ဗြဝတဳ- ဂျူလာၚ် ၃၁
အပ္ဍဲတွဵုရးကရေၚ် လပါ်သၠုၚ်ကျာ ပွိုၚ်ဍုၚ်ဗြဝတဳ ဒေသဖလူ ပေါဲဗတိုက်က္တဵုဒှ်မံၚ်အကြာၜါလပါ်ဂှ် ညံၚ်ကောန်ပၞာန် DKBA တံ ဟွံဂွံပါလုပ်အာ နူရုၚ်သ္ကိုပ်က္ဍိုက်ပ်ပၞာန်ဗဟဵု DKBA (သုၚ်သဳမျာၚ်) ပတိတ်လဝ်အမိၚ်တာဒၞာ ဗဒေါအ်လဝ်ရ။
အတိုၚ်အမိၚ် ပ္ဍဲစၟတ်တ္ၚဲ ဂျူလာၚ် ၂၉ ဂှ်မ္ဂး ကောန်ပၞာန် DKBA တံဝွံ ပ္ဍဲပရေၚ်ပဋိပက္ခပၞာန်က္တဵုဒှ်မံၚ် ဒေသဖလူဂှ် ညံၚ်ဟွံဂွံပါလုပ်အာကီု၊ ယဝ်ရဆက်စပ်ပါလုပ်လဝ်မ္ဂး ကေတ်အာအရေဝ်ပိုတ်တ်ရောၚ် ကဵုလဝ်သတိရ။
အမိၚ်တာဒၞာကောန်ဒပ် DKBA တံ ညံၚ်ဟွံဂွံပါလုပ်ပရေၚ်ပဋိပက္ခပၞာန် ဒေသဖလူဂှ်တှ်ေ ဒှ်အမိၚ်နူကမ္မတဳ ကေၚ်ကာဗဟဵု CEC ဗော်ဒဳမဝ်ကရေသဳ ပတုဲဖဵုကရေၚ် DKBA ပတိတ်လဝ်ရောၚ်။
DKBA ကဵု ကမ္မတဳပ္ညဳပ္ညပ်ထမံက်ရုပ်ရဴညဳသၟဟ်ဂကူကဵု ပရေၚ်ၜိုဟ်လလမ် (NSPNC) ဒပ်ပၞာန်ဗၟာတံ ပ္ဍဲဂိတုဂျူလာၚ် ၉ လောန်ကၠုၚ်ဏံ ဆဵုဂဗသဳကၠဳလဝ် ပရေၚ်ၜိုဟ်လလမ် ပ္ဍဲနေပျဳဒဝ်တုဲ ကြဴနူ ၃ သတ္တဟဏံ ပတိတ်ကၠုၚ်အမိၚ် မဒှ်ရ။
အမိၚ်တာဒၞာလဝ်ဏံဂှ် ပ္ဍဲပရေၚ်ပၞာန်အကြာၜါလပါ်ဏံမ္ဂး ထမံက်ထ္ၜးမံၚ်လစွံစိုတ် နူကဵု DKBA နွံမံၚ်ဒၞာဲလဒေါဝ်ရောၚ် ညးသ္ၚဳဂၠိပ်သွာၚ်ပၞာန်တံ ဟီုရ။
ဒပ်ပၞာန်သီအဝဵုတံဂှ် သွက်ဂွံကလေၚ်သီကေတ်အာ ဗ္ဒိုပ်ပၞာန်ညးတံဒးဒုၚ်သီလဝ် ပ္ဍဲဇိုၚ်ပယျဵု လပါ်သၠုၚ်ကျာဍုၚ်ဗြဝတဳဂှ်တုဲ စနူသၞာံတုဲကၠုၚ်တေံ ၜိုန်ရထပက်မံၚ်ကရောၚ်ပၞာန် ဇၞော်ကဵုဇြဟတ်ကီုလေဝ် စဵုကဵုလၟုဟ်ကလေၚ်သီဂွံလဝ် ဟၟဲဏီပုဟ်။
အပ္ဍဲဒေသဖလူ လပါ်သၠုၚ်ကျာဗြဝတဳဏံ ဒပ်ပၞာန်ဗၟာပံၚ်တောဲကဵု ဒပ်မၚ်ပယျဵု BGF၊ ဂကောံ ဗိုလ်ဗိ DKBA ပါ်တိတ်တံဗတိုက်မံၚ်ကီုလေဝ် ပ္ဍဲပေါဲဗတိုက်တံဂှ် ဒးဝပ်ချိုတ်ဂၠိုၚ်မံၚ်ရောၚ် ရိုဟ်ကၞက်ပရိုၚ်ဒေသတံ ဟီုလဴကဵုလဝ်ရ။
ပရိုၚ် – သြၚ်လောန်တိုၚ်မ်
Photo – DKBA