မေန်တုမ် – မာတ်ချ်(၁၆)
ရးမဂွေ၊ ပွိုၚ်ဍုၚ်မေန်တုမ်ဂှ် ဟိုတ်နူသၞေဟ်ကၚ်စၟဳစၟတ်ကံၚ်ဇြဳပၞာန် ဒးဒုၚ်ဗတိုက်လဝ်တုဲ ပရေၚ်ဇီုကပိုက်ချိုတ်ဂျိုၚ် နွံမာန်ရဂှ် တံဒပ်လၟိဟ်(၄) ခရိုၚ်တယျေတ် လလောၚ်တြးလဝ် ပရိုၚ်ရ။
တ္ၚဲဏံ ဂိတုမာတ်ချ် စၟတ်တ္ၚဲ(၁၄) အခိၚ်နူဂယးဂှ် ဒပ်စဵုဒၞာညးဍုၚ်ကွာန် ပန်ဗတိုက်လဝ် သၞေဟ်ကၚ်စၟဳစၟတ်ကံၚ်ဇြဳပၞာန် (၅)မိုၚ် မၞုံသ္ကဲဂၠံၚ်ကွဳစက် ဖာသီ-မုမ်ယွာ နကဵုလံၚ်ချာဗုမ်ပန် ၄၀-မမရ။
“ဍေံတအ်ဂှ်တှ်ေ ဇြဟတ်ဂၠိုၚ်တိုန် ဂၠိုၚ်တိုန်ဟီုဂှ်လေဝ် ဖျေံလဝ်ညဳညဳတုဲ စၟဳစၟတ်ဂၠိုၚ်ကၠုၚ်ရ။ ရပ်စပ်ကၠုၚ်ဂှ်တှ်ေ ဟွံလအ်ဏီပုဟ်။ သၞေဟ်ကၚ် ဗတိုက်လဝ်လၟုဟ်ဂှ် ဒှ်အလန်ဒုတိယရ” ဂှ် ညးလလောၚ်ပရိုၚ် တံဒပ်လၟိဟ်-(၄) (Eagle Force) ကိုဝ်မျေတ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဏံပၠန် မွဲတ္ၚဲဓဝ် သၞေဟ်ကၚ်ကံၚ်ဇြဳပၞာန်ဖျေံလဝ်ဗ္ဒပ် ပ္ဍဲကွာန်သပါတာန်ဂှ်လေဝ် ထောံဖျေံလဝ်မဗုမ် နကဵု Drone (၂) ဖ္ဍိုက်ရဂှ် ညးဟီုသ္ဂးလဝ်ရ။
ပ္ဍဲပေါဲဗတိုက်သၞေဟ်ကၚ်စၟဳစၟတ်(၅)မိုၚ် ဒၞာဲဒပ်ကံၚ်ဇြဳပၞာန် ဖျေံလဝ်သ္ဇိုၚ်ဂှ်မ္ဂး ပရေၚ်ဇီုကပိုက်ဒး ဟၟဲရဂှ် ဟီုသ္ဂးလဝ်တုဲ ပေါဲဗတိုက်ကွာန်သပါတာန်ဂှ်မ္ဂး ၜိုန်ရပရေၚ်ဇီုကပိုက်ဒး နွံဒၟံၚ်ကီုလေဝ် သ္ပဒ္တန်ဟွံမာန်ဏီရဂှ် ဂွံတီကေတ်ရ။
အခိၚ်ဒပ်စဵုဒၞာညးဍုၚ်ကွာန် ဗတိုက်ပန်ပှော်လဝ်ဂှ် ၜိုန်ရလ္ပာ်ကံၚ်ဇြဳပၞာန် ကလေၚ်ပန်လဝ် နွံကီုလေဝ် ပရေၚ်ဇီုကပိုက်ဒးဟၟဲမွဲသာ် က္လေၚ်ဆုတ်တိတ်မာန်လဝ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပေါဲဗတိုက်ဏံဂှ် အလဵုအသဳညဳသၟဟ်ကောန်ဂကူ၊ ဌာနဝန်ဇၞော်ပရေၚ်စဵုဒၞာ၊ တံဒပ်လၟိဟ်-(၄) (Eagle Force) ရးဒေသပၞာန်စၟတ်(၁) ခရိုၚ်တယျေတ်၊ ဒပ်ဒမၠုက်ဂဂဵုတး ကေုာံ ဒပ်လေတ်ယုမ်ကွးဘာ (S.A.F)တအ် ပံၚ်တောဲဗတိုက်လဝ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)