တံၚ်ဥူ၊ မာတ်ချ် (၂၈)
ပ္ဍဲတိဍာ်ဒပ်မဟာ (၂) ခရိုၚ်တံၚ်ဥူ ဗော်သွးကောန်ဂကူကရေၚ် KNU ဂှ် ပ္ဍဲဂိတုမာတ်ချ် (၂၇) အခိၚ်နူဂယးဂှ် ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ အာစိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် (၂) ရောၚ်ဂှ် ဂွံတီကေတ် အတိုၚ်ဂလာန်ညးဒေသတံရ။
ပ္ဍဲဂိတုမာတ်ချ် (၂၇) အခိၚ်နူဂယး ၜိုတ် (၇) နာဍဳကဝါ်ဂှ် ဂကောံဇြဟတ်ပၠန်ဂတးတံ ကၠုၚ်စိုပ်ဗ္တိုက်လဝ် ဒပ်ကံၚ်ဇြဳပၞာန် မၞုံပ္ဍဲသၞေဟ်ကၚ် ဒဒန်(ကရင်ချောင်း) လ္တူဂၠံၚ်ကွဳစက် တံၚ်ဥူ−သာန်တံၚ် (သံတောၚ်) ဒပ်မဟာ (၂) ခရိုၚ်တံၚ်ဥူ KNU ဂှ်တုဲ ပရေၚ်ဇီုကပိုက်ဂှ် ဟွံဂွံတီကေတ်ဏီရ။
သ္အာၚ်နူဂှ်ပၠန် ပ္ဍဲလ္ပာ်ကွာန်ဗဟုၚ် ကေုာံ ကွာန်ထုၚ်ဗိုဝ်ကျဳ ပွိုၚ်ဍုၚ်ဠုက်ဒိုဝ် (လိပ်တို) တိဍာ်ဒပ်မဟာ (၂) KNU ဂှ်လေဝ် ပ္ဍဲဂိတုမာတ်ချ် (၂၇) အခိၚ်ပယျာံဂယးဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ က္တဵုဒှ်လဝ်ပေါဲဗ္တိုက်တုဲ လ္ပာ်ကံၚ်ဇြဳပၞာန် ကၠုၚ်စိုပ်ပန်ပှော်ကဵုလဝ် နကဵုက္ၜၚ်ကျာဂှ် ညးဒေသတံ သ္ဂးအိုတ်ရ။
ဟိုတ်နူလုပ်စိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် မၞုံအပ္ဍဲကွာန်ဗဟုၚ် (ဗဟုန်း) ပွိုၚ်ဍုၚ်ဠုက်ဒိုဝ်တံဂှ်ရ လ္ပာ်ဒပ်ကံၚ်ဇြဳပၞာန် စကာအရီုဗၚ်က္ၜၚ်ကျာတုဲ ကလေၚ်ပန်ပှော်ဒၟံၚ်တုဲ ညးဍုၚ်ကွာန်ဒေသတံလေဝ် ဒးပါဲဒလေတ်ဒၟံၚ်ရောၚ်ဂှ် ညးဒေသဠုက်ဒိုဝ်တံ ဟီုဂးဒၟံၚ်အိုတ်ရ။
ဟိုတ်နူအကာဲအရာပေါဲဗ္တိုက်ၜါလ္ပာ် အပ္ဍဲပွိုၚ်ဍုၚ်ဠုက်ဒိုဝ်ဂှ်ရ ပရေၚ်ဇီုကပိုက်ဂှ် အခိၚ်လၟုဟ် ဟွံဂွံတီကေတ်ဏီတုဲ ဟိုတ်နူအကာဲအရာပရေၚ်ပၞာန်တုဲ သ္ကုတ်ဂၠံၚ်ဖဟုၚ် ဠုက်ဒိုဝ် တံၚ်ဥူတံဂှ်လေဝ် ပ္ဍဲအကြာတ္ၚဲတံဏံ လ္ပကၠောန်သ္ပအာကၠုၚ်အိုတ်ဂှ် ညးဒေသတံ ဟီုဂးလဝ်ရ။
တုဲကၠုၚ်ဂိတုမာတ်ချ် (၁၇) တေံ ဂကောံဇြဟတ်ပၠန်ဂတးတံ အာစိုပ်ဗ္တိုက်လဝ် ကုဍုၚ်ဒပ်(ဘုရင်နောင်) ကံၚ်ဇြဳပၞာန် ပွိုၚ်ဍုၚ်သာန်တံၚ်(သံတောၚ်) မၞုံအပ္ဍဲတိဍာ် ဒပ်မဟာ (၂) KNU နကဵုပၠံၚ်ပရှ်ကျာတုဲ ပ္ဍဲလ္တူဂၠံၚ်ကွဳစက် (သံတောၚ်ကြီး) ကေုာံ ဍုၚ်သာန်တံၚ် ၁၃ မိုၚ်တံဂှ် ဟိုတ်နူပရေၚ်ပၞာန်ၜါလ္ပာ် သ္ကာတ်မြဟ်ဒၟံၚ်တုဲ ညးဍုၚ်ကွာန်ဒေသ ဗွဲမဂၠိုၚ်ဂၠေၚ် ဒးဂြိပ်ဒဴပါဲဒလေတ်ဒၟံၚ်ဖိုဟ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−KNU