ဍာ်ဗု၊ မာတ်ချ် (၁၇)
ရုၚ်လဝက ဌာနက္ဍိုက်ပ်ကောပ်ကာဲပရေၚ်မၞိဟ်လုပ် ကေုာံ ဇြဟတ်ညးဍုၚ်ကွာန် ပွိုၚ်ဍုၚ်ဍာ်ဗု မၞုံအရာပ်ဂၚါ၊ ဍုၚ်ဍာ်ဗု၊ ရးဒေသဇၞော်တၞၚ်သဳဂှ် ဟိုတ်နူဒးဒုၚ်စံၚ်ပလီုလဝ်ဂှ်ရ ပၟတ်တူလီုလာ်အာလဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမာတ်ချ် (၁၅) ၜိုတ်အခိၚ်ဗ္တံ (၇) နာဍဳဂှ် ဂကောံရပ်လွဟ်ဟွံတီယၟုမွဲဂကောံ ကၠုၚ်စိုပ် ရုၚ်လဝက ပွိုၚ်ဍုၚ်ဍာ်ဗုတုဲ စံၚ်ပလီုဏာလဝ်ရ။
ဟိုတ်နူဒးဒုၚ်စံၚ်ဂှ်ရ စမြိုၚ်ရုၚ်လဝက ကြပ်ဗ္ဒါဲမွဲမ ပၟတ်တူလီုလာ်အာလဝ်တုဲ လိက်တၞးစၟတ်သမ္တီတံလေဝ် ပၟတ်တူလီုလာ်အာလဝ်ဂှ် ဂွံတီကေတ်ရ။
ညးမၞုံအခေါၚ်ဟီုဂး ကံၚ်ဇြဳပၞာန် ရးတၞၚ်သဳဂှ် ဟိုတ်နူပရေၚ်ရုၚ်လဝက ပၟတ်တူဂှ်တုဲ တၚ်နၚ်တၞးကာဒ်ကောန်ဍုၚ် ကေုာံ စရၚ်သ္ၚိကၟိန် မွဲကိုဋ်ပြၚ် ပၟတ်တူလီုလာ်အာလဝ်ရောၚ်ဂှ် ဟီုဂးလဝ်ရ။
ပ္ဍဲကဵုပရေၚ်လုပ်စိုပ်ဍိုက်ဗ္တိုက် ရုၚ်လဝက နူကဵုဂကောံရပ်လွဟ်မွဲဂကောံဂှ် သၞာဲဒဴရုၚ်ဂမၠိုၚ် ဟိုတ်နူဂြိပ်တိတ်အာဂှ်ရ ကလိဂွံဝပ်ဇီုကပိုက်ဒး ဟွံမွဲပုဟ်ဂှ် သ္ဂးရ။
ဒဒှ်မရုၚ်လဝက ပွိုၚ်ဍုၚ်ဍာ်ဗု ပၟတ်တူလီုလာ်အာဂှ် ဂကောံလဵုကၠောန်လဝ်ရောဟီုဂှ် ဒဵုကဵုအခိၚ်လၟုဟ် လလောၚ်ပ္တိတ်လဝ် ဟွံမွဲဏီရ။
ပ္ဍဲကဵုသၞာံတုဲကၠုၚ် ဂိတုမေတေံ ဟိုတ်နူဗ္ဒါဲရုၚ်လဝက ပွိုၚ်ဍုၚ်ဍာ်ဗုဂှ် ဗုမ်ဗ္တိုဟ်က္တဵုဒှ်လဝ်တုဲ ဇီုကပိုက်ဒးဟွံမွဲကီုလေဝ် ပ္ဍဲကဵုပရေၚ်ရုၚ်ဂကောံဒပ်ဂီုကၠီု ကေၚ်ကာပရေၚ်ပၞာန် (စရဖ) ဍာ်ဗု ဒးဒုၚ်ဖံက်ဗ္တိုဟ်ဗုမ် ပ္ဍဲဂိတုဂျူလာၚ်တေံဂှ် ကြပ်ဗ္ဒါဲစမြိုၚ်မွဲမ ပၟတ်တူလီုလာ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ