ၜဳကလေၚ်၊ ဂျူလာၚ် ၁
အပ္ဍဲကဵုတွဵုရးမန် အကြာပွိုၚ်ဂိတုဏံ ဟိုတ်နူပရေၚ်ဒပ်ပၞာန် ပန်ကဵုလွဟ်ဇၞော် ပၞာန်ကျာတံဖျေံဗုမ်တုဲ ညးဍုၚ်ကွာန် ၁၅ တၠ ချိုတ်အာလဝ်နွံမံၚ်ရောၚ် ဂကောံရီုဗၚ်မၚ်မွဲကောန်ထံၚ် ပရေၚ်ဍုၚ်ကွာန် AAPP လလောၚ်တြးလဝ်ရ။
စနူဂိတုဂျောန် ၁ စဵုကဵုဂျောန် ၂၆ တုဲကၠုၚ်တေံ ပ္ဍဲကဵုတွဵုရးမန် ဟိုတ်နူ တၠတဲဒပ်ပၞာန်တံပန်လဝ်တုဲ မၞိဟ်တြုံ ၆ တၠကဵု မၞိဟ်ဗြဴ ၉ တၠ အပံၚ်ဖအိုတ် ၁၅ တၠ ချိုတ်အာလဝ်ဂှ် သီုကဵုယၟု သ္ပလဝ်ဒတန်မာန် သ္ဂးရ။
အပ္ဍဲတံဏံမ္ဂး ကောန်ၚာ်အာယုက်သၟဝ် ၁၈ သၞာံ ၃ တၠ ပါလုပ်မံၚ်တုဲ အပ္ဍဲကဵုညးဒးချိုတ်အာလဝ် ၉ တၠတံဂှ် ဟိုတ်နူဒပ်ပၞာန်ဗမာ ပန်လဝ်ကဵုလွဟ်ဇၞော်တုဲ ဒးချိုတ်အာလဝ်ဂှ် ဒှ်မံၚ်ဂၠိုၚ်အိုတ်ရောၚ်။
ဂိတုဂျောန် ၂၂ တုဲကၠုၚ်တေံပၠန် အပ္ဍဲပွိုၚ်ဍုၚ်ၜဳကလေၚ် ဟိုတ်နူဒပ်ပၞာန်ပန်လွဟ်ဇၞော်ဂှ်ရ ဒဝ်ဇြေန်မာသဵု ကောန်ကွာန်ပဏ္ဍိကုန်ကဵု ကောန်ၚာ်သၟဝ်အယုက် ၁၈ သၞာံမွဲတၠ ချိုတ်အာလဝ်နွံ သာ်ဝွံ ချူထမံက်ထ္ၜးလဝ်ရ။
တုဲပၠန် အပ္ဍဲပွိုၚ်ကာလဏံ ပ္ဍဲကဵုတွဵုရးမန် ဟိုတ်နူပရေၚ်ပကီုပရာပ် ဒပ်ပၞာန်တံကၠောန်ဗ္ဒျ်လဝ်ဂှ်တုဲ ညးဍုၚ်ကွာန် ၁၃ တၠ ချိုတ်အာလဝ်ဂှ် ပကောံဂွံလဝ်စရၚ်ကီုတုဲ ဒးထပ်ဆက်သ္ပအာဒတန်ဏီရောၚ် သ္ဂးရ။
ပ္ဍဲကၟိန်ဍုၚ်ဗၟာ စနူသၞာံ ၂၀၂၁ ဒပ်ပၞာန်သီအဝဵု စဵုကဵုစိုပ်သၞာံ ၂၀၂၆ ဏံ ပ္ဍဲအလုံမွဲဍုၚ် ဟိုတ်နူဒပ်ပၞာန်ကဵု ရဲသၟဝ်တဲဒပ်ပၞာန်တံဂစိုတ်လဝ်ဂှ်ရ ညးချဳဒရာၚ်ပရေၚ်ဒဳမဝ်ကရေဇြဳကေုာံ ညးဍုၚ်ကွာန် အပံၚ်ဖအိုတ် ၈၁၂၉ တၠတံ ချိုတ်အာလဝ်နွံရောၚ် နူကဵု AAPP လလောၚ်တြး လဝ်ရ။
ပရိုၚ် – သြၚ်လောန်တိုၚ်မ်
Photo – CJ