နေဗျဳဒဝ်၊ မာတ်ချ် (၁၇)
သွက်ပေါဲရုဲမာဲ ကံၚ်ဇြဳပၞာန် မဂ္စါန်ဒၟံၚ် သွက်ဂွံကၠောန်ဗဒှ်ဂှ် နူဂိတုဖေဖဝ်ဝါရဳ (၁) စဵုကဵု ဂိတုမာတ်ချ် (၁၅) ဂှ် ဗော်ပရေၚ်ဍုၚ်ကွာန် မအာတ်ပ္တိုန်လဝ် အခေါၚ်ပ္တိုန်စရၚ် ကေုာံ အခေါၚ်ဒက်ပ္တန်ဗော်တံဂှ် နွံကၠုၚ် (၂၆) ဗော်ယျရောၚ် ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒတံရ။
သွက်အခေါၚ်ဒက်ပ္တန်ဗော် ကေုာံ အခေါၚ်ပ္တိုန်စရၚ်တံဂှ် အပ္ဍဲမွဲၜါတ္ၚဲဏံ ဗော်ပရေၚ်ဍုၚ်ကွာန်လ္ၚဵုတံ အာတ်ပ္တိုန်ကၠုၚ် ဇရေၚ်ကဝ်မယှေန်ပေါဲရုဲမာဲကၟိန်ဍုၚ်ကံၚ်ဇြဳပၞာန် (UEC) ဂှ် အဆက်က်တုဲ တ္ၚဲဒးပ္တိုန်စရၚ်တံဂှ်လေဝ် သှ်ေ (၁၀) တ္ၚဲပြၚ်ဓဝ်ရ။
အတိုၚ်ၝောံပိုဒ် (၂၅) သၞောဝ်ဒးပ္တိုန်စရၚ် ဗော်ပရေၚ်ဍုၚ်ကွာန်တံဂှ်မ္ဂး ဗော်ဂကောံဇြဟတ်ကောန်ဂကူ တွဵုရးရခေၚ်၊ ဗော်ပၠတရဴညးဍုၚ်ကွာန် ကေုာံ ဗော်ညဳသၟဟ်မန် မမိက်သ္ဂောံဆက်ဒက်ပ္တန်ဗော် နဒဒှ်ဗော်ပရေၚ်ဍုၚ်ကွာန်တံဂှ်ဝွံ ပ္ဍဲဂိတုမာတ်ချ် (၁၅) တေံ အာတ်မိက်ပ္တိုန်လဝ် အခေါၚ်ပ္တိုန်စရၚ်ဗော်ဂှ် ကံၚ်ဇြဳပၞာန် လလောၚ်ပ္တိတ်ကၠုၚ်ရ။
လအာတုပ်သာ်ဂှ်ကီု ဗော်တောတက်ဖောအ်ဗြေဝ်ကောန်ဂကူခမဳ(ခမီ) ကေုာံ ဗော်ဒဳမဝ်ကရေဇြဳ ကောန်ဂကူကောန်ဍုၚ်အရၚ် မညဳသၟဟ်တံဂှ်လေဝ် ပ္ဍဲဂိတုမာတ်ချ် (၁၄) ဂှ် ပ္တိုန်လဝ် အခေါၚ်ပ္တိုန်စရၚ်ဗော်တံရ။
ပ္ဍဲကဵုပရေၚ် မအာတ်မိက်လဝ် အခေါၚ်ပ္တိုန်စရၚ် ကေုာံ အခေါၚ်ဒက်ပ္တန်ဗော်တံဂှ် ဗော်မစန်ဒက်အာ အလုံကၟိန်ဍုၚ်ဂှ် (၆) ဗော်၊ ဗော်မစန်ဒက်အာ ပ္ဍဲကဆံၚ်တွဵုရး ဟွံသေၚ်မ္ဂး ပ္ဍဲကဆံၚ်ရးဒေသဇၞော်သၟးတံဂှ် နွံဒၟံၚ် (၂၀) ရ။
ကံၚ်ဇြဳပၞာန်ဂှ် ကၠုၚ်စိုပ်ဂိတုမာတ်ချ် (၂၈) ဏံ စွံလက္ကရဴအိုတ်တုဲ သွက်ဂွံအာတ်ပ္တိုန်လဝ် အခေါၚ်ပ္တိုန်စရၚ်ဗော် ကေုာံ အခေါၚ်ဒက်ပ္တန်ဗော်တံဂှ်ကီု၊ ဗော်ဟွံအာတ်ပ္တိုန်လဝ်တံဝွံ အတိုၚ်သၞောဝ်မ္ဂး လီုအာအလဵုလဵုဍေံရောၚ်ဂှ် လလောၚ်တြးလဝ် ပ္ဍဲဂိတုမာတ်ချ် (၁၆) တေံရ။
အလဵုအသဳညဳသၟဟ်ဂကူ (NUG) ဂှ်လေဝ် တၚ်ထ္ၜးဟိုတ်သာ်လဵုနွံနွံ ဗော်ပရေၚ်ဍုၚ်ကွာန် မပ္တိုန်လဝ်စရၚ် ဇရေၚ်ကံၚ်ဇြဳပၞာန်တံဂှ် ကေတ်အာအရေဝ်ရောၚ် ပ္ဍဲဂိတုမာတ်ချ် (၁၅) တေံ လလောၚ်တြးလဝ်ကီုလေဝ် ရေၚ်တၠုၚ်အာ နဗီုပြၚ်လဵုရောဟီုဂှ် လလောၚ်တြးလဝ် ဟွံမွဲဏီရ။
ပရိုၚ်−သြၚ်လောန်တိုၚ်(မ်)
ဗီုဓာတ်− MOI