မတ်မလီု၊ ဨပရဴ ၁၁
ပ္ဍဲကဵုဍုၚ်ဗၟာ ကြဴနူဒၞါဲဒေသ ၆ ဒၞါဲ ဒးဒုၚ်ဘဲဒဏ်တိချဳ ဇၞော်ကဵုဇြဟတ်တုဲဂှ် ကံၚ်ဇြဳပၞာန်တွဵုရးဍုၚ်မန် ကဵုကၠုၚ်စၞောန် ကုသ္ဇိုၚ်ဝန်နူဌာနမဆေၚ်စပ်ဂမၠိုၚ် သွက်ဂွံဗှ်ဖ္ဍောတ်ပရိုတ်မ္ၚဵု ပွိုၚ် ၉ တ္ၚဲရောၚ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။
ကံၚ်ဇြဳပၞာန်တွဵုရးဝွံ စၞောန်ကၠုၚ် ကုဂကောံဗှ်ဖ္ဍောတ်ပရိုတ်ပဌာန်ဂမၠိုၚ် ပ္ဍဲကဵုဌာနမဆေၚ်စပ် ကဆံၚ်တွဵုရး၊ ကဆံၚ်ခရိုၚ် ကေုာံ စဵုကဵုကဆံၚ်ပွိုၚ်ဍုၚ် သွက်ဂွံဖ္ဍောတ်ပရိုတ်မ္ၚဵု နူဂိတုဨပရဴ ၈ စဵုကဵုဂိတုဨပရဴ ၁၆ မဒှ်ရ။
ဒၞါဲဗှ်ဖ္ဍောတ်ပရိုတ်မ္ၚဵုတံဂှ်တှ်ေ ပ္ဍဲဇြပ်သ္ဘၚ်ဓဝ် ပွိုၚ်ဍုၚ်ဂမၠိုၚ်၊ ပ္ဍဲကဵုကျာ်စေတဳ ကေုာံ ပ္ဍဲကဵုရုၚ်ဌာနမဆေၚ်စပ်တံ မဒှ်တုဲ လၟေၚ်တ္ၚဲ စနူဗ္တံ ၇ နာဍဳတုဲ သွက်ဂွံဗှ်ဖ္ဍောတ် ရနတသုတ် ၉ ဝါဂှ် စၞောန်ပ္ညုၚ်ကၠုၚ်လဝ်ရ။
ကဵုဗှ်ဖ္ဍောတ် ရနတသုတ် ၉ ဝါဂှ်ဝွံ ရန်ကဵုဍုၚ်ကွာန် ဂွံၜိုဟ်သြိုဟ်သာယာ၊ အလုံဍုၚ်မွဲ ဂွံဗၠးဘဲအန္တရာယ် ကေုာံ ညးဍုၚ်ကွာန်ဂမၠိုၚ် ဂွံၜိုဟ်သြိုဟ် စိုတ်ဂွံသၠောၚ်သ္ပဝ် ရန်ကၠုၚ်သာ်ဏံတုဲ ကဵုဗှ်ဖဍောတ်လဝ်ရောၚ် သ္ဂးရ။
ကျာ်ဇၞော်မွဲဇကုဂှ်တှ်ေ ကဵုဖ္ဍောတ်ရတနသုတ် မဗၠးဘဲအန္တရာယ်ဂှ် ခိုဟ်ကီုလေဝ် ယဝ်ကရေပ်ဓရတ်တုဲ ကဵုဖ္ဍောတ်မ္ဂး ဖဵုဍေံနွံဟွံသေၚ်တုဲ အရာမစိုပ်တရဴလေဝ် ဟွံမွဲပုဟ်ဂှ် ဟီုမြော်လဝ်ရ။
မွဲလ္ပာ်ဂှ်ပၠန် ဥူအံၚ်ကျဳတုၚ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ပ္တိုန်လဝ်ဂှ်ဝွံ မ္ၚးနူဒေသတၞဟ်ဟ် ဒးဘဲသဘာဝဂှ် အခိၚ်ကာလ ဟိုတ်နူကောန်ဒပ်ကံၚ်ဇြဳပၞာန်တံ ဇီုကပိုက်ချိုတ်ဂၠိုၚ်ဒၟံၚ်တုဲလေဝ် ကဵုဖ္ဍောတ်ကၠုၚ် ပရိုတ်၊ ပဌာန်တံလေပ်ဂှ် ညးမစုက်လုက်ကဵုကံၚ်ဇြဳပၞာန်တံ ဟီုရ။
သ္အာၚ်နူဂှ်ပၠန် အပ္ဍဲပေါဲဗ္တိုက်ဂမၠိုၚ် ညံၚ်ဒပ်ကံၚ်ဇြဳပၞာန်တံ ဂွံဗၠးဘဲဂးတုဲ ကဵုဗှ်ဖ္ဍောတ် ပါဠိဥပ္ပါတသန္တိကီု၊ ကၠောန်ဗဒှ် သ္ဘၚ်ဖ္ဍောတ်ပဌာန် ရမျာၚ်ဟွံပိုတ်သ္ကုတ်သၟးဟွံက အပ္ဍဲဒေသဂှ် ကဵုဗှ်ဖ္ဍောတ်ဒၟံၚ်ပရိုတ်မ္ၚဵု မွဲဏှမွဲဏှရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−MOI