတုဲ ပ္ဍဲကဵုအမှုရာဇဝတ်ပၞာန် ကံၚ်ဇြဳပၞာန် မလုတ်လောန်ဒၟံၚ် လ္တူညးဍုၚ်ကွာန် အလုံမွဲကၟိန်ဍုၚ်ဂှ် ပါလုပ်မွဲကီုရဂှ် ဇြဟတ်ရးမညဖေဝ်ဒရေဝ်ခေတ်တၟိ (NRFF) လလောၚ်ပ္တိတ်လဝ်ရ။
ဒပ်စဵုဒၞါဍုၚ်မန် (MSDF) သ္ကုတ်သၠုၚ်ကျာဂှ်လေဝ် ဒပ်ကံၚ်ဇြဳပၞာန်တံဝွံ လ္တူညးသၟတ်တံဂှ် စွံစိုတ် ညံၚ်သၞတုဲ ဟိုတ်ဟွံမွဲပန်ဂစိုတ်ဒၟံၚ် ညးသၟတ်ဟွံမွဲကဵုဒုဟ်တံရဂှ် သ္ဂးလဝ်ရ။
ဟိုတ်ဂှ်ရ လုကဴသၞောတ်တၠအဝဵုပၞာန် တန်တဴဒၟံၚ်မ္ဂး နကဵုသၟတ်မန်တံ၊ ညးဍုၚ်ကွာန်မန်တံ ပရေၚ်ဂီုကၠီု နွံဟွံသေၚ်တုဲ သွက်ဂွံဗ္တိုက်ပလီု သၞောတ်တၠအဝဵုပၞာန်အိုတ်ဂှ် ဖ္တိုက်ဖ္အောဝ်လဝ်တုဲ ကုကံၚ်ဇြဳပၞာန် မဂစိုတ်ဒၟံၚ် သၟတ်မန်တံ ကေုာံ ညးဍုၚ်ကွာန်မန်တံ ဟွံလုပ်ကဵုသၞောဝ်တံဂှ် ညးတံ ဗ္တိုက်အာ ပိုတ်တ်သ္ကုတ်တ်ရောၚ်ဂှ် ကဵုသမ္တီ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)