ၜၚ်ကံက်၊ မာတ်ချ် (၂၈)
ပ္ဍဲဗ္ဒိုပ်ဗၠာဲသၟိၚ်ဍုၚ်သေံမွဲ ကၟုဲကၠုၚ်စိုပ် သွက်ဂွံကၠုၚ်တေၚ်စောဲဂဗုတ်ဂမၠိုၚ် ညံၚ်စိုတ်ဂြတ်ဂြက် ဂွံယအ်သက်သာစှ်ေ နူကဵုသၞာဲဒဴဗၠာဲသၟိၚ်မွဲတၠ ဗီုဓာတ်ဍဵုပတ်ကဵုဒၟံၚ် မသက္ကုၚုဟ်ဂှ် ထ္မံက်ထ္ၜးလဝ် ပ္ဍဲမဳဒဳယာအပ္ဍဲဒေသတုဲ သၞာဲဒဴဗၠာဲသၟိၚ်ဂှ်ဝွံ ဒှ်ညးယိုက်ဂၠေၚ်ဒၟံၚ်တာလျိုၚ် ပ္ဍဲဗ္ဒိုပ်ဗၠာဲသၟိၚ် နံၚ်ထရောတ် မၞုံဍုၚ်ဇၞော်၊ ခရိုၚ်ဒေသန္တရထရာန်ရောၚ်ဂှ် ဂွံတီကေတ်ရ။
ပက်ကရောန်ကေတ် သၞာဲဒဴဗၠာဲသၟိၚ် အာယုက်မၞုံ (၅၈) သၞာံဂှ်ဝွံ ဒှ်ညးကေၚ်ကတ်လ္ၚတ် ပ္ကတ်ပ္ကေၚ်လဝ် နဒဒှ်အ္စာပွတ်သေံမွဲ ဗွဲမစိုန်သ္ကီုတုဲ တၠဂဗုတ် ညးမကၠုၚ်စိုပ်ဗ္ဒိုပ်တံဂှ်ဝွံ ဟိုတ်နူထေၚ်ကေတ် စိုတ်ဂြတ်ဂြက်ဂၠိုၚ်ဒၟံၚ်ဂှ်ရ ရေၚ်တၠုၚ်ပတ်ကဵုဒၟံၚ် မသက္ကုၚုဟ် Massage to Relieve Distress တံဂှ်ရောၚ် သ္ဂးရ။
ညးဝွံ ဒှ်သၞာဲဒဴမွဲ မကေတ်လဝ်တာလျိုၚ် ပ္ဍဲကဵုဒၞါဲဒုၚ်တၠုၚ်ကၟုဲ မ္ဒးကေတ်စရၚ် ကုပရေၚ်ကၠုၚ်တေၚ်တံဂှ်တုဲ ဒှ်ညးမ္ဒးဆက်ဆောံကဵု မၞိဟ်မဂၠိုၚ်ဂၠေၚ် လၟေၚ်ၚ်ရောၚ်ဂှ် ဌာနပရိုၚ် Bangkok Post ထ္မံက်ထ္ၜးလဝ်ရ။
သၞာဲဒဴဏံဝွံ ဂၠါဲကေတ် တၠဂဗုတ်စိုတ်ဂြတ်ဂြက်ဂၠိုၚ်တံဂှ်တုဲ ယဝ်ရဆဵုမ္ဂး အာတ်အခေါၚ် နူကဵုကၟုဲတံတုဲ ညံၚ်လတေၚ်ဂွံလိုဟ်လာဲ ပတ်ကဵုတမ်ကအ် ကေုာံ က္ဍိုပ်တံ နူ (၁၀) မိနေတ် စဵုကဵု (၁၅) မိနေတ်ဂှ် ဂွံတီကေတ်ရ။
ဆ္ဂး အစဳဇန်ညးဂှ် ပွမသ္ပအာရီု ရုမ်မ်ဂပ်ပ် နူကဵုမၞိဟ်ဇၞော်မဆေၚ်စပ်တံဂှ် ဟွံဂွံမွဲသာ် စၞးတာလျိုၚ်ဂ္ဇအ်ခုၚ်ဂှ် မိက်ဂွံသ္ကဵုညး စွံအာရီုလ္ပာ်ပရေၚ်ဂၠိုက်ဂၠါဲစုစာမ်တံသၟးရောၚ်ဂှ် မဳဒဳယာအပ္ဍဲဒေသတံ ထ္မံက်ထ္ၜးလဝ်ရ။
သၞာဲဒဴဗၠာဲသၟိၚ် ပက်ကရောန်ကေတ်ဝွံ ပ္ဍဲကဵုအစဳဇန်ကဵုပညာ ပရေၚ်စဵုဒၞါမပ္တဝ်က္ဍိုပ် သွက်ပရေၚ်သောၚ်ကလး ကိစ္စဂဥုဲၜူမာဲ အပ္ဍဲဘာဗ္တောန်လိက်တံဂှ်လေဝ် ဒှ်ညးပါလုပ်လဝ်ကီုရ။
သြန်ဂိတုညးမဂွံတံဂှ် ပ္ကောံပကေဝ်တုဲ ကတ်လဝ်ပညာပွတ်အခိုက်ကၞာသေံတုဲ အခါရစိုပ်ဘဝဒေါအ်ဇူမ္ဂး ညံၚ်ဂွံဒှ်ဂၠံၚ်တရဴ ပရေၚ်ရေၚ်တၠုၚ်ဍဵုပတ် အခိုက်ကၞာသေံ ဒးဒးမွဲဂှ် ရန်တၟံလဝ်ရောၚ် သ္ဂးရ။
“ပညာပွတ်သေံဝွံ ဒၟါနူသ္ကဵုသက်သာတဴ သီုစိုတ် သီုကာယတံဂှ်ရ မြဟ်တမ္ညဝ်ဒၟံၚ် အလုံဂၠးတိရ” ဂှ်လေဝ် ညးဟီုဂးလဝ်ရ။
Ref: Straits Times