ဘုက်ပျေန်၊ မာတ်ချ်(၂၉)
ရးဒေသဇၞော်တၞၚ်သဳ ပွိုၚ်ဍုၚ်ဘုက်ပျေန်၊ ဍုၚ်ကရသူရိ၊ ဂကောံကွာန်မတေ၊ ဗ္ဒပ်ပၞာန်ညးဍုၚ်ကွာန် ဒုၚ်ဩဇာကံၚ်ဇြဳပၞာန် ပ္ဍဲဝါကျောန်မွဲဗ္ဒပ်ဂှ် ဂိတုမာတ်ချ် စၟတ်တ္ၚဲ (၂၇)ဂှ် လုပ်စိုပ်ဗတိုက်လဝ်ရဂှ် ဒပ်စဵုဒၞာညးဍုၚ်ကွာန် လလောၚ်တြးလဝ်ရ။
ဗ္ဒပ်ပၞာန်ညးဍုၚ်ကွာန်ကံၚ်ဇြဳပၞာန် မံၚ်တန်တဴဒၟံၚ် ဇြဟတ်ဒပ်ဗ္ဒာဲ (၁၅) တၠဂှ် တ္ၚဲဏံ အခိၚ်နူဂယးၜိုတ် (၂)နာဍဳ ဒပ်ပံၚ်ကောံဒပ်ပၞာန်စဵုဒၞာညးဍုၚ်ကွာန် ပွိုၚ်ဍုၚ်ဘုက်ပျေန် ကေုာံပွိုၚ်ဍုၚ်ကအ်သံၚ် လုပ်စိုပ်ဗတိုက်လဝ် မွဲလစုတ်ဓဝ်ရ။
ဃောလုပ်စိုပ်ဗတိုက်လဝ်ဂှ် ရပ်ဂွံ မၞိဟ်(၆)တၠ ပါလုပ်သီုက္ဍိုပ်သ္ကိုပ် ဒုက္ဍိုပ်သ္ကိုပ်ပၞာန်ညးဍုၚ်ကွာန်တအ်တုဲ သီဂွံလဝ် လွဟ် (၅)ဇကု၊ ဗုမ်ကၠဟ် ၁ မ၊ ဖျေဲမကမ်(၁၇) မ၊ မကမ် ကေုာံကပေါတ်ဆက်စပ်တအ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
ကောန်ဒပ်ပၞာန်ညးဍုၚ်ကွာန် ရပ်ဂွံလဝ်တအ်ဂှ် ကြဴနူစၟဳစၟတ်တုဲ ပန်ပသောၚ်လဝ် က္ဍိုပ်သ္ကိုပ် ကေုာံဒုက္ဍိုပ်သ္ကိုပ်ပၞာန်ညးဍုၚ်ကွာန်တအ် (၂)တၠဂှ်တုဲ ကလေၚ်ဗလးကဵုလဝ် ကောန်ဒပ်ပၞာန်ညးဍုၚ်ကွာန်သှ်ေဒၟံၚ်ရဂှ် ညးတာလျိုၚ်ဒပ်စဵုဒၞာညးဍုၚ်ကွာန် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂွံလဝ်စရၚ် ယၟုကောန်ဒပ်ပၞာန်ညးဍုၚ်ကွာန် ပ္ဍဲပွိုၚ်ဍုၚ်ဘုက်ပျေန်သီုဖအိုတ်တအ်ဂှ်တုဲဂှ်ရ ကောန်ဒပ်ပၞာန်ညးဍုၚ်ကွာန် သှ်ေဒၟံၚ်ဂှ်လေဝ် ညံၚ်ဂွံနုက်တိတ်ပြဟ်ဟ်ဂှ် ကဵုလဝ်သတိတုဲ ယဝ်ရဆက်မံၚ်တန်တဴအာ နဒဒှ်ပၞာန်ညးဍုၚ်ကွာန်ကံၚ်ဇြဳပၞာန်မ္ဂး ပသောၚ်သ္အးအာဏောၚ်ဂှ် ဟီုသ္ဂးလဝ်ရ။
ကြဴနူဒပ်ဗ္ဒပ်ပၞာန်ညးဍုၚ်ကွာန် ဒးဒုၚ်ဗတိုက်တုဲဂှ် နူလ္ပာ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ဍာန်ဍာ်၊ ဍာန်တိုက် သီုဇြဟတ်ပေၚ်ၚ်တုဲ ဗက်ဂၠာဲဒၟံၚ် ကောန်ဒပ် PDF ပ္ဍဲမွဲဒမြိပ်ဂြိုပ်တ္ကအ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- Bokpyin PDF