ကျာ်ထဝ်- ဂျူလာၚ် ၃၁
အပ္ဍဲတွဵုရးမန် ပွိုၚ်ဍုၚ်ကျာ်ထဝ် ဍုၚ်တိၚ်ဇယျာတ် တၞုၚ်ဂၠံၚ် ပေ ၈၀ ဗ္ဒာဲဇြပ်သဘၚ်ဓဝ်ဂှ် သၟတ် ၇ တၠ အာကြေဝ်ဝေၚ် ပ္ဍဲတ္ၚဲသဳဒဂိုန်ပေၚ် တံ ဒးဒုၚ်ရပ်ဏာ သွက်ဂွံယိုက်ဝန်ပၞာန်ရောၚ် ညးလ္တူဍုၚ်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အပ္ဍဲဂိတုဂျူလာၚ် ၂၉ တေံ ဂကောံပံၚ်တောဲ ဒပ်ပၞာန်ကဵုဒပ်မၚ်ကွာန် ဇြဟတ် ၂၀ ပြၚ်တံ ဒၞာဲတၞုၚ်ဂၠံၚ် ပေ ၈၀ ဗ္ဒာဲဇြပ်သဘၚ်ဓဝ်ဂှ် ကၟာတ်တာဒၞာကွဳလိုန်ဓါတ်ကဵုကွဳစက်တံတုဲ ရပ်ဏာလဝ် သၟတ်လုပ်အဝေါၚ် ယိုက်ဝန်ပၞာန်တံဂှ်ရောၚ်။
သၟတ်အာကြေဝ်ဝေၚ် ပ္ဍဲတ္ၚဲသဳဒဂိုန်ပေၚ်တံဂှ် ဂကောံပံၚ်တောဲ ဒပ်ပၞာန်တံ စၟဳစၟတ်တုဲ ရပ်ကော်ပတိုန်ဏာ လတူကွဳစက် မွဲတဲဓဝ်ရောၚ် ညးမံၚ်လ္တူဍုၚ်တံ ဟီုရ။
သၟတ်နူအရာပ်စၟတ် ၃၊ စၟတ် ၄ ကဵု အရာပ်စၟတ် ၇ နူဍုၚ်တိၚ်ဇယျာတ်တံ ဒဒုၚ်ရပ်ဏာတုဲ သီုကဵုသၟတ်နူကဵုကွာန်တံလေဝ် ပါလုပ်မံၚ်ကီုရောၚ် သ္ဂးရ။
သၟတ်ဒးဒုၚ်ရပ်လဝ်တံဏံ ထိၚ်ချုက်ခြိုၚ်စွံလဝ် ပ္ဍဲဗ္ဒိုပ်ဗၠာဲသၟိၚ် တိၚ်ဇယျာတ်တုဲ အခေါၚ်ဆဵုကဵု ရဲကၟိန်သ္ၚိဌာန်ညးတံလေဝ် ဟွံကဵုလဝ်ပုဟ် ဂွံတီရ။
သွက်ဂွံပလံၚ် ဘာယိုက်ဝန်ပၞာန် လၟေၚ် ၂၇ ဂတဏံဂှ် ဂကောံဒပ်ပၞာန်ကဵုဒပ်မၚ်ကွာန် ပွိုၚ်ဍုၚ်ကျာ်ထဝ် ဗက်ရပ်မံၚ်သၟတ်တံဆက်က်တုဲ ပကောံကေတ်မံၚ်ကောန်ပၞာန်အိုတ်ရ။
အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်မ်ပကောံဂွံလဝ်မ္ဂး ပ္ဍဲတွဵုရးမန် ဒပ်ပၞာန်ပံက်လဝ်ဘာယိုက်ဝန်ပၞာန် လၟေၚ်ဂိတု နူလၟေၚ် ၁ စဵုကဵုလၟေၚ် ၂၆ ဏံဂှ် မၞိဟ်ဒးဒုၚ်ပကောံဏာ သွက်ကောန်ပၞာန်တၟိ နွံကၠုၚ် ၅၄၀၀ ပြၚ်အာယျ။
ပရိုၚ် – သြၚ်လောန်တိုၚ်မ်
Photo – Social Media