ၜဳကလေၚ်၊ မာတ်ချ်(၃၁)
တွဵုရးဍုၚ်မန်၊ ပ္ဍဲပွိုၚ်ဍုၚ်ၜဳကလေၚ် ကေုာံပွိုၚ်ဍုၚ်သဓီုတအ်ဂှ် ဂိတုမာတ် တုဲကၠုၚ် စၟတ်တ္ၚဲ (၂၈) ကေုာံ စၟတ်တ္ၚဲ (၂၉)ဏံ ဟိုတ်နူဒပ်ကံၚ်ဇြဳပၞာန်ပန်ဖျေံလဝ်လွဟ်ဇၞော် ကေုာံပန်ပှ်ောဒၟံၚ်ကြာန်ကြာန် သီုဟိုတ်ဟၟဲမွဲသာ်ဂှ်ရ ညးဒေသ(၂) တၠ ဒးချိုတ်လဝ်တုဲ ဂွံလဝ်ဘဲဝပ် (၄)တၠရဂှ် ဂွံတီကေတ်အတိုၚ်လဟီု KNU ကေုာံ ညးဒေသတအ်ရ။
ဂိတုမာတ်ချ် စၟတ်တ္ၚဲ(၂၈) တုဲကၠုၚ်ဏံဂှ် နူဒပ်ပၞာန်တိုက်ကံၚ်ဇြဳပၞာန် စၟတ်(၂၄) ဖျေံသ္ဇိုၚ်ပွိုၚ်ဍုၚ်သဓီု သီုပေါဲဗတိုက်ဟၟဲမွဲသာ် ဟိုတ်နူပန်ဖျေံလဝ်လွဟ်ဇၞော် ပ္ဍဲကွာန်ကဇိုၚ် သီုရန်တၟံနွံနွံဂှ်ရ ကောန်ကွာန်ဂှ် ဥူသုၚ်တောၚ် အာယုက်(၄၂)သၞာံ ဒးလွဟ်မကမ်တုဲ ဒးချိုတ်လဝ်ရ။
မ္ၚးနူဏံပၠန် ပ္ဍဲဂိတုမာတ်ချ် စၟတ်တ္ၚဲ (၂၉)ဂှ်လေဝ် ပ္ဍဲကွာန်အလူ ပွိုၚ်ဍုၚ်ၜဳကလေၚ် အကြာရေၚ်ကွဳစက်ကံၚ်ဇြဳပၞာန်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA၊ PDF တအ် ဒှ်လဝ် ပရေၚ်ပန်ပှော်ရၚ်သ္ကအ်ရ။
ပ္ဍဲပရေၚ်ပန်ပှော်ဂှ် လ္ပာ်ဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော်၊ လွဟ်ဍောတ် ပ္ဍဲကွာန်အလူ ကေုာံဝေန်ပျာန် ဒှ်ကွာန်မၞုံဒၟံၚ် ပ္ဍဲမွဲဒမြိပ် ဂၠံၚ်လဂုၚ်-မတ်မလီု သီုဟိုတ်ဟၟဲမွဲသာ် ကြာန်ကြာန်ရ။
ဟိုတ်နူပရေၚ်ကံၚ်ဇြဳပၞာန် ပန်ပှော်လဝ်တုဲ ဒဝ်ပုတိုဝ် အာယုက် (၅၅) ဒၟံၚ်ကွာန်ဝေန်ပျာန် ဒးလွဟ်မကမ် ချိုတ်အာလဝ်တုဲ ပ္ဍဲဒဝ်ခေန်လေဝ် အာယုက်(၄၅)သၞာံဂှ်လေဝ် ဂွံလဝ်ဘဲဝပ်ရဂှ် ညးဒေသတအ် ဟီုသ္ဂးလဝ်ရ။
ပ္ဍဲတ္ၚဲဂှ်လေဝ် ဟိုတ်နူပရေၚ်ဒပ်ကံၚ်ဇြဳပၞာန် ဖျေံဗ္ဒပ်ပ္ဍဲမျှေန်တာတောၚ် ပွိုၚ်ဍုၚ်ၜဳကလေၚ် ပန်ဖျေံလဝ်လွဟ်ဇၞော်တုဲ သီုမိနော်ဗျု အာယုက်(၈၀) ဒၟံၚ်ကွာန်တောၚ်ကလေဝ်မွဲတၠမပါလုပ် ညးဒေသ(၃)တၠ ဂွံလဝ်ဘဲဝပ်ရဂှ် KNU ခရိုၚ်သဓီု လလောၚ်တြးလဝ်ရ။
ပ္ဍဲပွိုၚ်ၜါတ္ၚဲဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ သ္ၚိဒၟံၚ် ပ္ဍဲပွိုၚ်ဍုၚ်ၜဳကလေၚ် ဗ္ဒာဲ(၄၀)မ ဇီုကပိုက် ဒးလီုလာ်လဝ်ရဂှ် ဂွံတီကေတ်ရ။
ပ္ဍဲတိဍာဲဗော်သွးကောန်ဂကူကရေၚ် KNU ဒပ်မဟာ (၁) ခရိုၚ်သဓီုဂှ်မ္ဂး အကြာမွဲၜါတ္ၚဲဏံ ဒၟာနူဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် အရိုဟ်ဒဒှ်တ္ၚဲဂှ်ရ ညးဒေသထောံသ္ၚိဌာန်တုဲ ဒးဂြိပ်ဒဴကၠုၚ် နွံရ။
ပရိုၚ်-သြၚ်လောန်တိုၚ်(မ်)
ဗီုရုပ်- CJ