ဘာအၚ်၊ မာတ်ချ်(၂၉)
ပ္ဍဲတိဍာ်ဗော်သွးကောန်ဂကူကရေၚ် KNU ထိၚ်ဒဝ်ဂှ် ပ္ဍဲအခိၚ်ဒပ်ပၞာန်သီလဝ်အဝဵု ပွိုၚ် (၂)သၞာံဏံ ဟိုတ်နူဒပ်ကံၚ်ဇြဳပၞာန် ဖံက်ပ္ကဝ်လဝ်အခေါၚ်အရာမၞိဟ်တုဲ ကောန်အရာပ်ညးဍုၚ်ကွာန် (၂၀၀)တၠပြၚ် ဒးချိုတ်တုဲ ဂွံလဝ်ဘဲဝပ် ဗ္ဒာဲ (၅၀၀)တၠရဂှ် ဂွံတီကေတ်အတိုၚ်တၚ်ဂၞၚ် KNU လလောၚ်တြးလဝ်ရ။
“ဟိုတ်နူဒုဟ်ရာဇဝတ်ဒပ်ပၞာန်ဗၟာ ပရေၚ်ဘဝမၞိဟ်ဂွံဂျိုၚ်တန်တဴ ကၠေံဗ္ဒန်ဒၟံၚ်ဂမၠိုၚ်” ဂးတုဲ လိက်ဒုၚ်စဳရေၚ်ဂှ် တ္ၚဲတုဲကၠုၚ် စၟတ်တ္ၚဲ (၂၇)တေံ ဗော်သွးကောန်ဂကူကရေၚ် KNU လလောၚ်တြးလဝ်ရ။
ပ္ဍဲလိက်ဒုၚ်စဳရေၚ်ဂှ် ကြဴနူဒပ်ပၞာန်သီအဝဵုတုဲ ပေါဲဗတိုက် အကြာဒပ်သၟဝ်တဲ KNU ကေုာံဒပ်ကံင်ဇြဳပၞာန်တအ် အပံၚ်လၟိဟ် (၇၅၀၀)ဝါပြၚ် က္တဵုဒှ်လဝ်တုဲ ပရေၚ်ဒပ်ကံၚ်ဇြဳပၞာန် ဖံက်ပ္ကဝ်အခေါၚ်အရာမၞိဟ် အပံၚ်လၟိဟ် ဗ္ဒာဲ (၁၅၀၀)ဝါ ရဂှ် ဟီုသ္ဂးလဝ်ရ။
ပ္ဍဲတိဍာ်KNU ဂှ် ဟိုတ်နူဒးဒုၚ်ဖံက်ပ္ကဝ်ဒၟံၚ်အခေါၚ်အရာမၞိဟ် ကံၚ်ဇြဳပၞာန်က္လိလောန်ဒၟံၚ် နဲကဲဗီုပြၚ်စုၚ်တုဲ ညးဍုၚ်ကွာန်မံၚ်တန်တဴပ္ဍဲကွာန် ဗ္ဒာဲ (၂၀၀)တၠ ဒးချိုတ်အာလဝ်တုဲ ညးဍုၚ်ကွာန် ဇီုကပိုက်ဂွံလဝ်ဝပ် ဗ္ဒာဲ(၅၀၀)တၠကီု ဒပ်ကံၚ်ဇြဳပၞာန်ရပ်ကေတ်ဒၟံၚ်ပဝ်တာ နဒဒှ်ဒေၚ်ဒုၚ်ဒၞာမၞိဟ် ကေုာံရပ်ဒက်ဒၟံၚ် သီုဟိုတ်ဟၟဲမွဲသာ်ကီု ညးဍုၚ်ကွာန် (၁၃၀၀)ပြၚ်ဒးဒုၚ်ရပ်လဝ်တုဲ စဵုကဵုလၟုဟ်ဏံ ညးဍုၚ်ကွာန်ဟွံက္လေၚ်ဗၠးတိတ်ကၠုၚ်ဏီ ပရိုၚ်ကၠေံဒၟံၚ် နွံဗွဲမဂၠိုၚ်ရဂှ် ဟီုသ္ဂးလဝ်ရ။
သ္အာၚ်နူဏံပၠန် ဟိုတ်နူဒပ်ကံၚ်ဇြဳပၞာန် ပန်ပှ်ောလွဟ်ဍောတ် ကေုာံ ဗတိုက်ကၠုၚ်ကဵုက္ၜၚ်ကျာတုဲ စမြိုၚ် လၟိဟ် (၂၀)မ ရုၚ်ဂဥုဲ(၆)မ၊ ဘာဗ္တောန်လိက် (၁၃)ဘာ၊ ဘာလကျာ် ကေုာံ ဇြပ်သဳလ (၈)ဘာ၊ ဘာကျာ်(၆)ဘာ ဒးလီုလာ်လဝ်တုဲ ဟိုတ်နူဂၠိုက်ဂၠာဲပလီုပလာ် ပန်ဖျေံလွဟ်ဇၞော်တုဲ သ္ၚိဒၟံၚ်(၈၈၂)မ လီုလာ်အာလဝ်ရဂှ် ဓမံက်ထ္ၜးလဝ်ရ။
ပ္ဍဲကဵုခရိုၚ် KNU (၇)ခရိုၚ်ဂှ် မ္ၚးနူခရိုၚ်ဘာအၚ်တုဲ ပ္ဍဲခရိုၚ်သှ်ေဒၟံၚ်(၆)ခရိုၚ်တအ်ဂှ် ဟိုတ်နူဒပ်ကံၚ်ဇြဳပၞာန်ဂလိုၚ်ပ္တိုန်ကၠုၚ်ဇြဟတ် ကေုာံ ဖံက်ပ္ကဝ်ကၠုၚ် တၚ်တုပ်စိုတ် ပ္ဍဲဒေသတုဲ ပေါဲဗတိုက်အကြာဒပ်ပၞာန်ဗၠးၜးကောန်ဂကူကရေၚ် KNLA KNU ကေုာံ ဒပ်ကံၚ်ဇြဳပၞာန်သီအဝဵု ပေါဲဗတိုက် ထပ်က္တဵုဒှ်ကၠုၚ်ပၠန်တုဲ ဟိုတ်နူပါလုပ်ရီုဗၚ်ဒၟံၚ် ပ္ဍဲပရေၚ်ချဳဒရာၚ်ညးဍုၚ်ကွာန် ဟွံပ္ကီုပရာပ်တုဲလေဝ် ကံၚ်ဇြဳပၞာန် သာတုဲဂၠာဲကၠုၚ်သၞ ကု KNUရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဒပ်ကံၚ်ဇြဳပၞာန် က္လိလောန်ဒၟံၚ်ကမၠောန်ဖံက်ပ္ကဝ်အခေါၚ်အရာမၞိဟ် မပ္တံကဵုပရေၚ်ပန်ပှ်ောလွဟ်ဇၞော်၊ ရပ်ဒက်ပြိုက်ဂစိုတ်၊ သုၚ်စောဲစကာ နဒဒှ်ဒေၚ်ဒုၚ်ဒၞာမၞိဟ်၊ ရပ်ပဝ်တာတုဲ စကာဗွဲအဓမ္မ၊ ပရေၚ်ပၠံၚ်ၜးပလီုပလာ် စံၚ်ပလီု ပ္ဍဲကွာန် လ္တူကောန်ဂကူကောန်ဍုၚ်အရၚ် ကေုာံကောန်ၚာ်သၟတ်၊ ညးအဝဲဟွံပေၚ်၊ ညးဗြဴ ကေုာံညးတြုံ မၞုံပ္ဍဲခရိုၚ်KNU (၇)ခရိုၚ်ရဂှ် ဟီုလဝ် ပ္ဍဲလိက်ဒုၚ်စဳရေၚ်ဂှ်ရ။
ပရေၚ်ဖံက်ပ္ကဝ်ဒုဟ်ရာဇဝတ်ပၞာန် ဒပ်ကံၚ်ဇြဳပၞာန်ဂှ် ပ္တဝ်လဝ်ကဵုညးဍုၚ်ကွာန်တအ်တုဲ ဟိုတ်နူဖံက်ပ္ကဝ်ဒၟံၚ် အခေါၚ်အရာမၞိဟ်ဂှ်ရ ညးဍုၚ်ကွာန် ပ္ဍဲတိဍာ်ကဝ်ဒူလေဝ် (၃၆၅၀၀၀) ပြၚ် ဒးဂြိပ်ဒဴပါဲဓလေတ်ဒၟံၚ်တုဲ နွံဒၟံၚ်ပၟိက်ကဵု အရီုဗၚ်ထံက်ပၚ်ပရေၚ်မၞိဟ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – KNU