ဗာလေန် – မာတ်ချ်(၁၉)
အလဵုအသဳဂျာမာန် တာဒၞာလဝ် အဝ်ပရေတာတေဝ်လဳကောန် သုၚ်စောဲသ္ကုတ်လစှ်ေ Huwei ကေုာံ ZTE ကြုက်ပိုၚ် ပရေၚ်လုပ်စိုပ် ပ္ဍဲဇာနှိက် 5G ကၟိန်ဍုၚ်ရဂှ် ဓမံက်ထ္ၜးလဝ် ပ္ဍဲမဳဒဳယာဒေသ မွဲဌာနရ။
နိဿဲကဵုတမ်ရိုဟ်တၚ်ဂၞၚ်ပရိုၚ် အလဵုအသဳကြုက်မွဲတုဲ ဌာန်ပရိုၚ် Zeit Online သွက်ဂွံသုၚ်စောဲဇာနှိက်ဂှ် အရၚ်ဂွံစုတ်အာ အဇာလုပ်စိုပ်ဗ္ဂပ်စုတ် သ္ကုတ်လစှ်ေ ကုမ္ပဏဳတအ်ဏံ နွံဒၟံၚ်ရဂှ် ဓမံက်ထ္ၜးလဝ်ရ။
လၟုဟ်ဏံမ္ဂး အလဵုအသဳဂျာမာန် ဃောရေၚ်တၠုၚ်ဒၟံၚ် သွက်ဂွံခါတ်အကာဲ ပရေၚ်ဆက်ဆောံ မိတ်ပွံၚ်ကူသာန်ဗၞိက်ကြုက် ကဆံၚ်သၠုၚ် သၠဲသၠဲလးလးဂှ် ဖျေံကၠုၚ်ပရေၚ်တာဒၞာပိုၚ်ခြာဗီုဏံတုဲ အကာဲအရာဏံဂှ်လေဝ် သွက်ဂွံကဵုတၚ်သမ္တီဂှ် ဟီုတးပါဲလဝ်ရ။
Huawei ကေုာံ ZTE ဂှ် ပရေၚ်ဆက်စၠောံစုက်လုက်ကဵု ကမၠောန်ပရေၚ်ဂီုကၠီုကြုက် နွံဒၟံၚ်ဂှ် ၜိုန်ရပရေၚ်ဟီုပါ်ပါဲ နွံဒၟံၚ်ကီုလေဝ် ဟိုတ်နူပရေၚ်ဆဝ်ပ္ၚုဟ် ညးမၞုံဝါဒဳ ထံက်ဂလာန်ကဵုညးပြိုၚ်ပ္ကာန် ကြုက်ပိုၚ်ဟွံသေၚ်တအ်တုဲ ဒှ်ကၠုၚ်ရဂှ် ကုမ္ပဏဳဆေၚ်စပ်တအ် ဟီုသ္ဂးလဝ်ရ။
အလဵုအသဳဂျာမာန်ဂှ် စပ်ကဵုတၚ်စဵုဒၞာပိုၚ်ခြာ သွက်ဂွံလလောၚ်တြးပ္တိတ်နွံဒၟံၚ်ဂှ်တုဲ ပရေၚ်ဌာန်ပရိုၚ်ရိုက်တာ အာတ်မိက်လဝ်တၚ်သမ္တီဂှ် ကုမ္ပဏဳတအ်ဂှ် ကလေၚ်ပလန်လဝ်ဟၟဲရဂှ် ဓမံက်ထ္ၜးလဝ် ပ္ဍဲပရိုၚ်မူလတၞံရ။
သၞောဝ်ဥပဒေဂီုကၠီု IT တာဒၞာပိုၚ်ခြာလဝ် ညးကၠောန်ပ္တိတ်ကိရိယာကပေါတ်ဆက်စၠောံ သွက်ဇာနှိက်ဂကူတၟိတအ်ဂှ် ၜိုန်ရမူ သၞာံ၂၀၂၁ ပျးဌာန်လဝ်ကီုလေဝ် တၚ်ကၟာတ်လဒဵုလတူ Huawei ကေုာံ ZTE တအ်ဂှ် အတိုၚ်ကၟိန်ဍုၚ်တၞဟ်သ္အာၚ်တအ် ရေၚ်တၠုၚ်လဝ်ဂှ် စၟတ်ကေတ်ဟွံသေၚ်ရဂှ် ဂွံတီကေတ်ရ။
ပ္ဍဲအကာဲအရာဗလးမုက်တိမ္ဂး ဂျာမနဳဂှ် သွက်ဇာနှိက် 5G ညးတအ် ဒးနိဿဲဒၟံၚ်ကဵု Huawei တုဲ နကဵုအဝ်ပရေတာတအ်လေဝ် ပ္ဍဲကဵုဇာနှိက်အဓိကတအ်ဂှ် ဒးဝေၚ်ပါဲအာ နူပွမသုၚ်စောဲနဲကဲကွတ်ပညာကုမ္ပဏဳတအ်ဏံရောၚ်ဂှ် ဓမံက်ထ္ၜးလဝ် ပ္ဍဲလိက်ဒုၚ်စဳရေၚ်တၚ်ဂၞၚ်ပရိုၚ်မွဲစံၚ်ဂှ်ရ။
အတိုၚ်ဌာန်ပရိုၚ် Zeit Online ဓမံက်ထ္ၜးလဝ်မ္ဂး အေဂျေန်ဇြဳဂီုကၠီုသိုက်ဗာ အလဵုအသဳဂျာမာန် ကေုာံဌာနဝန်ဇၞော် ပရေၚ်အပ္ဍဲဍုၚ်တအ်ဂှ် ပ္ဍဲကဵုဇာနှိက် 5G ညးတအ်ဖောအ်ဗြေဝ်တဴတက်ကၠုၚ်ဒၟံၚ်ဂှ် စၟဳစၟတ်ဒၟံၚ် ပရေၚ်ဒက်ပ္တန်က္တဵုဗဒှ်ကဵုအန္တရာယ် ပရေၚ်ဂီုကၠီုဂျာမနဳတအ်ရဂှ် ဓမံက်ထ္ၜးလဝ်ရ။
တၚ်စၟဳစၟတ်အေဂျေန်ဇြဳအလဵုအသဳဂျာမာန်ဂှ် စိုပ်ဒတုဲ တုဲဒှ်ဗွဲမလုပ်သၞောဝ် ၜိုန်ရဟၟဲဏီကီုလေဝ် သွဟ်ဍေံ သောၚ်ကၠးဒၟံၚ်ရဂှ် အတိုၚ်တၞးလိက် လိက်စံၚ်တအ် ဂွံတီကေတ်မာန်ရဂှ် တမ်ရိုဟ်တၚ်ဂၞၚ်ပရိုၚ် အလဵုအသဳဂမၠိုၚ် ဟီုသ္ဂးလဝ်ရ။
မ္ၚးနူဏံပၠန် နကဵုအလဵုအသဳ ဂျာမာန်ဂှ် သွက်ဂွံစဵုဒၞာအာပရေၚ် အဝ်ပရေတာဂမၠိုၚ် သုၚ်စောဲကပေါတ်ကိရိယာ ပရေၚ်ထိၚ်ဒဝ် Huawei ကေုာံ ZTE လ္ၚဵု ပ္ဍဲကဵုဇာနှိက် 5G နွံဒၟံၚ်ရ။
Ref: Reuters