ကဝ်တူလေဝ်၊ မာတ်ချ် (၃၁)
ဗ္ဒိုပ်ဒပ်မေဝ်ခါထာ မစှ်ေကဵုဗျူဟာပရေၚ်ပၞာန် သွက်ကံၚ်ဇြဳပၞာန် မၞုံအပ္ဍဲခရိုၚ်ဘာပန် တိဍာ်အုပ်ဓုပ်ကဝ်တူလေဝ်ဂှ် ဂကောံဒပ်ပံၚ်ကောံ ဒပ်မဟာ (၅) KNLA တံ ကၠုၚ်စိုပ်ဗ္တိုက်သီလဝ် အပ္ဍဲ (၄၅) မိနေတ်ဂှ် ဒပ်မဟာ (၅) KNU လလောၚ်ပ္တိတ်လဝ် နကဵုစၟတ်တ္ၚဲ ဂိတုမာတ်ချ် (၃၀) ရ။
ဗ္ဒိုပ်မေဝ်ခါထာ ဒပ်ကံၚ်ဇြဳပၞာန် မတန်တဴဒၟံၚ် ပ္ဍဲဇိုၚ်ၜဳသြၚ်လောန် ပယျဵုသေံဂှ် တုဲကၠုၚ်ဂိတုမာတ်ချ် (၂၈) အခိၚ်နူဂယး (၅) နာဍဳဂှ် ဂကောံဒပ်ပံၚ်ကောံ ဒပ်မဟာ (၅) KNLA တံ ဗ္တိုက်သီဂွံလဝ်တုဲ လလအ်ပေါဲဗ္တိုက်ဂှ်ဝွံ (၄၅) မိနေတ်ဟေၚ် လအ်လဝ်ဂှ် ပါလုပ် ပ္ဍဲတၚ်လလောၚ်တြးဂှ်ရ။
ပ္ဍဲအခိၚ်ပေါဲဗ္တိုက်တုဲ လ္ပာ်ဒပ်ကံၚ်ဇြဳပၞာန်ဂှ် (၁၆) တၠ ချိုတ်တုဲ (၇) တၠ ကလိဂွံလဝ်ဝပ်ဇီုကပိုက်ဒးလဝ်တုဲ ပၞောဝ်ကဵုညးမကလိဂွံလဝ်ဝပ်ဂမၠိုၚ် (၅) တၠဂှ် ၜိၚ်ကၠောံလ္ပာ်ဍုၚ်သေံ ဗၠးအာတုဲ အခိၚ်လၟုဟ်ဂှ် ဒပ်ပၞာန်သေံ လွဳလွတ်ကဵုဒၟံၚ်ရောၚ်ဂှ် တၚ်လလောၚ်တြးဂှ် သ္ဂးလဝ်ရ။
ပ္ဍဲအခိၚ်ကလေၚ်သီကေတ် ဗ္ဒိုပ်မေဝ်ခါထာတုဲဂှ် သီုကဵုသီဂိုၚ်ဂွံလဝ် လွဟ်ဇၞော်၊ လွဟ်ဍောတ်နာနာ အပံၚ်ဖအိုတ် (၂၃) ဇကိုအ် ကေုာံ မကမ် (၃၀၀၀) ဒကောၚ်ပြၚ်ဂှ်ကီု၊ စက်ဆက်စၠောံ၊ စက်ဟီုအရေဝ်၊ ဖုၚ်၊ ဗူဗာတ်ထရဳ ကေုာံ ပံၚ်မဳပၞာန်တံဂှ် ဒပ်မဟာ (၅) လလောၚ်ပ္တိတ် ဟီုဂးလဝ်ရ။
အပ္ဍဲပေါဲဗ္တိုက်သီဗ္ဒိုပ်မေဝ်ခါထာဂှ် လ္ပာ်ဂကောံဒပ်ပံၚ်ကောံ ဒပ်မဟာ (၅) KNLA ဂှ် (၁) တၠ ချိုတ်တုဲ (၈) တၠ ကလိဂွံလဝ်ဝပ်ရောၚ်ဂှ် သ္ဂးရ။
ကောန်ဂကောံဒပ်ကံၚ်ဇြဳပၞာန် မၞုံဗ္ဒိုပ်မေဝ်ခါထာတံဂှ်ဝွံ ဒှ်ဗ္ဒိုပ်မကၠောန်ဒၟံၚ် ပွကော်စၟဳတ်သၟာန်သၟုက် လ္တူညးဍုၚ်ကွာန်အာတရဴ မအာကၠုၚ်ဒၟံၚ် လ္ပာ်ၜဳသြၚ်လောန်တံဂှ်ကီု၊ သီုကဵုကၠောန်သ္ပဒၟံၚ် ပွပန်ပှော်ဘပဠ ကေုာံ ပွအာတ်မိက်ဇွောံမစၞစတံမွဲရောၚ် မဒှ်ရ။
ဗ္ဒိုပ်ဒပ်မေဝ်ခါထာဝွံ ကြဴနူဌာန်ဂအုပ်ဗဟဵု KNU မာနေဝ်ပဠဝ် ပြဟ်လလုဲအာ ပ္ဍဲသၞာံ ၁၉၉၅ တုဲဂှ် ဒှ်ဗ္ဒိုပ် KNLA တြေံမွဲ နူကဵုဒပ်ပၞာန်တံ မထ္ပက်ပၞာန်သီကေတ်လဝ် နကဵုဇြဟတ်ဒပ်လၟိဟ်ဗွဲမဂၠိုၚ်ဂၠေၚ်ဂှ် ဂွံတီကေတ် အတိုၚ်တၚ်လလောၚ်တြး လၟေၚ်ပရိုၚ်မူတြဝ် KNU ရ။
ပရိုၚ်−သြၚ်လောန်တိုၚ်(မ်) ဗီုဓာတ်−KNU