မတ်မလီု-မာတ်ချ်(၁၇)
နူသၞာံ ၂၀၂၁ ဂိတုဖေဖဝ်ဝါရဳ စၟတ်တ္ၚဲ (၁) ဒပ်ပၞာန်သီအဝဵို ကၟိန်ဍုၚ်ဗၟာတုဲ စဵုကဵုသၞာံ ၂၀၂၃ ဂိတုမာတ်ချ် စၟတ်တ္ၚဲ (၁၃)ဏံ ဒပ်ပၞာန်ကလိလောန်လဝ် ဂဗုတ်ပြိုက်ဂစိုတ်လဝ် ဗွဝ်ကဵုဗွဝ် စဵုကဵု(၆၄)ဝါနွံတုဲ ဟိုတ်နူပရေၚ်ဒဒှ်ဏံဂှ် ညးဍုၚ်ကွာန် (၇၆၆) တၠ ဒးချိုတ်အာလဝ်ရဂှ် ဌာနဝန်ဇၞော်အခေါၚ်အရာမၞိဟ် NUG လလောၚ်တြးလဝ် ပရိုၚ်ရ။
ပရေၚ်ပရောပရေၚ်ကံၚ်ဇြဳပၞာန် ပြိုက်ဂစိုတ်လဝ်ဗွဝ်ကဵုဗွဝ် ပ္ဍဲသၞာံ ၂၀၂၁ ဂှ် (၉)ဝါ ညးဍုၚ်ကွာန် (၁၄၇) တၠ ဒးချိုတ်လဝ်တုဲ ပ္ဍဲသၞာံ ၂၀၂၂ ဂှ်မ္ဂး ပရေၚ်ပရော (၄၄)ဝါ ညးဍုၚ်ကွာန် (၅၁၅)တၠ ကေုာံ သၞာံ ၂၀၂၃ စဵုကဵုဂိတုမာတ်ချ် စၟတ်တ္ၚဲ (၁၃)ဂှ် ဂဗုတ်ပြိုက်ဂစိုတ်လဝ် ဗွဝ်ကဵုဗွဝ် (၁၁)ဝါ ညးဍုၚ်ကွာန် (၁၀၃)တၠ ဒးချိုတ်ကၠုၚ်ရ။
ပ္ဍဲကဵုဂှ် မၞိဟ်တြုံ (၄၈၂) တၠ မၞိဟ်ဗြဴ (၇၈)တၠ ကေုာံ ပါ်ပါဲဟွံဒး (၂၀၆)တၠပါလုပ်ဒၟံၚ်တုဲ ညးအာယုက်ဇၞော် လ္တူ(၆၀)သၞာံ (၄၂)တၠကေုာံ ကောန်ၚာ် အာယုက် သၟဝ်(၁၈)သၞာံ (၆၂)တၠ ပါလုပ်ဒၟံၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပ္ဍဲပရေၚ်ပရောပြိုက်ဂစိုတ်ညးဍုၚ်ကွာန်ဗွဝ်ကဵုဗွဝ်တအ်ဂှ် ပရေၚ်ပရော ပန်ပှော်နကဵုက္ၜၚ်ကျာ က္တဵုဒှ်ကၠုၚ်လဝ်ပ္ဍဲတွဵုရးကချေၚ်၊ ဍုၚ်ဖာက ကွာန်အနာန်ပါ ညးဍုၚ်ကွာန် (၈၀)တၠ ဒးချိုတ်အာဂှ် ဒှ်ဂၠိုၚ်အိုတ်ရ။
စပ်ကဵုပရေၚ်ပရောဏံတုဲ နကဵုအလဵုဌာနဝန်ဇၞော်အခေါၚ်အရာမၞိဟ် NUG သွက်ဂွံကေတ်အရေဝ် ကဵုဒုဟ်ဒဏ် ကုကံၚ်ဇြဳပၞာန် က္လိလောန်ဒၟံၚ်ဒုဟ်ရာဇဝတ်ကၟိန်ဍုၚ်နာနာ ပ္တိတ်ဒၟံၚ်ဇြဟတ်ရဂှ် ဟီုသ္ဂးလဝ်ရ။
ကံၚ်ဇြဳပၞာန်ဂှ် ပန်ပှော်ဖျေံလွဟ်ဇၞ်ော ပ္ဍဲကွာန် ဒၞာဲညးဍုၚ်ကွာန်တအ် မံၚ်တန်တဴဒၟံၚ် သီုရန်တၟံနွံနွံကီု၊ ပန်ပှော်ဒၟံၚ် နက္ၜၚ်ကျာကီုတအ်ဂှ် ကၠောန်သ္ပဒၟံၚ်လၟိုန်ရ။
ဟိုတ်နူကံၚ်ဇြဳပၞာန်သီအဝဵုတုဲ အလုံမွဲကၟိန်ဍုၚ် ဒးဒုၚ်ပြိုက်ဂစိုတ်ပ္ကီုပရာပ်တုဲ ညးဒးချိုတ်အာ စဵုကဵု (၃၁၂၄)တၠနွံကၠုၚ်ဒၟံၚ်ရဂှ် ဂကောံမၚ်မွဲရံၚ်စံၚ် ကောန်ထံၚ်ပရေၚ်ဍုၚ်ကွာန် AAPP လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)