ဍာ်ဗု၊ မာတ်ချ် (၁၈)
သၞေဟ်ကၚ်စၟဳတ်ကံၚ်ဇြဳပၞာန် မၞုံပ္ဍဲဒဒန်ကလိန်အံၚ်၊ ဍုၚ်ကလိန်အံၚ်၊ ပွိုၚ်ဍုၚ်ဍာ်ဗု၊ ရးဒေသဇၞော်တၞၚ်သဳ ဒးဒုၚ်ဗ္တိုက်ဂှ်ရ ပရေၚ်ဇီုကပိုက်ချိုတ်ဂျိုၚ်တံ နွံမာန်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမာတ်ချ် (၁၆) ၜိုတ်အခိၚ်ဗ္တံ (၉) နာဍဳဂှ် ဂကောံဇြဟတ်ပၠန်ဂတး အပ္ဍဲဒေသတံ လုပ်စိုပ်ဗ္တိုက်လဝ် သၞေဟ်ကၚ်စၟဳတ်ကံၚ်ဇြဳပၞာန် မဖျေံလဝ်ဒပ် ၜိုတ်ဇြဟတ်ဒပ် (၁၅) တၠ မၞုံဂှ်ရ။
ဟိုတ်နူပရေၚ်ဗ္တိုက်ဏံတုဲ ပရေၚ်ပန်ပှော်မွဲလ္ပာ်ကုမွဲလ္ပာ်တံ က္တဵုဒှ်လဝ် ဗ္ဒါဲဘာ်နာဍဳတုဲ အကာဲအရာဇီုကပိုက်ချိုတ်ဂျိုၚ်ၜါလ္ပာ် ဗွဲလစှ်ေတံဂှ် ဆက်ဂၠိုက်ဂၠါဲဒၟံၚ်ဖိုဟ်ရ။
ညးဒေသမွဲတၠဂှ် ကြဴနူပရေၚ်ဗ္တိုက်ဂှ်တုဲ ပ္ဍဲဂိတုမာတ်ချ် (၁၇) အခိၚ်နူဂယး အဃောမတတ်ကၠောံအာကၠုၚ်ဒဒန်ဂှ် ဂွံဆဵုကေတ်လဝ် ဂအုံဆီ ဗ္ဒါဲဂဒုက်စၟဳတ်ကံၚ်ဇြဳပၞာန်တံရောၚ်ဂှ် ဟီုတဴရ။
ကြဴနူသၞေဟ်ကၚ်စၟဳတ်ကံၚ်ဇြဳပၞာန် ဒးဒုၚ်ဗ္တိုက်တုဲဂှ် ပတေၚ်ဂြတ်လဝ် ပရေၚ်ဂီုကၠီု အပ္ဍဲဍုၚ်ကလိန်အံၚ်တုဲ ကုညးမတတ်ကၠောံအာကၠုၚ် လ္တူဒဒန်တံဂှ်လေဝ် ကၟာတ်လဒဵုဂၠိုက်ဂၠါဲစၟဳတ်တံ နွံဒၟံၚ်ဂှ် ဂွံတီကေတ်ရ။
တုဲကၠုၚ် ပ္ဍဲဂိတုအံက်တဝ်ဗာ (၁၄) တေံဂှ်လေဝ် ဟိုတ်နူသၞေဟ်ကၚ်စၟဳတ် မၞုံဒဒန်ကလိန်အံၚ် ဒးဒုၚ်ဗ္တိုက်ဂှ်ရ ကောန်ဂကောံဒပ်ကံၚ်ဇြဳပၞာန် (၄) တၠ ချိုတ်တုဲ (၂) တၠ ကလိဂွံလဝ်ဝပ်ဏီရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ