လဂုၚ်၊ မာတ်ချ်(၃၁)
ပ္ဍဲလတူ ကဝ်မယှေန်ပေါဲရုဲမာဲ ကံၚ်ဇြဳပၞာန်ခါန်ကၞက်လဝ် သီရုပ်ပလီုကၠုၚ် ဗော်ပရေၚ်ဍုၚ်ကွာန် (၄၀)ဗော် မပါလုပ်သီု ဗော်ဒဳမဝ်ကရေဇြဳကောန်ဂကူ (NLD) က္လိဂွံလဝ်ပရေၚ်ထံက်ဂလာန်ညးဍုၚ်ကွာန် ဂၠိုၚ်အိုတ်ဂှ် အလဵုအသဳကၟိန်ဍုၚ်နာနာဂမၠိုၚ် ပါ်ပါဲဟီုဂရိုဟ်လဝ်ရ။
ဌာနဝန်ဇၞော်ပရေၚ်ဍုၚ်သ္အာၚ် ဂျာမနဳ၊ ဗြိတိၚ်၊ ကနေဒါ၊ အဝ်သတြေလျ၊ ကေုာံဂျပါန်ကီု သီုအမေရိကာန် မဒှ်ကၟိန်ဍုၚ်ဇြဟတ်ဇၞော်ပ္ဍဲ ဂၠးတိ ကေုာံ ပူဂဵုမၞုံအခေါၚ်ဟီုဂးဂမၠိုၚ်တအ်ဂှ် ပ္တိတ်လဝ်လိက်လောၚ်တြး ပ္ဍဲဂိတုမာတ်ချ် စၟတ်တ္ၚဲ(၂၉)ဂှ် တၞဟ်ဟ်အိုတ်ရ။
ရုၚ်ပရေၚ်ဍုၚ်သ္အာၚ်ဗြိတိၚ်ဂှ်မ္ဂး ပွမပလီုသီရုပ်လဝ် ဗော်ပရေၚ်ဍုၚ်ကွာန် ပါလုပ်သီုဗော်ဒဳမဝ်ကရေဇြဳကောန်ဂကူ ဒဝ်အံၚ်သာန်သုကျဳ က္ဍိုက်လဝ်က္ဍိုပ်ဂှ် ဒှ်ပွထပ်က္ဍိုက်ဓရိုက် အခေါၚ်အရာညးဍုၚ်ကွာန်ဗၟာ ကေုာံအခေါၚ်အရာဗၠးၜးရဂှ် ဟီုသ္ဂးလဝ်ရ။
ပြၚ်သေတ်လေဝ် ပွမသီရုပ်ပလီုပရေၚ်ဍုၚ်ကွာန်ဂှ် ဒှ်ပရေၚ်ဟုတ်ယုတ်စှ်ေ ပ္ဍဲလ္တူအခေါၚ်အရာဟီုဂးပတိုန်ထ္ၜး အခေါၚ်အရာဗၠးၜး ကေုာံအခေါၚ်ကောံကလောံဗၠးၜး တၟိမွဲဂကူတုဲ ကြဴနူသီအဝဵုတုဲ ဒှ်ကၠုၚ်သက်သဳသာဓက ဗျူဟာပလီုပလာ် ပရေၚ်ဂီုကၠီုသၞောဝ်ဥပဒေ သၞောတ်စှ်ေစှ်ေရဂှ် လလောၚ်တြးလဝ်ရ။
ရုၚ်ကလုတ်တမာန်ကနေဒါ ဆေၚ်ရာကဵုကၟိန်ဍုၚ်ဗၟာဂှ်လေဝ် အာတ်မိက်ကၠုၚ် သွက်ဂွံဗလးပ္တိတ်ကဵု က္ဍိုက်သ္ကိုပ်ပရေၚ်ဍုၚ်ကွာန်ကီု သီုညးဒးဒုၚ်ရပ်လဝ်သီုဖအိုတ် ကေုာံသွက်ဂွံဖအိုတ်ကၠေံ ပွပ္ကီုပရာပ် ပ္တဝ်လဝ်ကုကောန်အရာပ်တအ်ဂှ်ရ။
ဌာနဝန်ဇၞော်ပရေၚ်ဍုၚ်သ္အာၚ်ဂျပါန်ဂှ်မ္ဂး ရုပ်သီရိုဟ်ပလီုလဝ်ဗော် NLD တုဲ ပွမပါဲပ္တိတ် နူဗွိုၚ်ပရေၚ်ဍုၚ်ကွာန်ဂှ် ပ္ဍဲအရာသောၚ်ကလးပရေၚ်ဍုၚ်ကွာန်ကၟိန်ဍုၚ်ဗၟာ သာတုဲ ဝါတ်ဂါတ်ခက်ခုဲကၠုၚ်ဂှ်ရ သွက်ညးဆေၚ်စပ်သီုဖအိုတ် ဂွံသောၚ်ကလး ဗွဲမၜိုဟ်သြိုဟ်ဂှ် ဗတိုက်ဖ္အောဝ်လဝ် ဒပ်ပၞာန်ဗၟာ ဇြိုဟ်ဟ်နက်က်ရ။
ဟိုတ်နူပတေၚ်ဂြတ်လဝ် သၞောဝ်ဥပဒေပ္တိုန်စၟတ်သမ္တီတုဲ ဗွိုၚ်ပရေၚ်ဍုၚ်ကွာန် သာတုဲ က္ဍန်ဂြက်ကၠုၚ်ဏောၚ်ဂှ် ဒဒှ်ရကၟိန်ဍုၚ်အဝ်သတြေလျ က္တဵုဒှ်ဒၟံၚ်ဓဝိၚ်တုဲ ပရေၚ်ပတူပတိုန်ဒဳမဝ်ကရေဇြဳ ပါလုပ်သီုပေါဲရုဲမာဲဒုၚ်တဲပတှ်ေစှ်ေစိုတ်မာန်ဂှ် အာတ်မိက်ကၠုၚ်ရ။
ဗော်ဒဳမဝ်ကရေဇြဳကောန်ဂကူဂှ်မ္ဂး ဗော်ပရေၚ်ဍုၚ်ကွာန်ညးတအ် ကေုာံ ဗော်ပရေၚ်ဍုၚ်ကွာန်ဂမၠိုၚ် ဒက်ပ္တန်လဝ် ဗွဲမလုပ်သၞောဝ်ဂှ် နကဵုကဝ်မယှေန်ပေါဲရုဲမာဲကံၚ်ဇြဳပၞာန် အခေါၚ်ရုပ်သီရိုဟ်ပလီု၊ အခေါၚ်သ္ပဒ္တန် ဟၟဲလးလးရဂှ် က္လေၚ်ပလန်လဝ်တဲ ပ္ဍဲဂိတုမာတ်ချ် စၟတ်တ္ၚဲ(၂၉)ဏံရ။
အတိုၚ်သၞောဝ်ပတိုန်စရၚ်ဗော်ပရေၚ်ဍုၚ်ကွာန် ကံၚ်ဇြဳပၞာန် ၝောံပိုဒ် -၂၅ ဂှ်မ္ဂး ပ္ဍဲပွိုၚ် (၆၀)တ္ၚဲ ဗော်ပရေၚ်ဍုၚ်ကွာန် ဟွံကၠုၚ်ပတိုန်စရၚ်စၟတ်သမ္တီတအ်ဂှ် နူဒဒှ်ဗော်ပရေၚ်ဍုၚ်ကွာန် ဒးခရိုဟ်လီုစှ်ေ အလဵုလဵုဍေံရောၚ်ဂှ် ပျးဌာန်လဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ်- NLD