ထဝါဲ၊ မာတ်ချ်(၃၀)
ရးဒေသဇၞော်တၞၚ်သဳ၊ ကွးဘာတက္ကသိုလ်နဲကဲကွတ်ပညာထဝါဲ (၂)တၠဂှ် ပ္ဍဲဂိတုမာတ်ချ် စၟတ်တ္ၚဲ (၂၈) တ္ၚဲတုဲကၠုၚ်ဏံ နူကဵုရုၚ်သၞောဝ်ဓဝ်ထံၚ်ထဝါဲ ဖျေံကၠုၚ်ဒဏ်ထံၚ်(၁၀) သၞာံ သီုညးၜါတၠရဂှ် ညးစုက်လုက်ကဵု ဂကောံသ္ၚိကၟိန်ညးတအ် ဟီုကဵု ဌာန်ပရိုၚ်သြၚ်လလာန်တိုၚ်(မ်)ရ။
ကိုဝ်မျိုဝ်မေန်ဥူ ကေုာံကိုဝ်အောၚ်ဝေယျာန် ညးမဒှ်ကွးဘာတက္ကသိုလ်နဲကဲကွတ်ပညာ ထဝါဲတအ်ဂှ် ကြဴနူကံၚ်ဇြဳပၞာန် စောဲလဝ်ဂဗုတ် နကဵုသၞောဝ်ဥပဒေဗတိုက်သရိုဟ် ပွပ္ကီုပရာပ် ၝောံပိုဒ် ၅၀ (ည) တုဲဂှ် ဖျေံကၠုၚ်အသံဒဏ်ထံၚ်(၁၀)သၞာံဇဳရ။
ဂိတုသေပ်တေမ်ဗာ ပ္ဍဲသၞာံတုဲကၠုၚ်တေံဂှ် ကံၚ်ဇြဳပၞာန်လုပ်ရပ်ကေတ်လဝ် ကိုဝ်မျိုဝ်မေန်ဥူ ဒၟံၚ်အရာပ်ခုမ်ဝေန်ဒါပ် ကေုာံကိုဝ်ဝေယျာန်အောၚ် ဒၟံၚ်အရာပ်ကျေတ်စာပျေန် ပ္ဍဲသ္ၚိညးတအ် မၞုံဍုၚ်ထဝါဲတုဲဂှ် စောဲလဝ်ဂဗုတ် နကဵုသၞောဝ်ဥပဒေဗတိုက်သရိုဟ် ပွပ္ကီုပရာပ်ရ။
ကိုဝ်မျိုဝ်မေန် ဒးဒုၚ်ဖျေံလဝ်အသံ ဒဏ်ထံၚ် (၁၀)သၞာံဂှ် ပ္ဍဲသၞာံ ၂၀၂၁ တုဲကၠုၚ် ဂိတုမေတေံဂှ် ဟိုတ်နူထ္ၜးလဝ်ဆန္ဒ ဒဒှ်ရဒစဵုဒစးကဵုတၠအဝဵုပၞာန်ဂှ်ရ ဒးဒုၚ်ပံက်လဝ်ဂဗုတ် နသၞောဝ်ဥပဒေရာဇသာတ်ဇၞော် ၝောံပိုဒ် ၅၀၅၊ ပိုဒ်(ဂ)တုဲဂှ် ဒးဒုၚ်ဖျေံဒဏ်ထံၚ် ပွိုၚ်(၆)ဂိတုတုဲ ဒှ်ညးကလေၚ်ဗၠးတိတ်ကၠုၚ်လဝ် နကဵုအခေါၚ်ဗၠးၜးမွဲတၠရ။
အတိုၚ်တၚ်ဂၞၚ်ဇာနှိက်ကောန်ထံၚ်ပရေၚ်ဍုၚ်ကွာန်ထဝါဲမ္ဂး ကြဴနူဒပ်ပၞာန်သီအဝဵုတုဲ ပ္ဍဲကဵုညးဒးဒုၚ်ရပ်လဝ် ပ္ဍဲထံၚ်ထဝါဲ ဗ္ဒာဲ ၃၇၀ တၠတအ်ဂှ် ၃၄၅ တၠ ဒးဒုၚ်ဖျေံကၠုၚ်ဒုဟ်ဒဏ်ဇဳရဂှ် လလောၚ်တြးလဝ် ပ္ဍဲဂိတုဂျာန္နဝါရဳ တုဲကၠုၚ်တေံရ။
အလုံမွဲကၟိန်ဍုၚ် ပ္ဍဲမွဲကာလဒပ်ပၞာန်သီအဝဵုဏံ ညးဒးဒုၚ်ရပ်လဝ် စဵုကဵု (၂၀,၀၀၀) ပြၚ်မၞုံကၠုၚ်ဒၟံၚ်တုဲ ပ္ဍဲကဵုဂှ် ညးဒးဒုၚ်ဖျေံလဝ်အသံပၟိၚ် (၅၀၀၀)တၠပြၚ်ရဂှ် ဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် (AAPP) လလောၚ်တြးလဝ် ပ္ဍဲဂိတုမာတ်ချ် စၟတ်တ္ၚဲ (၂၈)ဏံရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ