ပဠဝ်၊ မာတ်ချ် (၂၈)
ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် အပ္ဍဲကွာန်ပဠဝ်ကုန် (ပုလောကုန်း) ကေုာံ ကွာန်နာတ်အိၚ်ဒံၚ် (နတ်အိမ်တောင်) ၊ ပွိုၚ်ဍုၚ်ပဠဝ်၊ ရးဒေသဇၞော်တၞၚ်သဳဂှ်ဝွံ ဟိုတ်ဟွံမွဲမွဲသာ် ပန်ဂစိုတ်လဝ် ညးဍုၚ်ကွာန်ဒေသ (၂) တၠဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် (၅၀) ပြၚ်ပါဂှ်ဝွံ တုဲကၠုၚ် ပ္ဍဲဂိတုမာတ်ချ် (၂၅) တေံ ကြဴနူထ္ပက်ကၠုၚ်ကရောၚ်ပၞာန် အပ္ဍဲကွာန်တံဏံတုဲဂှ် ပန်ဂစိုတ်ဏာလဝ် ကောန်ကွာန်ပဠဝ်ကုန် ဥူတေန်ဥူ ကေုာံ ကောန်ကွာန်နာတ်အိၚ်ဒံၚ် ကိုဝ်မျဵုမေန်တူတံရ။
ဒပ်ကံၚ်ဇြဳပၞာန်ဝွံ ပ္ဍဲကဵုတ္ၚဲဂှ် က္တဵုဒှ်ပေါဲဗ္တိုက် ကုဂကောံဒပ်စဵုဒၞါညးဍုၚ်ကွာန်တံတုဲ ညးဒေသ (၂) တၠ မ္ဒးဂြိပ်ဒဴပါဲဒလေတ်ဒၟံၚ်တံဂှ် ပန်ဂစိုတ်ဏာလဝ် နကဵုသေနာတ် လ္တူဂၠံၚ်ကွာန်တံဏံဂှ်ရ။
ဟိုတ်နူပေါဲဗ္တိုက်ပဠဝ်တုဲ ညးဒေသ (၁၀၀၀) ပြၚ် နူကဵုကွာန်ပဠဝ်ကုန်၊ နာတ်အိၚ်ဒံၚ်၊ ကွာန်ယှာန်ဒေါတ် ကေုာံ ကွာန်ဗ္ဒါဲဗ္ဒါဲတံဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံတုဲ ပ္ဍဲဂိတုမာတ်ချ် (၂၇) ဂှ် က္တဵုဒှ်ပေါဲဗ္တိုက်ဟွံမွဲမွဲသာ် ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်ရ။
ပ္ဍဲဂိတုဖေဖဝ်ဝါရဳ (၂) တုဲကၠုၚ်တေံ ကြဴနူကံၚ်ဇြဳပၞာန် လလောၚ်တြး ပရေၚ်အုပ်ဓုပ်ပၞာန် ပွိုၚ်ဍုၚ်ပဠဝ်တုဲဂှ် ဟိုတ်နူထ္ပက်ဒၟံၚ်ကရောၚ်ပၞာန်တံဂှ်ရ ပေါဲဗ္တိုက်ၜါလ္ပာ် က္တဵုဒှ်လဝ် ဟွံအောန်နူကဵု (၂၀) ဝါရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ