ဘာအၚ်၊ ဨပရဴ ၁၁
ဂကောံအုပ်ဓုပ်သၟဝ်တဲကံၚ်ဇြဳပၞာန် လ္တူဍုၚ်ဘာအၚ် တွဵုရးကရေၚ်တံ ပကောံကၠုၚ်သၟတ်တံ သွက်ဂွံလုပ်ပၞာန်ဂှ် ကၠောန်ကၠုၚ်ဒၟံၚ်အဆက်က်တုဲ ပ္ဍဲအရာပ်လ္ၚဵုတံဂှ်တှ်ေ သွက်ဂွံလုပ်ပၞာန်ဂှ် စကံက်ဒၟံၚ်မာဲယျ ဂွံတီကေတ် ဇရေၚ်ညးဒေသဘာအၚ်တံရ။
ပ္ဍဲအရာပ် လ္တူဍုၚ်ဘာအၚ်လ္ၚဵုတံဂှ်တှ်ေ ကၠာတေံ ဂကောံအုပ်ဓုပ်ကံၚ်ဇြဳပၞာန်ဂမၠိုၚ်ဝွံ ပ္ဍဲအရာကော်ကဵုလုပ်ပၞာန်ဂှ် ဗက်သြန် နူညးဍုၚ်ကွာန်အကြာအရာပ်တံတုဲ သြန်ကံက်ကပှ်ဂွံတံဏံဂှ် လိၚ်ကေတ်မၞိဟ်မွဲတၠတုဲ လိၚ်စုတ်မၞိဟ် သွက်ဂွံလုပ်ပၞာန်ရ။
ဆ္ဂး ဗွဲကြဴဏံ ပ္ဍဲအရာပ်လ္တူဍုၚ်ဘာအၚ်လ္ၚဵုတံ ပါလုပ်သီုကဵုအရာပ် စၟတ် (၁) ဂှ် စကံက်ကၠုၚ်မာဲ သွက်ဂွံလုပ်ပၞာန်ဂှ်ယျရောၚ် ညးဒေသတံ သ္ဂးအိုတ်ရ။
ကံက်မာဲတုဲ ယဝ်ဒးအာမ္ဂး ဒးတိုန်စိုပ်တန်ဗ္တောန်ကွတ်ပၞာန်ဏောၚ်ဂှ်ရ မိမညးသၟတ် မ္ဒးလုပ်ယိုက်လျိုၚ်ပၞာန်တံ ဒှ်ဒၟံၚ်ဓဝိၚ်စံၚ်တူ နွံဒၟံၚ်တုဲ သၟတ်စရၚ်ပါ သ္ဂောံလုပ်ယိုက်လျိုၚ်ပၞာန်လ္ၚဵုတံဝွံ ပါဲဒလေတ်ကီု၊ လုပ်စိုပ်အာ ဇရေၚ်ဂကောံရပ်လွဟ်ကောန်ဍုၚ်အရၚ်တံကီု နွံဒၟံၚ်ဂှ် ဂွံတီကေတ်ရ။
လ္တူဍုၚ်ဘာအၚ်ဂှ် ဂကောံအုပ်ဓုပ်ကံၚ်ဇြဳပၞာန်တံ ကော်ကေတ်ဒၟံၚ် တန်ဗ္တောန်ကွတ်ပၞာန်တၟိတၟိတံတုဲ ပ္ဍဲဍုၚ်တၞဟ်ဟ် ညံၚ်ရဴဍုၚ်လိုၚ်ဗၠဲတံဂှ်လေဝ် သွက်ဂွံယိုက်လျိုၚ်ပၞာန်ဂှ် ဗက်လှုဲတုဲ လိၚ်စုတ်မၞိဟ်စၞးနွံဒၟံၚ်ဂှ်လေဝ် ညးဒေသတံ ဟီုအိုတ်ရ။
ဂကောံအုပ်ဓုပ် သၟဝ်တဲကံၚ်ဇြဳပၞာန်တံ ပ္ဍဲအရာဗက်ကၠုၚ်ဒၟံၚ်လှုဲသာ်ဏံဂှ် သ္ၚိလၟိဟ်သၟတ်စရၚ်ပါဂၠိုၚ်တံဂှ် ကံက်ကၠုၚ်ဒၟံၚ်လှုဲဂၠိုၚ်တုဲ အတိုၚ်စရၚ်ကံက်ကပှ်ဂွံဂှ်မ္ဂး မွဲသ္ၚိ ဒးကဵုဒၟံၚ် အောန်အိုတ် နူ ၁၀၀၀၀ စဵုကဵု ၃၀၀၀၀ ဇၟာပ်ဂိတုရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram