လံၚ်လုၚ်- ဂျူလာၚ် ၃၁
အပ္ဍဲရးတၞၚ်သဳ ပွိုၚ်ဍုၚ်လံၚ်လုၚ် ဒပ်ပၞာန်သီအဝဵုတံစကာလဝ်ဇြဟတ်ပၞာန်ဂၠိုၚ်ၚ် ထပက်မံၚ်ကရောၚ်ပၞာန်တံတုဲ ညးဒေသ ၈၀၀၀ ပြၚ် ဒးထောံဌာန်ဒၞာဲဒးဂြိပ်ပါဲမံၚ်ဘဲပၞာန်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကရောၚ်ပၞာန် ဒပ်ပၞာန်သီအဝဵု ၃ ကရောၚ် ဇြဟတ်ၜိုတ် ၅၀၀ တံဂှ် စနူဂိတုဂျူလာၚ် ၂၈ တေံတုဲ နူပွိုၚ်ဍုၚ်လံၚ်လုၚ် ပတဝ်ဏာက္ဍိုပ် ဍုၚ်တြေံ၊ မံၚ်မကာန်ကေုာံ ကွာန်သောန်တံၚ်မန်တံတုဲ လုပ်ကၠုၚ်လဝ်ရ။
ကရောၚ်ပၞာန်ဗမာတဂှ် ထ္ၜးဟိုတ်ကဵုဂြိပ်တိတ်တုဲ ပန်ဂစိုတ်လဝ် မံၚ်ဗိုလ်ဖျူ အာယုက် ၁၆ သၞာံ ရဲကွာန်ဍုၚ်တြေံ၊ ဇွဂှ် ထောံကၠဟ်လဝ် လ္တူဂၠံၚ် အတိုၚ်ဏံရ။
ဟိုတ်နူကရောၚ်ပၞာန် ထပက်လုပ်ကၠုၚ်တုဲ ကွာန်ဍုၚ်တြေံ၊
မံၚ်မကာန်၊ သောန်တံၚ်မန်၊ သခါန်ဂျဳ၊ မေဝ်အုၚ်လှ၊ ပါန်တေန်အေၚ်၊ တၟအ်စိၚ်၊ တံၚ်မေန်ပျံၚ် သီုဖအိုတ် ၁၀ ကွာန်ပြၚ်ဂှ် ညးဒေသ ၈၀၀၀ ပြၚ်တံ ဒးဂြိပ်ပါဲမံၚ် ဘဲပၞာန်အိုတ်ရ။
ပ္ဍဲဂိတုဂျူလာၚ် ၂၉ ဂှ်လေဝ် ကရောၚ်ပၞာန်ဏံ စံၚ်ပလီုလဝ်သ္ၚိ ကွာန်တံၚ်မေန်ပျံၚ် ၇ မ ၊ သ္ၚိကွာန်ဍုၚ်တြေံ ၁ မ သီုဖအိုတ် သ္ၚိ ၈ မ နွံတုဲ ကၠာဟွံစံၚ်ဏီဂှ် ကပေါတ်နွံၚုဟ်မးနွံနွံအပ္ဍဲသ္ၚိတံဂှ် ကောန်ပၞာန်ဗမာတံ ဖံက်ဂၠံက်ကေတ်ဏာလဝ်အိုတ်ရ။
အတိုၚ်ဂကောံပၠန်ဂတးတံ ဟီုဂှ်မ္ဂး ကရောၚ်ပၞာန် ၃ ကရောၚ်ဏံ စနူဂိတုဂျူလာၚ် သတ္တဟကၠာအိုတ်တေံ နူကဵုကိုန်အစဳဇန် သၞေဟ်ၜၚ်ဇြိုဟ်ထဝါဲ ပွိုၚ်ဍုၚ်ဍာ်ဗုတံဂှ် ထပက်ကရောၚ်ပၞာန်လုပ်ကၠုၚ်လဝ် ပွိုၚ်ဍုၚ်လံၚ်လုၚ်တံရောၚ် ဂွံတီရ။
အပ္ဍဲဂိတုဂျူလာၚ် ၉ တေံလေဝ် ပ္ဍဲဒေသသၞေဟ်ၜၚ်ဇြိုဟ်ထဝါဲဂှ် က္ဍိုပ်သ္ကိုပ်ဂကောံ The Ants – Tanintharyi ၃ တၠ ကဵုမံၚ်ပရေၚ်ရီုဗၚ် ဆေင်စပ်ကဵုပရေၚ်ပညာကဵုပရေၚ်ဘဲပၞာန်တံတုဲ ကရောၚ်ပၞာန်ဏံရပ်ဂစိုတ်လဝ်ရောၚ် ဂွံတီလဝ် နူညးဒေသတံရ။
ပရိုၚ် – သြၚ်လောန်တိုၚ်မ်
Photo – CJ