ကအ်ကြိက် -မာတ်ချ်(၂၉)
တွဵုရးကရေၚ်၊ ပ္ဍဲပေါဲဗတိုက်ပရေၚ်ချဳဒရာၚ်ပၞာန် က္တဵုဒှ်လဝ် ပ္ဍဲပွိုၚ်ဍုၚ်ကအ်ကြိက် နူဂိတုမာတ်ချ် စၟတ်တ္ၚဲ(၂၅) ကေုာံ စၟတ်တ္ၚဲ (၂၆)ဂှ် လ္ပာ်ကံၚ်ဇြဳပၞာန် (၁၅)တၠ လ္ပာ်လ္တူ ဒးချိုတ်လဝ်နွံတုဲ ညးဒးလဝ်ဘဲဝပ် နွံဗွဲမဂၠိုၚ်ရဂှ် ကရောၚ်ပၞာန် Lion Battalion Commando Special Forces လလောၚ်တြးလဝ် ပရိုၚ်ရ။
ဂကောံပၠန်ဂတးတအ်ဂှ် လုပ်စိုပ်ဗတိုက်လဝ် ဗ္ဒပ်ဗၠာဲသၟိၚ်ကြုၚ်ဒဵု သၟဝ်တဲကံၚ်ဇြဳပၞာန်၊ တံဒပ်ပၞာန်တိုက်ကံၚ်ဇြဳပၞာန် ဒပ် ခ.မ.ရ ၅၄၅၊ ခ.မ.ရ ၅၄၆ ကေုာံဒပ် (BGF) သၟဝ်တဲကီု သီုကဵုဗၠာဲသၟိၚ်တအ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပ္ဍဲပေါဲဗတိုက်ပွိုၚ်ၜါတ္ၚဲဂှ် လ္ပာ်ကံၚ်ဇြဳပၞာန် ဒးချိုတ်လဝ် (၁၅)တၠ လ္ပာ်လ္တူတုဲ မၞိဟ်ဇီုကပိုက်ဒးလဝ်ဝပ် နွံဗွဲမဂၠိုၚ်ကီု ဒပ်လီုတုဲ ပရေၚ်ဂြိပ်တိတ်ဒၟံၚ် သီုအလုံကရောၚ်ပၞာန် နွံဒၟံၚ်ရဂှ် ဓမံက်ထ္ၜးလဝ်ရ။
မ္ၚးနူဏံပၠန် လ္ပာ်ဒပ်ပံၚ်ကောံ ဗတိုက်လဝ်ကံၚ်ဇြဳပၞာန်ဂှ် သ္ဂံၚ်(၃)တၠ ပြဟ်လလုဲလဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး Lion Battalion Commando ရ။
ပ္ဍဲပေါဲဗတိုက် ဗတိုက်လဝ်ကံၚ်ဇြဳပၞာန်ဂှ် Lion Battalion Commando သ္ကိုပ်ဗျူဟာ ဗိုလ်အေဝ်စေဝါက္ဍိုက်က္ဍိုပ် ကေုာံဒပ်ပၠန်ဂတးကရေၚ်၊ ဒပ်ပရေၚ်စဵုဒၞာညးဍုၚ်ကွာန်(PDF) တအ် ပံၚ်တောဲတုဲချဳဒရာၚ်လဝ်ပၞာန်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – Lion Battalion Commando Special Forces