ၜၚ်ကံက်၊ အဝ်ဂါတ် (၅)
ဝန်ဇၞော်ကာဍုၚ်သ္အာၚ် ဂျပါန်ကဵု ဂကောံအာယှဒိုဟ်အဂၞဲ (အာဇြဳယာန်) တံဝွံ တၞဟ်နသ္ဂောံ ခၠေဝ်ပလန် ကုဍုၚ်ကြုက် မထ္ၜးပျးဇြဟတ် ပ္ဍဲတွဵုဍာ် အပ္ဍဲဒေသဂှ်တုဲ သ္ဂောံပံၚ်တောဲရေၚ်တၠုၚ်အာ ပ္ဍဲအရာသၠုၚ်ပ္တိုန် ပရေၚ်ဂီုကၠီုဂၠံၚ်ဍာ် အပ္ဍဲဒေသ အေန်ဒိုဝ်−ပသိဖေတ်(ခ်) ဂှ် သ္ပလဝ်ကတိ ပ္ဍဲတ္ၚဲဗြဴဗ္တိဂှ်ရ။
အဃောမဆဵုဂဗကဵု ကောန်ဂကောံအာဇြဳယာန် ပ္ဍဲဖနမ်ပေန်ဂှ် ဝန်ဇၞော်ကာဍုၚ်သ္အာၚ် ယိုဝ်ယှဳမာသာ ဟာယျာယှဳဂှ် ဇၟာပ်ပရေၚ်ဂိုတ်ဂ္စါန် အပ္ဍဲၜဳကြုက်သၠုၚ်ကျာ ကဵု ဗၟံက် စကာဇြဟတ်တုဲ သွက်ဂွံပြံၚ်လှာဲ အကာဲအရာလၟုဟ် မွဲလ္ပာ်ဓဝ်ဂှ် ဒစဵုဒစး ဗွဲမသ္ကာတ်မြဟ်ရဂှ် ဟီုဂးလဝ်ရ။
အပ္ဍဲလၟေၚ်တရဴတ္ကအ် မဂွံအခေါၚ်အုပ်ဓုပ်အပိုၚ် ဒဳမဝ်ကရေတ်တေတ် ဥက္ကဌကၠတ်ထဝ်သၟဝ် အမေရိကာန် နာန်ဇြဳပလိုဝ်ဇြဳ ဒတုဲဂှ် ပွမသၠုၚ်ပ္တိုန်အသိၚ် သဳကၠဳလဝ် စပ်ကဵုပရေၚ်ကြံၚ်မ္ၚိုဟ် အကြာအမေရိကာန် ကဵု ကြုက် နွံဟွံမွဲဂှ် ဌာနဝန်ဇၞော်တံ ဟီုဂးကၠုၚ်လဝ် ဟွံမွဲဏီရ။
နဒဒှ်အရာကြုက်မကၠေံစိုတ် သွက်ဂွံဖအောန်ဖျေံ ပရေၚ်ထိၚ်ဒက်ဂျပါန် ပ္ဍဲကဵုဂကောံတ္ကအ် ၜဳကြုက်ဗၟံက်တံဂှ်တုဲ ပွမဗလးဒၟံၚ် က္ၜၚ်မလုပ်သၞောဝ် ပ္ဍဲတွဵုဍာ် ဗ္ဒါဲပွဳပွူ တ္ကအ်သာန်ကာကုတံဂှ် ဂွံဆဵုကေတ်လဝ်ရဂှ် သ္ဂးရ။
ပေကျေန်ဝွံ သၠဲပ္တိုန်ဒၟံၚ် တိဍာ် မၞုံပ္ဍဲၜဳကြုက်သၠုၚ်ကျာ မဂယျာန်ဓဝါန်ဒၟံၚ် အတိုၚ်ပရေၚ်ပၞာန်တံ နဒဒှ်ဂၠံၚ်ဍာ် မစှ်ေကဵုဗျူဟာတံရ။
သွက်ဂွံသၠုၚ်ပ္တိုန် ပရေၚ်ပံၚ်တောဲရေၚ်တၠုၚ် ညံၚ်သ္ဂောံဂွံ ဒေသအေန်ဒိုဝ်−ပသိဖေတ်(ခ်) မဗၠးၜးကၠးမှး ဂျပါန်ကဵု အမေရိကာန်တံ မဒုၚ်သ္ဇိုၚ်ကဵု ပရေၚ်အုပ်လဒံသၞောဝ်ဥပဒေ မဟွံသေၚ်ကဵုအမိၚ်အသံတံဂှ် ပ္ဍဲကောံဓရီုဂှ် ဟာယှာယှဳ အာတ်မိက်လဝ် အာဇြဳယာန် ကေုာံ ညးကၠောန်ကမၠောန်မွဲကရောံမွဲစွံတံရ။
ပွမကၠေံစိုတ်လွဳပရာ ဂကောံ (၁၀) ဂကောံတံ သွက်ဂွံထမံက်ရုပ်ရဴ Asean Outlook စပ်ကဵု အေန်ဒိုဝ်−ပသိဖေတ်(ခ်) မရန်ပ္တဝ် သ္ဂောံထိၚ်ဒဝ် ပရေၚ်ၜိုဟ်လလမ်၊ ဗၠးၜး ကေုာံ ပရေၚ်ဖောအ်ဗြေဝ်တိုန် အပ္ဍဲဒေသတံဂှ်လေဝ် ထံက်အာဂလာန်ရောၚ်ဂှ် ညး သ္ပလဝ်အဓိဌာန်ရ။
သ္အာၚ်နူဂှ်ပၠန် ဟာယှာယှဳဂှ် သွက်ဂွံသောၚ်ကလး အကြေပ်ဂြတ် မက္တဵုဒှ်ဒၟံၚ် ပ္ဍဲကၟိန်ဍုၚ်ဗၟာ မဒးဒုၚ်သီလဝ်အဝဵုဂှ် ဒဒှ်ရထံက်ဂလာန် ကတိကဝတ်အာဇြဳယာန်ဂှ် ထ္မံက်ပ္တိတ်ဟီုဂးလဝ်တုဲ အလဵုအသဳပၞာန် မဂစိုတ်ထောံလဝ် ညးချဳဒရာၚ် ပရေၚ်ဒဳမဝ်ကရေဇြဳတံဂှ်လေဝ် ဟီုဗျိပၠုတ်လဝ် သ္ကာတ်တ်မြဟ်ဟ်ရ။
ကၠုၚ်စိုပ်သၞာံဏံ နဒဒှ်စၟတ်သမ္တီ ပရေၚ်ဆက်ဆောံဂျပါန်−အာဇြဳယာန် ပေၚ် (၅၀) သၞာံတုဲ သွက်ဂွံသၠုၚ်ပ္တိုန် ပရေၚ်ဆက်စၠောံကဵု ပရေၚ်ကၠောံဍဆက်ဆောံတံဂှ် ၜါလ္ပာ်တုပ်လဝ်စိုတ်တုဲ သ္ကိုပ်ဝန်ဇၞော်ဂျပါန် ဖူမဳယိုဝ် ကဳယှဳဒါဂှ် ကောံဓရီုကဆံၚ်လ္တူဂှ် ကၠုၚ်စိုပ်သၞာံဏံ ဒုၚ်တဲကၠောန်ဗဒှ်အာ နဒဒှ်စၟတ်သမ္တီရောၚ်။
ဆ္ဂး ကၟိန်ဍုၚ်ဗၟာဂှ် ကောံဓရီုဝန်ဇၞော်ကာဍုၚ်သ္အာၚ်ဂမၠိုၚ် မဆက်စပ်ဒၟံၚ်ကဵုအာဇြဳယာန် မကၠောန်ဗဒှ်လဝ် ပ္ဍဲဍုၚ်ကာမ္ဗောဒဳယျာဂှ် ဟွံဂွံအခေါၚ်တိုန်စိုပ်တုဲ ဒၞါဲသ္ပစၞး ကၟိန်ဍုၚ်ဗၟာ သၠးဒၟံၚ်ဂှ် ဂွံတီကေတ်ရ။
Ref: Bangkok Post