ဘာပန်၊ မာတ်ချ် (၁၁)
ကောန်ဂကောံဒပ် ဒပ်မဟာ (၅) KNLA တံ အပ္ဍဲမွဲတ္ၚဲဓဝ် ဟိုတ်နူလုပ်စိုပ်ဗ္တိုက်လဝ် ဗ္ဒိုပ်ဗၠာဲသၟိၚ် ကေုာံ တမ်ဒပ် BGF သၟဝ်တဲကံၚ်ဇြဳပၞာန် မၞုံပ္ဍဲကွာန်ကတိုၚ်တိ ခရိုၚ်ဘာပန် ဗော်သွးကောန်ဂကူကရေၚ် KNU တံဂှ်တုဲ သီုကဵုပါလုပ်သ္ကိုပ်ဗၠာဲသၟိၚ် ကေုာံ ဗၠာဲသၟိၚ်(ဗြဴ)ဂှ် ၅ တၠ ချိုတ်အာလဝ်ရောၚ် ဒပ်မဟာ (၅) လလောၚ်တြးလဝ် ပ္ဍဲဂိတုမာတ်ချ် (၁၀) တေံရ။
တုဲကၠုၚ် ဂိတုမာတ်ချ် (၅) အခိၚ်နူဂယး ၜိုတ် (၂) နာဍဳဂှ် ကောန်ဂကောံဒပ် သၟဝ်တဲဒပ်မဟာ (၅) KNLA တံ လုပ်စိုပ်သီဗ္တိုက်လဝ် ဗ္ဒိုပ်ဗၠာဲသၟိၚ်ကံၚ်ဇြဳပၞာန် မဖျေံသ္ဇိုၚ် ကွာန်ကတိုၚ်တိ ဒပ်မဟာ (၅) KNU ဂှ်တုဲ သ္ကိုပ်ဗ္ဒိုပ် (၁) တၠ ကေုာံ ဗၠာဲသၟိၚ်(ဗြဴ) (၁) တၠ ချိုတ်အာလဝ်ဂှ် ပါလုပ် ပ္ဍဲတၚ်လလောၚ်တြးဂှ်ရ။
အပ္ဍဲကဵုတ္ၚဲဂှ် မွဲတ္ၚဲဓဝ်ဂှ် ကောန်ဂကောံဒပ် ဒပ်မဟာ (၅) KNLA တံ လုပ်စိုပ်ဗ္တိုက်လဝ် ဒပ်မၚ်ပယျဵု BGF – 1013 သၟဝ်တဲကံၚ်ဇြဳပၞာန်ဂှ်တုဲ ကောန်ဂကောံဒပ် BGF (၃) တၠ ချိုတ်လဝ်တုဲ (၆) တၠ ဇီုကပိုက်ကလိဂွံလဝ်ဝပ်ဂှ် လလောၚ်ပ္တိတ်လဝ်ရ။
ပ္ဍဲကဵုပရေၚ်လုပ်စိုပ်ဗ္တိုက် တမ်ဒပ် BGF ကေုာံ ဗ္ဒိုပ်ဗၠာဲသၟိၚ်ကံၚ်ဇြဳပၞာန်တံဂှ် အကာဲအရာ လ္ပာ်ဒပ်ပၞာန်ဗၠးၜးကောန်ဂကူကရေၚ် KNLA တံ ဇီုကပိုက်ကလိဂွံဝပ်ဂှ် လလောၚ်တြးလဝ် ဟွံမွဲရ။
သ္အာၚ်နူဂှ်ပၠန် တုဲကၠုၚ် ပ္ဍဲဂိတုမာတ်ချ် (၈) တေံ ၜိုတ်အခိၚ်ဗ္တံ (၈) နာဍဳဂှ်လေဝ် ဟိုတ်နူဂကောံဒပ်မၚ်ပယျဵု BGF- ၁၀၁၃ သၟဝ်တဲကံၚ်ဇြဳပၞာန် ဖျေံသ္ဇိုၚ်ကတိုၚ်တိတံ ပန်ပှော်လဝ် ကဵုလွဟ်ဇၞော်ဂှ်ရ ဒတုံဗ္တိုဟ်ထ္ကးအာလဝ် ပ္ဍဲကွာန်ပိုဝ်ဂါ၊ ပွိုၚ်ဍုၚ်ဒွါလိုဝ်တုဲ သၟတ်ဗြဴအာယုက် (၁၆) သၞာံမွဲတၠ ကေုာံ ညးဗြဴ အာယုက် (၃၉) သၞာံမွဲတၠ ဇီုကပိုက်ကလိဂွံလဝ်ဝပ်ရ။
ဟိုတ်နူဒပ်ကံၚ်ဇြဳပၞာန် ပန်ပှော်လဝ် အပ္ဍဲဒၞါဲကမၠောန်ဝါဗ္ၚတံကဵု ကွာန်ဂမၠိုၚ် မၞုံအပ္ဍဲခရိုၚ်ဘာပန် KNU တံ နကဵုတၚ်ရန်တၟံနွံနွံဂှ်ရ ပရေၚ်ကောန်အရာပ်ဇီုကပိုက်ကလိဂွံဝပ်တံ က္တဵုဒှ်ဒၟံၚ် မွဲဏှမွဲဏှတုဲ ပေါဲဗ္တိုက်ဆေၚ်မုက် အကြာဒပ်မဟာ (၅) ကဵု KNLA တံဂှ်လေဝ် က္တဵုဒှ်ဒၟံၚ်လၟိုန်ရောၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−KNU-Mutraw News