ကျာ်ထဝ်၊ မာတ်ချ်(၃၀)
တွဵုရးဍုၚ်မန်၊ ပွိုၚ်ဍုၚ်ကျာ်ထဝ် သၞေဟ်ကၚ်စၟဳစၟတ်ကံၚ်ဇြဳပၞာန် မၞုံပ္ဍဲဗ္စပ်ဂၠံၚ် ဒဒန်သေတ်တောၚ် ကွာန်မုက်ပြေၚ် (မုပ္ပလင်)ဂှ် ပ္ဍဲဂိတုမာတ်ချ် စၟတ်တ္ၚဲ (၂၉) အခိၚ်နူဂယး အာစိုပ်ဗတိုက်လဝ်ရဂှ် ညးတာလျိုၚ် PDF ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သၞေဟ်ကၚ်စၟဳစၟတ်ကံၚ်ဇြဳပၞာန်ဂှ် ဂိတုမာတ်ချ် စၟတ်တ္ၚဲ(၂၉) အခိၚ်နူဂယး ၜိုတ်(၁၀)နာဍဳကဝက် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA၊ PDF တအ် အာစိုပ်ဗတိုက်လဝ် နကဵုဒရုမ်ကီု သီုပန်ဗတိုက်လဝ် နလွဟ်ဇၞော်ရ။
ပ္ဍဲပေါဲဗတိုက်ဏံ လ္ပာ်ကံၚ်ဇြဳပၞာန်လေဝ် ကလေၚ်ပန်ပှ်ောလဝ် လွဟ်ဇၞော် လွဟ်ဍောတ်ရ။
ပေါဲဗတိုက်သၞေဟ်ကၚ်စၟဳစၟတ်ကံၚ်ဇြဳပၞာန် ပ္ဍဲဗ္စပ်ဂၠံၚ်ကွာန်မုက်ပြေၚ်ဂှ် လ္ပာ်ကံၚ်ဇြဳပၞာန် ဟွံအောန်နူ(၄)တၠ ဇီုကပိုက်ချိုတ်လဝ် နွံမာန်ကီုလေဝ် အကာဲအရာဗလးမုက်တိ သောဲသောဲဗြောဲ ဆက်ဂၠိုက်ဂၠာဲပကောံပကေဝ်ဒၟံၚ်ရဂှ် ညးတာလျိုၚ် PDF ခရိုၚ်သဓို ကိုဝ်ဨမေန်ဟီုသ္ဂးလဝ်ရ၊
ဟိုတ်နူပေါဲဗတိုက်ၜါလ္ပာ်တုဲ ဂၠံၚ်ကွဳစက်မတ်မလီု-လဂုၚ် ကၟာတ်ဒၞာလဝ် လအ်အာပွိုၚ်(၂)နာဍဳပြၚ်တုဲ အခိၚ်ဒေါဝ်တ္ၚဲ ၜိုတ်(၁)နာဍဳဂှ် ကွဳစက်အာတရဴတအ် ဂွံကလေၚ်ဂြိပ်အာကၠုၚ် အတိုၚ်ပကတိပၠန်ရဂှ်ဂွံတီကေတ်ရ။
မွဲအဆက်ဓဝ် ပ္ဍဲဂိတုမာတ်ချ် စၟတ်တ္ၚဲ (၂၉) ၜိုတ်အခိၚ်(၁၁)နာဍဳဂှ်လေဝ် ဒပ်ကံၚ်ဇြဳပၞာန်ဖျေံလဝ်ဗ္ဒပ် ပ္ဍဲသုသာန်လေတ်ပပေန် ကွာန်အုပ်ကပေါဝ် (အၚ်္ဂဘို) ပွိုၚ်ဍုၚ်ကျာ်ထဝ်ဂှ် ဒးဒုၚ်ဗတိုက်လဝ်နကဵုဒရုမ်တုဲ အကာဲအရာ ဇီုကပိုက်ချိုတ်ဂျိုၚ် ဟွံဂွံတီကေတ်ဏီရဂှ် ဟီုသ္ဂးလဝ်ရ။
ဂိတုမာတ်ချ် တုဲကၠုၚ်စၟတ်တ္ၚဲ(၂၇)တေံလေဝ် ဟိုတ်နူသၞေဟ်ကၚ်စၟဳစၟတ်ဒ္တန်ကံၚ်ဇြဳပၞာန် မယာန်ချောၚ် မၞုံပ္ဍဲကွာန်မယာန်ချောၚ် ပွိုၚ်ဍုၚ်ကျာ်ထဝ်ဂှ် ဒးဒုၚ်ဗတိုက်လဝ်ကဵုဒရုမ်တုဲ ကောန်ဒပ်ဗၠာဲသၟိၚ် ဟွံအောန်နူ (၃)တၠ ဒးလဝ်ဘဲဝပ်ရဂှ် ဂွံတီကေတ်ရ။
သတင်း – သံလွင်တိုင်းမ်
ဓာတ်ပုံ – CJ