ဍာ်ဗု၊ မာတ်ချ်(၁၄)
ရးဒေသဇၞော်တၞၚ်သဳ၊ ပွိုၚ်ဍုၚ်ဍာ်ဗု ပ္ဍဲအကြာမွဲၜါတ္ၚဲဏံ နကဵုတၚ်ထ္ၜးဟိုတ်ဆက်စပ်စုက်လုက်ဒၟံၚ်ကဵု PDF တအ်ဂးတုဲ ဒပ်ကံၚ်ဇြဳပၞာန်ရပ်ဏာလဝ် ကောန်အရာပ်ညးဍုၚ်ကွာန် ဟၟဲကဵုဒုဟ်ဒဏ် ဟွံအောန်နူ(၁၀)တၠရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုမာတ်ချ် စၟတ်တ္ၚဲ (၁၁) တုဲကၠုၚ်တေံ ကံၚ်ဇြဳပၞာန်ရပ်ကေတ်ဏာလဝ် မကေတဳလေန် ကေုာံမတေတ်မျေတ်နိုဝ် အာယုက်ၜိုတ် (၁၈)သၞာံ ဒၟံၚ်ကွာန်ဇြေန်ဗာ ကေုာံကျောက်ယှာတ်တအ် ညးၜါတၠရ။
သ္အာၚ်နူဂှ်ပၠန် ပ္ဍဲဂိတုမာတ်ချ် စၟတ်တ္ၚဲ (၁၂)ဂှ်လေဝ် က္ဍိုပ်သ္ကိုပ်ပၞာန်ညးဍုၚ်ကွာန် ဥူလာလာ ကွာန်ဇြာဒဳဂှ် ဃောဂကောံရပ်လွဟ်မွဲဂကောံ ကၠုၚ်စိုပ်ပသောၚ်သ္အးဂှ် ဂြိပ်တိတ် ဗၠးအာလဝ်တုဲ အခိၚ်ဒေါဝ်တ္ၚဲ ၜိုတ်(၂)နာဍဳဂှ် ဒပ်ကံၚ်ဇြဳပၞာန် ရပ်ကေတ်ဏာလဝ်ဥူအောၚ်မေန် ကေုာံ ဒဝ်အောၚ်မေန် ကိုဝ်အောၚ်ကျဝ် သ္ကိုပ်ပရေၚ်ထတ်ယိုတ် ကောန်ထံၚ်ပရေၚ်ဍုၚ်ကွာန်တြေံ ဗၠးတိတ်ကၠုၚ်လဝ် ဟွံလအ်ဏီတအ်ရ။
ကြဴနူတ္ၚဲဂှ် ဒပ်ကံၚ်ဇြဳပၞာန် ထပ်ရပ်ကေတ်ဏာလဝ် မမိုဝ်မျေတ်နဒဳထိုဲ ဒၟံၚ်အရာပ် စၟတ်(၃) ကေုာံကိုဝ်ကျဝ်ဒူထိုဲ ဒၟံၚ်ကွာန်မိကျောၚ်လှောၚ် သီုကဵုဂကောံကၟိန်အိန်ထံၚ် (၄)တၠပၠန်ရ။
ညးဒေသ ဒပ်ကံၚ်ဇြဳပၞာန်ရပ်ကေတ်ဏာလဝ်ဂှ် ပလံၚ်ဗစိုပ်လဝ် ပ္ဍဲဒၞာဲစၟဳစၟတ် ဗ္ဒပ်ဗၠာဲသၟိၚ်ကလိၚ်အံၚ် ကေုာံတံဒပ်ပၞာန်တိုက်ကံၚ်ဇြဳပၞာန် ဒခမရ – ၄၁၀ ရ။
ပ္ဍဲပွိုၚ်ဍုၚ်ဍာ်ဗု ဂိတုဖေဖဝ်ဝါရဳတုဲကၠုၚ်တေံလေဝ် ဒပ်ကံၚ်ဇြဳပၞာန်ရပ်ကေတ်လဝ် ညးဒေသဗ္ဒာဲ (၂၀)တၠကီု ပ္ဍဲကဵုဂှ် ၜိုန်ရမၞိဟ်ကလေၚ်ဗၠးတိတ်ကၠုၚ် နွံကီုလေဝ် ဗွဲမဂၠိုၚ် ဒးဆက်ဒုၚ်ရပ်လဝ်ရဂှ် ဂွံတီကေတ်ရ။
အတိုၚ်ဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် (AAPP) ဟီုသ္ဂးလဝ်မ္ဂး ပ္ဍဲမွဲကာလဒပ်ပၞာန်သီအဝဵုဏံ ကောန်အရာပ် ၂၀,၀၀၀ ပြၚ် ဒးဒုၚ်ရပ်လဝ်ရဂှ် လလောၚ်တြးလဝ် ပ္ဍဲဂိတုမာတ်ချ် စၟတ်တ္ၚဲ (၁၀)ဂှ်ရ။
ပရိုၚ်-သြၚ်လောန်တိုၚ်(မ်)