မတ်မလီု-မာတ်ချ်(၁၇)
ပ္ဍဲပရေၚ်ပၠန်ဂတးက္ညၚ် ဒစဵုဒစးကဵုတၠအဝဵုပၞာန်ဂှ် ဟွံထံက်ရံၚ်ကဵု ညးဍုၚ်ကွာန်တုဲ ယဝ်ရညးသစ္စလီု လ္တူပရေၚ်ပၠန်ဂတးနွံကၠုၚ်မ္ဂး အတိုၚ်နဲကဲစဳမာန်ဖန်ဇန် ရေၚ်တၠုၚ် ကေတ်အာအရေဝ်ရောၚ်ဂှ် သ္ကိုပ်ဝန်ဇၞော်မာန်ဝေန်ခိုၚ်တာန် ဟီုသ္ဂးလဝ်ရ။
ပ္ဍဲကောံဓရီုဂကောံအလဵုအသဳ မရနုက်ကဵု (၁၀)ဝါ အလဵုအသဳပရေၚ်ညဳသၟဟ်ကောန်ဂကူ မကၠောန်ဗဒှ်လဝ် ပ္ဍဲဂိတုမာတ်ချ် စၟတ်တ္ၚဲ (၁၄)ဂှ် ပ္ဍဲအခိၚ်ကၠောန်ရေၚ်တၠုၚ် ကမၠောန်ပရေၚ်အုပ်ဓုပ်တအ်ဂှ် ညံၚ်ဂွံကဵုပရေၚ်ရေၚ်တၠုၚ် သွက်ညးဍုၚ်ကွာန်တအ် ခိုဟ်ဟ်မာန်၊ သွက်ဂွံစဵုဒၞာကဵုမာန် ကေုာံ ထံက်ရံၚ်ကဵုညးဍုၚ်ကွာန်တုဲ သွက်ဂွံကၠောန်ရေၚ်တၠုၚ်အာ ဃောဖ္အောဝ်ဗတိုက်ဒၟံၚ်ဂှ် ဟီုသ္ဂးလဝ်သာ်ဏံရ။
“ဟွံထံက်ရံၚ်ကဵုညးဍုၚ်ကွာန်တုဲ ယဝ်ရ ညးသစ္စလီု လ္တူပရေၚ်ပၠန်ဂတးနွံကၠုၚ်ဏောၚ်လေဝ် အတိုၚ်နဲကဲဂၠံၚ်ဍာန်စဳမာန်ဖန်ဇန် ကေတ်အာအရေဝ် ရေၚ်တၠုၚ်အာဏောၚ်၊ ပိုဲဂှ် ၜိုန်ရဒှ်အလဵုအသဳပၠန်ဂတးကီုလေဝ် ပ္ဍဲယန္တရာစဳမာန်ဖန်ဇန်လေဝ် ညံၚ်ဂွံဗ္ဂေတ်အာ သၞောတ်စှ်ေစှ်ေ ဇြဟတ်ခိုဟ်ဟ်မာန် ဒးပ္တိတ်အာဇြဟတ်ရောၚ်” ဂှ် သ္ကိုပ်ဝန်ဇၞော် မာန်ဝေန်ခိုၚ်တာန် ဟီုသ္ဂးလဝ်ရ။
သ္အာၚ်နူဂှ်ပၠန် သွက်ပရေၚ်ပၠန်ဂတးဂှ် အတိုၚ် One Year Plan သွက်ဂွံဒးပလေဝ်ပလေတ်ကဆံၚ်ကဆံၚ်လေဝ် ဟိုတ်နူဒှ်ဒၟံၚ်အကာဲအရာ ကဵုဖျုန်စဳမာန်ရေၚ်တၠုၚ်ဒၟံၚ်ဂှ်ရ ကဏ္ဍဒးပ္တိတ်ဇြဟတ်တအ်ဂှ် ပါ်ပ္တိတ်တုဲ သွက်ဂွံစဳမာန်ဖန်ဖက်အာလေဝ် ဗတိုက်ဖ္အောဝ်လဝ်ရ။
သီအဝဵုတုဲ လအ်ကၠုၚ်စဵုကဵု(၂)သၞာံ သုၚ်စောဲလွဟ်တုဲ ပ္ဍဵုပ္ဍိုက်ပျဲပျာံဒၟံၚ် ညးဍုၚ်ကွာန် နဲကဲစုၚ် ပြိုက်ဂစိုတ်ဒၟံၚ်ကီုလေဝ် ကံၚ်ဇြဳပၞာန် ထိၚ်ဒဝ်ကၟိန်ဍုၚ်ဟွံမာန်ဂှ် ပ္ဍဲဂိတုဏံ ဟိုတ်နူကဵုကၠုၚ်ဒဒိုက် ကုညးဍုၚ်ကွာန်တအ် နစိုတ်ပၞောတ်ဇၞော်ဇၞော်ဂှ်ရ သွက်ဂွံစဵုဒၞာအာ ညးဍုၚ်ကွာန်တအ် ဒးပ္တိတ်ဇြဟတ်ရေၚ်တၠုၚ်အာရောၚ်ဂှ် သ္ကိုပ်ဝန်ဇၞော် ဟီုလဝ် ကုဂကောံအလဵုအသဳရ။
အလဵုအသဳ NUG ဂှ် မွဲလ္ပာ်ဂှ် ဝေၚ်ဒၟံၚ်ပၞာန်ဒုၚ်ဒဝ်တဝ်စၞေဟ်တုဲ ဃောရေၚ်တၠုၚ်ဒၟံၚ် နဒဒှ်အလဵုအသဳစဵုဒၞာကဵုဒၟံၚ်ညးဍုၚ်ကွာန် မွဲတန်ဂှ် မွဲလ္ပာ်ပၠန်လေဝ် ဗွဲမဗဗွဲကဵုဒေသတိဍာ် ဓမံက်ပ္တိုန်ဒၟံၚ်ယန္တရာပရေၚ်အုပ်ဓုပ်တုဲ အခိၚ်ပ္တိတ်ဒၟံၚ်ဇြဟတ် နဒဒှ်အလဵုအသဳရေၚ်တၠုၚ်ကဵု သွက်ညးဍုၚ်ကွာန်ဂှ် အခက်ခုဲတမ်ရိုဟ်မၞိဟ်၊ တမ်ရိုဟ်သြန်ဘဏ္ဍာ မၞုံဒၟံၚ်ဗွဲမဂၠိုၚ်ရဂှ် သ္ဂးလဝ်ရ။
ကောံဓရီုဂကောံအလဵုအသဳပရေၚ်ညဳသၟဟ်ကောန်ဂကူဂှ် သမ္မတယာယဳ ဒူဝါလယှဳလ၊ သ္ကိုပ်ဝန်ဇၞော်မာန်ဝေန်ခိုၚ်တာန်ကီု သီုဝန်ဇၞော်ကၟိန်ဍုၚ် ကေုာံညးတာလျိုၚ်ဂမၠိုၚ်တိုန်စိုပ်လဝ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)