ဘာပန်၊ ဨပရဴ ၁၁
တွဵုရးကရေၚ် ပ္ဍဲပွိုၚ်ဍုၚ်ဘာပန်ဂှ် ပေါဲဗ္တိုက်ဟွံမွဲမွဲသာ် ဟိုတ်နူဒပ်ကံၚ်ဇြဳပၞာန် ဗ္တိုက်ကဵုပၞာန်ကျာတုဲ ညးဍုၚ်ကွာန်ကောန်အရာပ်ၜါတၠ ချိုတ်တုဲ သ္ၚိပန်မ လီုအာလဝ်ရောၚ် ဗော်သွးကောန်ဂကူကရေၚ် KNU ဗဟဵု လလောၚ်ပ္တိတ်လဝ်ရ။
ဒပ်ကံၚ်ဇြဳပၞာန်ဝွံ တုဲကၠုၚ်ပ္ဍဲဂိတုဨပရဴ ၈ အခိၚ်ဇိုၚ်သဝ်တ္ၚဲ ၜိုတ် ၅ နာဍဳဝိုက်ဂှ် ကၠုၚ်စိုပ်ထောံဏာလဝ်မခတိုဟ်ၜါမ နကဵုက္ၜၚ်ကျာဗ္တိုက် ဂျက်ဖိုက်တာ လ္တူကွာန်(ဘလယ်ဝေါ်) ကဵု ကွာန်(ထီးသဲကရူ) ရ။
ဟိုတ်နူဒးဒုၚ်ထောံဏာလဝ်မခတိုဟ်ဂှ်တုဲ ကောန်ကွာန် (ဘလယ်ဝေါ်) သဝ်ပါနာမူ၊ သဝ်ဒေသိတံ ၜါတၠ ဇီုကပိုက်ကလိဂွံအာဝပ်တုဲ သ္ၚိဒၟံၚ် သဝ်ကာနေမူ၊ သဝ်ပါနာမူ ကေုာံ သဝ်ဒဝ်နဳ ပိမ သရိုဟ်လီုအာတုဲ ပ္ဍဲကွာန် (ထီးသဲကရူ) ဂှ်လေဝ် သ္ၚိ (နော်ကြာဟဲ) ဒးလီုအာလဝ်ရောၚ် သ္ဂးရ။
ဟိုတ်နူကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာတုဲ ညးဒေသလ္ၚဵု နူကဵုကွာန် (ဘလယ်ဝေါ်) ကဵု (ကွာန်ထီးသဲကရူ) တံ ဒးဂြိပ်ဒၟံၚ်တုဲ ဒးဒှ်ဓဝိၚ်ဖေက်ဂၟံက်ဒၟံၚ်ရောၚ် ဂွံတီကေတ်ရ။
ကံၚ်ဇြဳပၞာန်ဝွံ ဟိုတ်နူဘဲတိချဳတုဲ လလောၚ်တြးလဝ် ဒေါအ်ပန်ပှော်ယာယဳကီုလေဝ် ပ္ဍဲကဵုတွဵုရး ကေုာံ ရးဒေသတံဂှ် ကၠောန်သ္ပဒၟံၚ် ပရေၚ်ဗ္တိုက်ပၞာန်ကျာ ကေုာံ လွဟ်ဇၞော် လၟေၚ်ဒဒှ်တ္ၚဲရောၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP လလောၚ်ပ္တိတ်လဝ် ပ္ဍဲဂိတုဨပရဴ ၆ တေံရ။
ပရိုၚ်−သြၚ်လောန်တိုၚ်(မ်)
ဗီု−KNU