မတ်မလီု၊ မာတ်ချ် (၁၁)
ပ္ဍဲတွဵုရးဍုၚ်မန် ပ္ဍဲရာသဳၜဲတိတ်သၞာံဏံဂှ် ဟိုတ်နူမၞိဟ်ရာန်စွံလဝ်ၜဲ အပ္ဍဲဍုၚ်တံ ဂၠိုၚ်ကၠုၚ်ဂှ်ရ အပ္ဍဲပွိုၚ်စှ်သၞာံ ၚုဟ်ၜဲ စိုပ်ကၠုၚ် ဒဵုကဵုၚုဟ်သၠုၚ်အိုတ်ဂှ် တၠကမၠောန်ၜဲတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ၜဲနာနာ အပ္ဍဲဍုၚ်ဝွံ စနူသၞာံဏံမံက်တုဲ နူကဵုသၠုၚ်တိုန်ကၠုၚ်သိုက်က်ဂှ် အခိၚ်လၟုဟ် စိုပ်ကၠုၚ်ဒဵုကဵုၚုဟ်သၠုၚ်အိုတ်တုဲ အပ္ဍဲကဵုဂှ် ၜဲသ္ၚေက် (ယှိုဲဝါ) မွဲနဂှ် ၚုဟ်သၠုၚ်တိုန်ကၠုၚ် စဵုကဵု (၇၁၀၀၀) ဒ္ကေဝ်ရ။
ပ္ဍဲကဵုဂကူၜဲတၞဟ်သ္အာၚ်တံဂှ် ၜဲဇၞော် မွဲနဂှ် (၆၀၀၀၀) ဒ္ကေဝ်ပြၚ်၊ ၜဲမတ်ဗ္စံက် (ပဲလွန်းဖြူ) မွဲနဂှ် ၄၃၀၀၀ ဒ္ကေဝ်ပြၚ်၊ ၜဲ(ဘိုကိတ်) မွဲနဂှ် ၄၇၀၀၀ ဒ္ကေဝ်၊ ၜဲသဝ်ယျာ (ပဲပုပ်) မွဲနဂှ် ၆၀၀၀၀ ဒ္ကေဝ် ၚုဟ်သၠုၚ်တိုန်ကၠုၚ်ရ။
တၠကမၠောန်ၜဲမွဲတၠဂှ် ၚုဟ်ၜဲဝွံ ဟိုတ်နူရဲသွံရာန်ၜဲတံဟွံသေၚ် ဒၟါနူကဵုမၞိဟ်ရာန်စွံၜဲတံ ဂၠိုၚ်ကၠုၚ်ဂှ်ရ အပ္ဍဲပွိုၚ်စှ်သၞာံ စိုပ်ကၠုၚ်ၚုဟ်သၠုၚ်အိုတ်ရောၚ်ဂှ် ဟီုရ။
“အကာဲအရာဗွဝ်ဖျာၜဲဂှ်တှ်ေ လ္ၚဵုဂှ် စပ်ကဵုလာၚ်ၜဲကြံၚ်ၚ်တံတုဲ ၜဲဇၞော်တံဏံကဵု ၜဲလပေါၚ်တံဂှ် အခိၚ်လၟုဟ် မၞိဟ်ဟွံမိက်စွံလဝ်လှုဲ ပ္ဍဲတိုက်သြန်တံဂှ်တှ်ေ ဒၟါနူဗွဝ်ဖျာသြၚ်လ္ပာ်တေံ တၟော်ကိတ်ကွေံကွေံဟွံသေၚ်ပုဟ်။ လ္ၚဵုဂှ်ပၠန်လေဝ် ဟွံမိက်စွံလှုဲပ္ဍဲတဲတုဲ ပ္ဍဲတိုက်သြန်ဂှ်လေဝ် ဟွံမိက်စွံလှုဲတုဲ ပိုယ်ရဲပလေဝ်ယျာတံ မၞိဟ်သွံရာန်ၜဲတံဟွံသေၚ်ပုဟ်။ အကြာဂှ်ဂှ် ကော်စ ရဲရာန်စွံလဝ်တံရ။ ရဲပလေဝ်ယာတံဂှ် လုပ်ဝေၚ်ၚုဟ်။ လုပ်ခက်ဒၟံၚ်ဗီုဏံတုဲ ၚုဟ်ဂှ် ၚုဟ်ဒှ်ထေက်တံဟွံသေၚ်မွဲသာ် ဇြဟတ်ရာန် အပ္ဍဲဍုၚ်တံဂှ် တိုန်ကၠုၚ်လ္ပာ်လ္တူဏံရ။ ဇြဟတ်ရာန်တံဏံဂှ် ပ္တောံဏောၚ်။ ဍေံတံဂှ် ဒှ်ရဲသုၚ်စောဲလက္ကရဴအိုတ်ဟွံသေၚ်ပုဟ်။ ဍေံတံဂှ် နဒဒှ်ရဲဒုၚ်အကြာ သွက်ဂွံဂွံပရဲတုဲ ဒှ်ရဲကလေၚ်သွံမွဲကဆံၚ်ပၠန်တံရ။ ဂွံဏောၚ်၊ ဟွံဂွံပုဟ်ဟီုဂှ်လေဝ် ဟွံချိုတ်ပၠိုတ်ပုဟ်၊ ဟိုတ်ဂှ်ရ ၚုဟ်ဂှ်တိုန်၊ အပ္ဍဲပွိုၚ် (၁၀) သၞာံဏံ ၚုဟ်ၜဲသၠုၚ်အိုတ်ရဂှ် ဟီုဂွံရ” သာ်ဝွံ သ္ဂးရ။
မၞိဟ်ရာန်စွံလဝ်ၜဲတံ ဂၠိုၚ်ဒၟံၚ်ဂှ်ရ အပ္ဍဲဗွဝ်ဖျာဂှ် ဒဒှ်မရာန် ကဆံၚ်တုပ်သၟဟ်ကဵု ၚုဟ်ဍုၚ်သ္အာၚ်တံကဵုဂှ် နွံဒၟံၚ်တုဲ ဇြဟတ်ရာန်သၠုၚ်တိုန်ကၠုၚ်ဒၟံၚ်ရောၚ်ဂှ် ဂွံတီကေတ်ရ။
ဆ္ဂး ရဲတဵုလွဳၜဲတံဂှ် ကြဴနူဒပ်ပၞာန်သီအဝဵုတုဲ ဒၟါနူကဵုကပေါတ်ဗၞိက်တမ် အရပ်စပ်ပရေၚ်တဵုလွဳတံ ကေုာံ ခရိတ်အိုတ်နာနာ သၠုၚ်ဒၟံၚ်ဂှ်ကီု၊ ဟိုတ်နူရာသဳဥတုတုဲ အသိၚ်ၜဲတိတ်အောန်စှ်ေကၠုၚ်လဝ်ဂှ်ရ ပရဲပရာဟွံမွဲပုဟ်ဂှ် သ္ဂးအိုတ်ရ။
ပ္ဍဲတွဵုရးဍုၚ်မန်ဂှ် တဵုလွဳဒၟံၚ် ၜဲဇၞော်၊ ၜဲသ္ၚေက်၊ ၜဲသ္ၚေက် (ယှိုဲဝါ) ကေုာံ ၜဲသဝ်ယျာ(ပဲပုပ်)တံ အဓိကတုဲ လၟေၚ်သၞာံ လျိုၚ်တာန်ၜဲနာနာ (၂၀၀၀၀) ပြၚ် တိတ်ဒၟံၚ်နွံရ။
ၜဲနာနာ မတိတ်ကၠုၚ်တံဂှ် ဒးပလံၚ်ပ္တိုန်ဒၟံၚ် ဍုၚ်ကြုက် ကေုာံ အိန္ဒိယတံ အဓိကတုဲ ဍုၚ်သေံ၊ သေန်ကပေါဝ်၊ နဳပဝ် ကေုာံ ပါကေဿတာန်တံဂှ်လေဝ် တန်တဴကဵုလ္တူဂကူၜဲတုဲ ပလံၚ်ပ္တိုန်ဒၟံၚ်တံ နွံဒၟံၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−Mg Jake