ပေန်လောၚ် -မာတ်ချ်(၁၄)
တွဵုရးသီဇၞော်သၠုၚ်ကျာ၊ ပွိုၚ်ဍုၚ်ပေန်လောၚ် ဒေသသောၚ်ပျောၚ် ပ္ဍဲဒၞာဲညးဍုၚ်ကွာန်ဗ္ဒဗ္ဒာဲဒၟံၚ် ပ္ဍဲဘာလကျာ်ကွာန်ဏာမ်နုၚ် ဒးဒုၚ်ဂစိုတ်လဝ်ဗွဝ်ဗွဝ်ဂှ် သီဂွံလဝ်မကမ်လွဟ်ဇၞော်ကံၚ်ဇြဳပၞာန် ကေုာံမကမ်တအ်ရဂှ် ဒပ်စဵုဒၞာကောန်ဂကူပအိုဝ် (ခေန်ကောၚ်) လလောၚ်တြးလဝ် ပရိုၚ်ရ။
ဒုဟ်ရာဇဝတ် ကံၚ်ဇြဳပၞာန်လုလောန်လဝ် လ္တူကောန်ဂကူမၞိဟ် ကေုာံပရေၚ်ပ္တဝ်လဝ်ကဵုကောန်အရာပ်တုဲ ဗတိုက်ပန်ပှ်ောဒၟံၚ်တုဲ တၚ်ဆဵုဂဗဒုဟ်ဒဏ်ရာဇဝတ်ပၞာန်တအ်ဂှ် သွက်ညးဍုၚ်ကွာန် ကောန်ဂကူကောန်ဍုၚ်အရၚ်သီုဖအိုတ်ကီု သီုညးဍုၚ်ကွာန်ပအိုဝ်တအ် ကေုာံ ဂကောံကၟိန်အိန်ထံၚ် ကၟိန်ဍုၚ်နာနာဂမၠိုၚ် ဂွံတီကေတ် အတိုၚ်ဒဒှ်ဍာံမာန် ပကောံပကေဝ်ဓမံက်ထ္ၜးကဵုလဝ်ရဂှ် ဟီုသ္ဂးလဝ်ရ။
ဒပ်ကံၚ်ဇြဳပၞာန် ဖျေံလဝ်ဗ္ဒပ် ပ္ဍဲဒဵုကျာ် ဗၟံက်ကွာန်ဏာမ်နုၚ် ဒေသသောၚ်ပျောၚ် ပွိုၚ်ဍုၚ်ပေန်လောၚ်ဂှ် ပ္ဍဲဂိတုမာတ်ချ် စၟတ်တ္ၚဲ (၁၁) အခိၚ်နူဂယးပြဟ်ဂှ် ပန်ဖျေံလဝ်လွဟ်ဇၞော်၊ မကမ်ပၟတ် ပ္ဍဲကွာန်ဏာမ်နုၚ်တုဲ ဒပ်ကံၚ်ဇြဳပၞာန်တၞဟ်ပၠန်ဂှ် လုပ်စိုပ်ကၠုၚ် ပ္ဍဲကွာန်နကဵုဇြဟတ်ပၞာန်ပေၚ်ၚ် ပ္ဍဲမွဲဒမြိပ်ဂၠံၚ် ဍေံတအ်ဇက်ကၠုၚ်ဂှ်လေဝ် ပန်ပသောၚ်ကၠုၚ်ဒၟံၚ်ဂၠံၚ် နကဵုလွဟ်စက်ကြာန်န်ကီု သီုပန်စံၚ်ပလီုဒၟံၚ် သ္ၚိဌာန်တအ်ရဂှ် ဂွံတီကေတ်ရ။
ဒပ်ကံၚ်ဇြဳပၞာန် လုပ်စိုပ်ကၠုၚ်ကွာန်ဂှ် ကော်ပ္တိတ်နၚ် မၞိဟ် (၂၁)တၠ ကောန်ညးဍုၚ်ကွာန် (၁၈)တၠ သီုခမဳ(၃)ဇကု ပါလုပ်သီုကျာ်ဇၞော်ဂ္ဇအ်ဘာဏာမ်နုၚ် အောပ်မာဒၟံၚ် ပ္ဍဲဂၠံတိုက်သၟဝ်တိ ဘာလကျာ်တုဲဂှ် ပန်ဂစိုတ်လဝ် ပ္ဍဲကဵုဗ္ဒၚ်ဘာလကျာ်ဂှ်တုဲ ဇွညးဒးဒုၚ်ချိုတ်လဝ် ဒပ်ပံၚ်ကောံ KNDF ပါလုပ်သီု PNDF (KK)တအ် ယိုက်ပ္တိတ်နၚ်မာန်လဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
ဂွံဆဵုလဝ် ဇွကောန်အရာပ် (၂၁) တၠ ပါလုပ်သီုလကျာ်တအ်ဂှ် ဒပ်ကံၚ်ဇြဳပၞာန် ဒက်လဝ် ပ္ဍဲကဵုဗ္ဒၚ်ဘာလကျာ်ကွာန်ဏာမ်နုၚ်တုဲ ပန်ဂစိုတ်လဝ်ရဂှ် ဂွံတီကေတ်ရ။
ပ္ဍဲဒၞာဲပရေၚ်ပရောက္တဵုဒှ်လဝ်ဂှ် ပါဲနူခၞော်မကမ်ကံၚ်ဇြဳပၞာန် MA-5.56 ခၞော်မကမ် M79 ကဝေက်လွဟ်ဇၞော်တအ်တုဲ ခၞော်မကမ် (က.ပ.စ) မလိက်ကၠောန်ပ္တိတ်လဝ် ပ္ဍဲရုၚ်စက်ကပေါတ်ပရေၚ်စဵု ပါဒၟံၚ်တအ် သီကေတ်ဂွံလဝ် ဗီုစၟတ်သမ္တီဂွံဆဵုကေတ်လဝ်ရဂှ် PNDF လလောၚ်တြးလဝ်ရ။
သ္အာၚ်နူဂှ်ပၠန် ဟိုတ်နူဂြာတ်ထောံဖျေံဗုမ် ဗတိုက်ကၠုၚ်ကဵုက္ၜၚ်ကျာ၊ ပန်ဖျေံလွဟ်ဇၞော် ပ္ဍဲကဵုသ္ၚိကွာန်ဂှ်တုဲ ဗီုစၟတ်သမ္တီ ခရိုဟ်လီုလာ်ဒၟံၚ်ဂှ်လေဝ် PNDF (KK) လလောၚ်တြးလဝ်ရ။
နကဵု PNDF (KK) စပ်ကဵုညးဒးဒုၚ်ပြိုက်ဂစိုတ်လဝ်ကဵု ဒပ်ကံၚ်ဇြဳပၞာန်ဓဇန်န်တအ်တုဲ ဂၠိုက်ဂၠာဲစၟဳစၟတ်ဒၟံၚ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – PNDF(KK)