ကျာ်ထဝ်၊ မာတ်ချ် (၁၈)
ဟိုတ်နူဒပ်ကံၚ်ဇြဳပၞာန် ပန်ပှော်စုတ် လွဟ်ဇၞော် အပ္ဍဲကွာန်ဇြဳပျံၚ်၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန် ကြာန်န်ဂှ်ရ ကောန်ကလောန်ကၠအ်ထၜိုတ်မွဲတၠ ကလိဂွံလဝ်ဝပ်ဂှ် ဂွံတီကေတ် နူကဵုကမ္မတဳကောပ်ကာဲကေၚ်ကာမိတ် ခရိုၚ်သဓီု KNU ရ။
ပ္ဍဲဂိတုမာတ်ချ် (၁၆) ၜိုတ်ဇိုၚ်သဝ်တ္ၚဲ (၄) နာဍဳဂှ် ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ အာစိုပ်ဗ္တိုက်လဝ် နကဵုဒရုၚ် ကုဒပ်ကံၚ်ဇြဳပၞာန် မဖျေံလဝ်သ္ဇိုၚ် ဗ္ဒါဲသုသာန်လက်ပါန်ပေန်၊ ကွာန်အေန်ဂဗိုဝ်၊ ပွိုၚ်ဍုၚ်ကျာ်ထဝ်ဂှ်ရ။
ကြဴနူပရေၚ်ဗ္တိုက်ဂှ်တုဲ ပ္ဍဲကဵုတ္ၚဲဂှ် ၜိုတ်အခိၚ်ဗ္တံ (၈) နာဍဳ နူကဵုတမ်ဒပ်တိုက် ခမရ (၂၀၇) မဖျေံသ္ဇိုၚ်ဒုၚ်ဇြယိတ်ဂှ်ကဵု နူကဵုဒပ်အမၠံက်ကံၚ်ဇြဲပၞာန် စၟတ် (၃၁၀) မဖျေံသ္ဇိုၚ်ကျာ်ထဝ်တံ ပန်ပှော်စုတ်လဝ် လွဟ်ဇၞော် အပ္ဍဲကွာန်ဇြဳပျံၚ် (၅) လစုတ်ဟွံကရ။
ဟိုတ်နူဒပ်ကံၚ်ဇြဳပၞာန် ပန်ပှော်စုတ် လွဟ်လက်နက်ဇၞော် ကြာန်န်ဂှ်ရ ဒတုံဗ္တိုဟ်ထ္ကးအာလဝ် အပ္ဍဲကၠအ်ထၜိုတ် ကွာန်ဇြဳပျံၚ်တံဂှ်တုဲ ကောန်ကလောန်ကၠအ်ထၜိုတ်မွဲတၠ ကလိဂွံလဝ်ဝပ်ဂှ် ဥက္ကဌကမ္မတဳကောပ်ကာဲကေၚ်ကာမိတ် ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုဒဒှ်မဒပ်ကံၚ်ဇြဳပၞာန် မဖျေံလဝ်သ္ဇိုၚ် ဗ္ဒါဲသုသာန်လက်ပါန်ပေန် ဒးဒုၚ်ဗ္တိုက်ကဵုဒရုၚ်ဂှ် ဆက်ဂၠိုက်ဂၠါဲဒၟံၚ် ပရေၚ်ဇီုကပိုက်ချိုတ်ဂျိုၚ်တံရောၚ်ဂှ် သ္ဂးရ။
ဂကောံဒပ်ကံၚ်ဇြဳပၞာန် ဇြဟတ်ဒပ် (၃၀) ပြၚ်ပါဂှ်ဝွံ ပ္ဍဲကဵုဗ္ဒါဲသုသာန်လက်ပါန်ပေန်၊ ကွာန်အေန်ဂဗိုဝ်ဂှ် ဟိုတ်နူရေၚ်ကွဳစက်ကံၚ်ဇြဳပၞာန်တံ ဒးဒုၚ်ဗ္တိုဟ်ဒၟံၚ်မာၚ် မွဲဏှမွဲဏှဂှ်ရ တုဲကၠုၚ် သၞာံ ၂၀၂၂ သၞာံကြပ်အိုတ်ဂှ် ခါဲက္တိုၚ်ဂဒုက် သိုၚ်ခၞံဗာန်ကာတံတုဲ ဖျေံဒၟံၚ်ဒပ် မံၚ်စံၚ်ဒၟံၚ်ရ။
ပရိုၚ်−သြၚ်လောန်တိုၚ်(မ်)